ပရေၚ်ပံၚ်တောဲ ကုအလဵုအသဳတဳမဝ်ဗၟံက် လ္ဂောံကဵုပရေၚ်ကလုတ်တမာန်တံ ဆက်နွံဒၟံၚ်ရောၚ် NUG ဟီု

လ္ဂုၚ်၊ ဂျူလာၚ် (၁၃)

အကြာအလဵုအသဳညဳသၟဟ်ဂကူ NUG ကဵု အလဵုအသဳတဳမဝ်ဗၟံက်တံဂှ် လ္ဂောံကဵုပရေၚ်ကလုတ်တမာန် ပရေၚ်ပံၚ်တောဲရေၚ်တၠုၚ် စပ်ကဵုပရေၚ်ဍုၚ်ကွာန်တံ သ္ဂောံဆက်ကၠောန်နွံဒၟံၚ်ရောၚ်ဂှ် ညးမၞုံအခေါၚ်ဟီုဂး ရုၚ်သမ္မတ NUG ဥူကျဝ်ဇြဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ညးစၞး ကေုာံ ဝန်ဇၞော်ကာဍုၚ်သ္အာၚ် NUG တံ ပ္ဍဲကဵုလၟေၚ်တရဴဍုၚ်တဳဗဝ်ဗၟံက် နူဂိတုဂျူလာၚ် (၁) စဵုကဵုဂိတုဂျူလာၚ် (၅) ဂှ် သဳကၠဳလဝ် ကိစ္စပရေၚ်ရေၚ်တၠုၚ်ပံၚ်တောဲၜါဍုၚ်တံကဵု တၚ်တုပ်စိုတ် စပ်ကဵုကၟိန်ဍုၚ်တံ ဗွဲမအံၚ်ဇၞးဂှ် ပ္ဍဲဂိတုဂျူလာၚ် (၁၀) တေံ NUG လလောၚ်ပ္တိတ်ကၠုၚ်ရ။

ဆ္ဂး တုပ်လဝ်စိုတ် တၚ်နၚ်သာ်လဵုရော၊ ပံၚ်တောဲအာ ပ္ဍဲကဏ္ဍသာ်လဵုရောဟီုဂှ် လလောၚ်ပ္တိတ်လဝ် ဗွဲလစှ်ေဂှ် ဟွံမွဲရ။

ညးမၞုံအခေါၚ်ဟီုဂး ရုၚ်သမ္မတ အလဵုအသဳညဳသၟဟ်ဂကူ NUG ဥူကျဝ်ဇြဝ်ဂှ် လ္ဂောံကဵုပရေၚ်ကလုတ်တမာန်ၜါဍုၚ်တုဲ ပရေၚ်ပံၚ်တောဲတံ နွံဏောၚ်မဒှ်တုဲ သွက်ပၠန်ဂတးက္ညၚ် ညးဍုၚ်ကွာန်တံ ဂွံအံၚ်ဇၞးဂှ်လေဝ် ဒှ်အထံက်အပၚ် လ္ဂောံကဵုပရေၚ်ဍုၚ်ကွာန် ဒှ်ဒတုဲဖဵုဗွဲမလောန်ရောၚ်ဂှ် ဟီုရ။

အသေအဟာန်ယဵုဒုၚ်သစ္စာ ဂကောံအလဵုအသဳတၟိ ဍုၚ်သမ္မတဒဳမဝ်ကရေတ်တေတ် တဳမဝ်ဗၟံက် မရနုက်ကဵု (၉) ဝါ မကၠောန်ဗဒှ်လဝ် ပ္ဍဲဂိတုဂျူလာၚ် ၁ တုဲကၠုၚ်တေံဂှ် သွက်ဂွံတိုန်စိုပ် နဒဒှ်ညးစၞးကၟိန်ဍုၚ်ဗၟာဂှ် သမ္မတတဳမဝ်ဗၟံက် ကော်ဘိက်လဝ် အလဵုအသဳညဳသၟဟ်ဂကူ NUG ဗွဲမလုပ်သၞောဝ်ရ။

ပ္ဍဲကဵုအသေအဟာန်ယဵုဒုၚ်သစ္စာ မကၠောန်ဗဒှ်လဝ် ပ္ဍဲနန်သမ္မတဂှ် ဝန်ဇၞော်ကာဍုၚ်သ္အာၚ် အလဵုအသဳ ညဳသၟဟ်ဂကူ NUG ဒဝ်ဇြေန်မာအံၚ် ကေုာံ ညးစၞး NUG စပ်ကဵုဍုၚ်သမ္မတချိတ် ဥူလေန်တတံ တိုန်စိုပ်လဝ်တုဲ ဒုၚ်တဲဆဵုဂဗလဝ်ညးတံ ပ္ဍဲကဵုသ္ၚိသမ္မတရ။

အလဵုအသဳတဳမဝ်ဗၟံက် ကော်ဘိက်လဝ် အလဵုအသဳ NUG နဒဒှ်ညးစၞးကၟိန်ဍုၚ်ဗၟာတုဲ ဒုၚ်တဲဆဵုဂဗလဝ်ဂှ် ဌာနဝန်ဇၞော်ကာဍုၚ်သ္အာၚ် ကံၚ်ဇြဳပၞာန် ဒစဵုဒစးလဝ် ပ္ဍဲဂိတုဂျူလာၚ်မံက်တေံရ။

ပ္ဍဲဂိတုဂျူလာၚ် ၅ တေံ နူကဵုကံၚ်ဇြဳပၞာန် ကော်ကေတ် ညးဒုၚ်တာလျိုၚ်ယာယဳ ရုၚ်ကလုတ်တဳမဝ်ဗၟံက် မပံက်လဝ် ပ္ဍဲကဵုဍုၚ်လ္ဂုၚ် စဵုကဵုလ္တူဍုၚ်နေဗျဳဒဝ်တုဲ ဒဒှ်ရဒစဵုဒစးဂှ်ကီု ဗွဲကြဴ ညံၚ်ဂွိုအ်ကၠောန်သာ်ဏံဂှ် ကဵုလဝ်သတိရ။

ကြဴနူဒပ်ပၞာန်သီအဝဵုတုဲ အလဵုအသဳညဳသၟဟ်ဂကူ NUG ပါလုပ်သီုကဵုက္ဍိုပ်သ္ကိုပ်ကောန်ဍုၚ်အရၚ် ကေုာံ ညးစၞး NLD တံဂှ် အလဵုအသဳကၟိန်ဍုၚ်သမ္မတချိတ် သ္ပလဝ်စၟတ်သမ္တီ အလန်ပထမကိုပ်ကၠာအိုတ်ရ။

ဗွဲကြဴဂှ် ဍုၚ်တဳမဝ်ဗၟံက် မပ္တိတ်ဒၟံၚ်ဇြဟတ် သွက်ဂွံဂွံအခေါၚ်လုပ် နဒဒှ်ဍုၚ်အာဇြဳယာန်ဂှ် သ္ပလဝ်စၟတ်သမ္တီ ကုအလဵုအသဳညဳသၟဟ်ဂကူ NUG နဒဒှ်ညးစၞးကၟိန်ဍုၚ်ဗၟာ အလန်ဒုတိယပၠန်ရ။

ပရိုၚ်−သြၚ်လောန်တိုၚ်(မ်)

ဗီု−ရုၚ်သမ္မတတဳမဝ်