ဍာ်ဗု၊ ဂျူလာၚ် (၁၂)
ဒပ်ကံၚ်ဇြဳပၞာန် ဟိုတ်နူထ္ပက်ကၠုၚ်ကရောၚ်ပၞာန် လ္ပာ်ဒေသနဗုလေဝ် ပွိုၚ်ဍုၚ်ဍာ်ဗု ရးဒေသဇၞော်တၞၚ်သဳ တံဂှ်ရ ပေါဲဗ္တိုက်ၜါလ္ပာ် က္တဵုဒှ်ဒၟံၚ်ဂှ် ညးတာလျိုၚ် ဂကောံဒပ်စဵုဒၞါညးဍုၚ်ကွာန်ရးတၞၚ်သဳတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဂျူလာၚ် (၁၁) အခိၚ်နူဂယးဂှ်တုဲ ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ဗၞတ် ၁၀၀ ဂှ် ဟိုတ်နူလုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲဒေသနဗုလေဝ်ဂှ်ရ ပေါဲဗ္တိုက်ၜါလ္ပာ် က္တဵုဒှ်ဒၟံၚ်ရ။
ပေါဲဗ္တိုက်ဂှ်ဝွံ က္တဵုဒှ်လဝ် ပရေၚ်ပန်ပှော် စဵုကဵုအခိၚ်လဒေါဝ်တ္ၚဲကီုလေဝ် အကာဲအရာပေါဲဗ္တိုက်ဂှ်ကီု ပရေၚ်ဇီုကပိုက်ကလိဂွံဝပ်တံကီုဂှ် ဟွံဂွံတီကေတ် သောဲသောဲဗြောဲဗြောဲဏီပုဟ်ဂှ် သ္ဂးရ။
အတိုၚ်ဂလာန် ဂကောံဒပ်စဵုဒၞါဒေသတံဂှ်မ္ဂး ကရောၚ်ပၞာန်ကံၚ်ဇြဳပၞာန်ဝွံ အာလ္ပာ်သြၚ်ၜဳထဝါဲ ဒှ်မာန်တုဲ က္ၜၚ်ပၞာန်မွဲဖ္ဍိုက်လေဝ် ဖျေံလဝ်တၟအ် ပ္ဍဲကဵုပြၚ်ၜဳဘဝါဂှ်ရောၚ်ဂှ် ဟီုရ။
ဟိုတ်နူကရောၚ်ပၞာန်ကံၚ်ဇြဳပၞာန် လုပ်စိုပ်ကၠုၚ် အပ္ဍဲဒေသနဗုလေဝ်ဂှ်ရ ညးဒေသ ၜိုတ် ၁၀၀၀ နူကဵုကွာန်ထုၚ်ကျဳ၊ အေကနိ၊ လေဝ်ယှံၚ်၊ ခမံက်ချံၚ်၊ ဝေန်ချံၚ်တံ ဒးဂြိပ်ဒဴပါဲဒလေတ်ဒၟံၚ်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုမေ ၁၄ တေံဂှ်လေဝ် ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲဗ္ဒိုပ်ဗၠာဲသၟိၚ် ဗ္ဒါဲသြၚ်ၜဳထဝါဲ ဒေသနဗုလေဝ်ဂှ် ဒးဒုၚ်ဗ္တိုက်တုဲ လ္ပာ်ကံၚ်ဇြဳပၞာန်ဂှ် ဗ္တိုက်လဝ် သီုကဵုတရဴကျာတံရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai