လွိုၚ်ကဝ် – ဂျူလာၚ်(၁၃)
ပ္ဍဲတွဵုရးကရေၚ်ဍာဲ ပေါဲဗတိုက်သ္ကာတ်မြဟ်ဒၟံၚ်ဂှ် နူဂၠံၚ်ပေန်လောၚ်-ဖေဝ်ခုမ်မွဲကဆံၚ် ဒပ်ကံၚ်ဇြဳပၞာန် ထပ်ဗပေၚ်ဒၟံၚ်ဇြဟတ် မွဲဒမြိပ်ရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။
ပ္ဍဲသတ္တာဟတုဲကၠုၚ်တေံ နူကဵုပေန်လောၚ် စဵုကဵုလွိုၚ်ကဝ် ကွဳစက်ပၞာန် (၆၀)ဖ္ဍိုက်ပြၚ် ထပ်ဗပေၚ်လဝ် ဇြဟတ်တုဲ ပ္ဍဲကရောၚ်ပၞာန်ဂှ် ဇြဟတ်ၜိုတ်လဵုနွံ ကေုာံ နူတံဒပ်လဵု ပါလုပ်ရောဂှ် ဟွံဂွံတီကေတ် ချိုတ်တ်ပၠိုတ်တ်ဏီရ။
ကံၚ်ဇြဳပၞာန် သုၚ်စောဲဂၠံၚ်ဇၞော်ကၟိန်ဍုၚ်တုဲ ၜါသတ္တာဟမွဲအလန် ထပ်ဗပေၚ်ဒၟံၚ်ဇြဟတ်ဒပ် ကေုာံဇွောံမကီု ပရေၚ်ထပ်ဗပေၚ်ဒၟံၚ်ဇြဟတ် ဗီုလၟုဟ်ဏံဂှ် သွက်ဂွံစဵုဒၞာညံၚ်ဒပ်ပၠန်ဂတးတအ် ဟွံဂွံစိုပ်လ္တူဍုၚ်လွိုၚ်ကဝ် ဒှ်မာန်ရဂှ် ကိုဝ်ဂျူလာၚ် နူဒပ်စဵုဒၞာညးဍုၚ်ကွာန်မိုဝ်ဗျာ ဟီုသ္ဂးလဝ်ရ။
အခိၚ်လၟုဟ်ဏံမ္ဂး လ္ပာ်ကံၚ်ဇြဳပၞာန် သွက်ဂွံစဵုဒၞာလ္ပာ်လွိုၚ်ကဝ်ကဵု ဟိုတ်နူဂွိၚ်ဖေက်ကၠောန် သ္ပကၠုၚ်ပေါဲဗတိုက်သီဍုၚ်တုဲ ဂကောံကၟိန်အိန်ထံၚ်ပ္ဍဲဒပ်ပၞာန်တအ်လေဝ် ပြံၚ်ပဆုဲလဝ်ဒၞာဲ နွံရဂှ် ညးဟီုလဝ်ဏီရ။
အခိၚ်လၟုဟ်ဏံ ပ္ဍဲဖာသောၚ်ကဵု ဗဝ်လခေဝ် တွဵုရးကရေၚ်ဍာဲဂှ်လေဝ် အကာဲအရာပရေၚ် ကြံၚ်မ္ၚိုဟ်ဒၟံၚ်တုဲ လ္ပာ်ကံၚ်ဇြဳပၞာန် ကၠုၚ်ပန်ပှော်ဒၟံၚ်ကဵုက္ၜၚ်ကျာ ခြာဟွံလအ်ဟွံလအ်နွံဒၟံၚ်တုဲ ပရေၚ်ပ္တိတ်ဒၟံၚ်ဇြဟတ် သွက်ဂွံကလေၚ်သီကေတ်ဗဒိုပ်မေဝ်သေအ် မဒှ်ပယျဵုဒၞက်သေံ-ကရေၚ်ဍာဲ နွံဒၟံၚ်ရဂှ်လေဝ် ဓမံက်လဝ် ပ္ဍဲတမ်ရိုဟ်တၚ်ဂၞၚ်ပရိုၚ်တအ်ရ။
ဟိုတ်နူအကာဲအရာဒပ်ကံၚ်ဇြဳပၞာန် ပလေဝ်ပလေတ်ဒၟံၚ် သွက်ဂွံဓမံက်ရုပ်ရဴပေါဲဗတိုက်တုဲ ပ္ဍဲတွဵုရး ကရေၚ်ဍာဲ အကာဲအရာပေါဲဗတိုက် ဆက်သ္ကာတ်မြဟ်ကၠုၚ် နွံမာန်ဏောၚ်ဂှ် ဂကောံဇြဟတ်ပၠန်ဂတး တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲတွဵုရးကရေၚ်ဍာဲ ဇြဟတ်ပၞာန်ပၠန်ဂတးခိုဟ်ဒၟံၚ်ဂှ် ကြဴနူပရေၚ်ပၞာန်သီအဝဵုတုဲ အပံၚ်လၟိဟ်ပေါဲ ဗတိုက်(၇၂၉)ဝါ က္တဵုဒှ်လဝ်တုဲ ပ္ဍဲသၞာံ ၂၀၂၃ သ္ကုတ်ကၠာဂှ်လေဝ် ပေါဲဗတိုက်ဂမၠိုၚ် သ္ကာတ်မြဟ်ဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – KNDF/CJ
sanlontai