ပလဝ်၊ ဂျူလာၚ်(၁၃)
ရးဒေသဇၞော်တၞၚ်သြဳ၊ ပွိုၚ်ဍုၚ်ပလဝ်၊ သ္ၚိဒၟံၚ်ညးလုပ်ဂကောံပျူသဝ်ထဳ မၞုံကွာန်နာတ်အုၚ်တောၚ် (၄)တၠတအ်ဂှ် သီကေတ်လဝ် နဒဒှ်ဒြပ်ညးဍုၚ်ကွာန် ကၟာတ်ဒၞာလဝ်ရဂှ် ညးတာလျိုၚ် ကရောၚ်ပၞာန်ပူရိယက္ခညဳနောၚ်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုဂျူလာၚ် စၟတ်တ္ၚဲ (၁၁) တုဲကၠုၚ်တေံဂှ် သ္ၚိဒၟံၚ်ညးလုပ်ဂကောံပျူသဝ်ထဳ ပါလုပ် သီုဥူဘမောၚ်တအ် (၄)မ ကေုာံ ကၠံမွဲဂအာၚ်ဂှ် ဒပ်ပၞာန်စဵုဒၞာကောန်ဂကူကရေၚ် KNDO ကီု သီုကဵုဒပ်ပံၚ်ကောံ ဂကောံဇြဟတ်ပၠန်ဂတးတအ် ကၟာတ်ဒၞာသီကေတ်လဝ်ရ။
ကောန်ဂကောံပျူသဝ်ထဳ ကွာန်နာတ်အုၚ်တောၚ်တအ်ဂှ် ဟိုတ်နူကဵုပရိုၚ်ကဵုကံၚ်ဇြဳပၞာန်ကီု၊ ဃောထ္ပက်ကရောၚ်ပၞာန်ဂှ် ဟိုတ်နူထ္ၜးဒၟံၚ်ကဵုဂၠံၚ်ဍာန်ကီု အခိၚ်အာပသောၚ်သ္အးဂှ် ဟိုတ်နူဂြိပ်တိတ်အာလဝ်တုဲ ကၟာတ်ဒၞာသီကေတ်လဝ်သ္ၚိဒၟံၚ်ရဂှ် သ္ဂးလဝ်ရ။
ပရေၚ်ကၟာတ်ဒၞာသ္ၚိဒၟံၚ်ကောန်ဂကောံပျူသဝ်ထဳတအ်ဂှ် ဒှ်ပရေၚ်ကဵုသတိ ကောန်ဂကောံပျူသဝ်ထဳ ယိုၚ်ဂၠေၚ်ဒၟံၚ်တာလျိုၚ် ပ္ဍဲသၟဝ်တဲကံၚ်ဇြဳပၞာန်ရဂှ် ညးတာလျိုၚ်လလောၚ်ပရိုၚ် ကရောၚ်ပၞာန်ပူရိယက္ခညဳနောၚ် ဟီုသ္ဂးလဝ်ရ။
သ္ၚိဒၟံၚ်ကောန်ဂကောံပျူသဝ်ထဳ ဒးဒုၚ်ကၟာတ်ဒၞာသီကေတ်လဝ်တအ်ဂှ် ကၠောန်သ္ပရေၚ်တၠုၚ်အာ အတိုၚ်တၚ်သ္ဂုတ်သွာတ်ညးတာလျိုၚ် နကဵုဂၠံၚ်တရဴနဲကဲ စဳဇန်ဖန်ဖက်ရောၚ်ဂှ် ဂွံတီကေတ်ရ။
ကွာန်ပျူသဝ်ထဳ ပ္ဍဲပွိုၚ်ဍုၚ်ပလဝ်ဂှ် ဟိုတ်နူဂကောံဇြဟတ်ပၠန်ဂတးတအ် ဗတိုက်လဝ်ဂှ်ရ ဂြိပ်ဒဴတိတ်အာအိုတ်တုဲ ပံၚ်ကောံမံၚ်ဒၟံၚ် ပ္ဍဲကွာန်ပလဝ်ကုမ် မဒှ်ကွာန်ထံက်ဂလာန်ပျူသဝ်ထဳရဂှ် ဂွံတီကေတ်ရ။
တွဵုရးပလဝ် လလောၚ်တြးလဝ်ပရေၚ်အုပ်ဓုပ်ပၞာန်ဂှ် ဒှ်ဒေသဂကောံဇြဟတ်ပၠန်ဂတးတအ် ဇြဟတ်ခိုဟ်ဒၟံၚ် မွဲဒေသတုဲ ၜိုတ်လ္တူဍုၚ်ဟေၚ် ကံၚ်ဇြဳပၞာန်ထိၚ်ဒဝ်လဝ်မာန်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – ကရောၚ်ပၞာန်ပူရိယက္ခညဳနောၚ်
sanlontai