ပ္ဍဲသ္ကုတ်သၠုၚ်ကျာဍုၚ်ဂျပါန်ဂှ် ဟိုတ်နူဗြဲရိုပ်ဂူတုဲ မၞိဟ် (၆) တၠ ချိုတ်တုဲ (၃) တၠ ကၠေံဒၟံၚ်

တိုဝ်ကျိုဝ်၊ ဂျူလာၚ် (၁၂)

ပ္ဍဲကဵုတ္ကအ် ဒိုဟ်နေရတိ ဍုၚ်ဂျပါန်ဂှ် ဟိုတ်နူဗြဲရိုပ်ဂူတုဲ ဍာ်ဇၞော်ဍာ်ကလိုပ်၊ တိလာ်တံ က္တဵုဒှ်လဝ်တုဲ မၞိဟ် (၆) တၠ ချိုတ်အာလဝ်တုဲ ကၠေံဒၟံၚ် (၃) တၠဂှ်လေဝ် သၟာဟံၚ်ပြာ်တံ ဒဒှ်ရဂၠါဲဒၟံၚ်ဖိုဟ်ဂှ် သၟိၚ်တၠအဝဵုတံ ဟီုဂးလဝ် ပ္ဍဲကဵုဂိတုဂျူလာၚ် (၁၁) တေံရ။

အေဂျေန်ဇြဳစမ်ၜတ်အကာဲအရာဗြဲကျာ ဍုၚ်ဂျပါန်ဂှ်ဝွံ တၚ်ကဵုသတိ သွက်သ္ကုတ်သၟဝ်ကျာတ္ကအ်ဂှ် ယှအ်ဖျေံလဝ်ကဆံၚ်ကီုလေဝ် သွက်တိလာ်ဂှ် ညံၚ်ဂွံစွံသတိဗွဲတၟေၚ်ညးသ္ကအ်အိုတ်ဂှ် ကဵုလဝ်သတိ ညးဍုၚ်ကွာန်တံရ။

အခိၚ်လၟုဟ်ဂှ် ပ္ဍဲကဵုဍုၚ် မဒးဒုၚ်ဒၟံၚ်ဘဲဒဏ်ဗြဲရိုပ်ဂူ ဟွံသေၚ်ကဵုအခိၚ် အလုံဂၠးတိတံဂှ် ဍုၚ်ဂျပါန် ပါလုပ်ကၠုၚ်လဝ်တုဲ စပ်ကဵုပရေၚ်အခိၚ်ရာသဳဥတုပြံၚ်လှာဲဂှ်တုဲလေဝ် ဒှ်ဒၟံၚ်အခိၚ် ဓဝ်ဖေက်တံ သၠုၚ်တိုန်ဒၟံၚ်ရ။

“ ဂကောံအုပ်ဓုပ်တံဂှ် ပရေၚ်ချိုတ်ဂျိုၚ်တံ ဆက်က္တဵုဒှ်ဒၟံၚ် နွံဟွံမွဲဂှ် စၟဳတ်ဒၟံၚ်ဖိုဟ်ရ။ ဆ္ဂး လၟုဟ်ဂှ် မၞိဟ် ၃ တၠ ချိုတ်လဝ်ရောၚ် ဂွံလဝ်ပရိုၚ်တုဲ သှ်ေ ၃ တၠဂှ်လေဝ် ဟိုတ်နူဘဲအန္တရာယ်တံဏံတုဲ တၠုၚ်လအာဂွံချိုတ်ဂှ် နွံဒၟံၚ်ဏောၚ်။ မၞိဟ်ကၠေံဒၟံၚ်ဖိုဟ်ဂှ် နွံဒၟံၚ် စဵုကဵု ၂ တၠတုဲ မၞိဟ်ဇီုကပိုက်ဒးညိညဂှ် ၂ တၠ နွံဒၟံၚ်ရ” သာ်ဝွံ ညးအုပ်ကာဇၞော်အိုတ် ဂကောံအလဵုအသဳဂှ် ဟီုလဝ် ပ္ဍဲကဵုပေါဲသောၚ်ကလးပရိုၚ်ရ။

ဟိုတ်နူဗြဲဂူတုဲ ရုၚ်စက်ကၠောန်ပ္တိတ်သၠာတာယာ Bridgestone မၞုံ Kyushu (၄) ရုၚ်ဂှ် ဒးဒေါအ်လဝ်ကမၠောန် ပ္ဍဲကဵုတ္ၚဲစန်တေံဂှ်ကီုလေဝ် ပ္ဍဲကဵုတ္ၚဲအၚာ ပယျာံဂယးဂှ် ဒဒှ်ရရုၚ်စက်တံ ကလေၚ်ဂေတ်ဂြိပ်လဝ်ဂှ် ညးမၞုံအခေါၚ်ဟီုဂး ကမ္ပဏဳဂှ်မွဲတၠ ဟီုဂးလဝ်ရ။

Source: Reuters/zl