ရေၚ်ယာဉ်ကွဳစက်ကံၚ်ဇြဳပၞာန် ဒးဒုၚ်ကြတ်ဗတိုက်လဝ် ပ္ဍဲကျာ်ထဝ်

ကျာ်ထဝ်၊ ဂျူလာၚ်(၁၃)

တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ အကြာကွာန်မျာန်ချောၚ်ကဵု မုပ္ပလေန် ရေၚ်ယာဉ်ကွဳစက်ကံၚ်ဇြဳပၞာန် ဒးဒုၚ်ကြတ်ဗတိုက်လဝ် ပ္ဍဲဂၠံၚ်ကွဳစက်လဂုၚ်-မတ်မလီုရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။

ရေၚ်ယာဉ်ကွဳစက်ကံၚ်ဇြဳပၞာန် ကွဳစက် (၇) ဖ္ဍိုက်ပါလုပ်ဒၟံၚ် ဒဳလုပ်ကၠုၚ်ဍုၚ်ကျာ်ထဝ် နူလ္ပာ်သေတ်တောၚ်ဂှ် ပ္ဍဲဂိတုဂျူလာၚ်စၟတ်တ္ၚဲ (၁၁) အခိၚ်ဒေါဝ်တ္ၚဲ ၜိုတ် (၁၂)နာဍဳဂှ် ဂကောံဇြဟတ်ပၠန်ဂတးပံၚ်တောဲတအ် ကြတ်ဗတိုက်လဝ်ကဵု လွဟ်ဇၞော်ဍောတ်ရ။

ဟိုတ်နူဒးဒုၚ်ကြတ်ဗတိုက်လဝ်တုဲ လ္ပာ်ကံၚ်ဇြဳပၞာန် ဗက်ပန်ပှော်ဒၟံၚ်ကြာန်န်တုဲဂှ် ဒဳဓရိပ်ဏာကွဳစက်ရဂှ် ကောန်ဒပ် PDF မွဲတၠ ဟီုသ္ဂးလဝ်ရ။

ပ္ဍဲပရေၚ်ပန်ဗတိုက်ဂှ် ဟိုတ်နူမကမ်လွဟ်ဇၞော် ၄၀ မမ မွဲမ ဒတုံစှ်ေလဝ် ပ္ဍဲဍုတ်ကွဳစက်ပၞာန်မွဲဖ္ဍိုက် တပ်ပ်တုဲ လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် နွံမာန်ရဂှ် ညးဟီုသ္ဂးလဝ်ရ။

ရေၚ်ယာဉ်ကွဳစက်ကံၚ်ဇြဳပၞာန် ဒးဒုၚ်ကြတ်ဗတိုက်လဝ်ကဵု ဂကောံဇြဟတ်ပၠန်ဂတးကျာ်ထဝ် KRF ဂှ် ဟိုတ်နူပန်ပှော်ကၠဟ်ဖျေံလဝ်လွဟ် ဗုမ်ကၠဟ် ပ္ဍဲလ္ပာ်သ္ၚိနွံလ္ပာ်တဲပါဲဂၠံၚ်ဂှ်တုဲ ကောန်အရာပ်မွဲတၠ ဂွံလဝ်ဘဲဝပ်ရဂှ် လလောၚ်တြးလဝ်ရ။

ပွိုၚ်ဍုၚ်ကျာ်ထဝ် ပ္ဍဲဂၠံၚ်ကွဳစက် လဂုၚ်-မတ်မလီုဂှ် ပ္ဍဲမွဲကာလဒပ်ပၞာန်သီအဝဵုဏံ ရေၚ်ယာဉ်ကွဳစက်ကံၚ်ဇြဳပၞာန် ဒးဒုၚ်ဗတိုက်ဒၟံၚ်ခြာဟွံလအ်ဟွံလအ်တုဲ ပရေၚ်ဇီုကပိုက် ဒးချိုတ်လဝ် နွံကၠုၚ်ရ။

ပ္ဍဲဂိတုဂျူလာၚ် စၟတ်တ္ၚဲ(၂) တုဲကၠုၚ်တေံလေဝ် ဟိုတ်နူကွဳစက်ဂေတ်ကၚ်ကဵုဇြဳပၞာန်ကဵု သၞေဟ်ကၚ်စၟဳစၟတ် ဗ္ဒာဲကွာန်အၚ်္ဂဘိုဝ်ကဵု တေဝ်ဖျူချောၚ်ဂှ် ပွိုၚ်ဍုၚ်ကျာ်ထဝ် ဒးဒုၚ်ဗတိုလဝ်တုဲ ကောန်ဒပ်ကံၚ်ဇြဳပၞာန် (၆)တၠ ဂွံလဝ်ဘဲဝပ်ဏီရ။

ပရိုၚ်-သြၚ်လောန်တိုၚ်(မ်)

ဗီုရုပ် – Social Media