မတ်မလီု၊ ဂျူလာၚ် (၁၃)
အပ္ဍဲတွဵုရးဍုၚ်မန် ပ္ဍဲလက်ထက်ကံၚ်ဇြဳပၞာန်ဏံ ဟိုတ်နူပရေၚ်ဒစးဒုၚ်စဵုဒၞါ ယဲပုၚ်တံ ဇြဟတ်ဍိုန်လျလဝ်ဂှ်ရ မၞိဟ်က္တဵုဒှ်ယဲ အောန်ကၠုၚ်တုဲ ပ္ဍဲကဵုရုၚ်ဂဥုဲတံဂှ် ထိၚ်ဒက်ဟွံမာန်ဒှ်ကၠုၚ်ရဂှ် အ္စာဂဥုဲဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
က္တဵုဒှ်ယဲပုၚ်ဂှ် ပ္ဍဲသၞာံဏံ နူဂိတုဂျာန္နဝါရဳ စဵုကဵုဂိတုဂျောန် အပ္ဍဲပွိုၚ် (၆) ဂိတုဏံ မၞိဟ်က္တဵုဒှ်ယဲ နွံကၠုၚ် ဗ္ဒါဲ ၆၀၀ တုဲ ပ္ဍဲကဵုဏံ ကောန်ၚာ်သၟတ် နူကဵုပွိုၚ်ဍုၚ်ဇြပ်ဗုကဵု ပွိုၚ်ဍုၚ်ပံၚ်တံဂှ် (၂) တၠ ချိုတ်အာလဝ်ရ။
ပ္ဍဲကဵုဂိတုမေ ကဵု ဂိတုဂျောန်ဂှ် မၞိဟ်က္တဵုဒှ်ယဲ သာဂၠိုၚ်ကၠုၚ်တုဲ ပ္ဍဲကဵုကွာန်ရးလ္ၚဵုတံကဵု အရာပ်လ္ၚဵုတံဂှ်မ္ဂး ကောန်ၚာ်သၟတ် ကၠောံထၞာန်ယဲ ကဵုဂအုံဗွဝ်တံ နွံဒၟံၚ်ရ။
ယဲပုၚ်ဂှ်ဝွံ ပ္ဍဲလက်ထက်ကံၚ်ဇြဳပၞာန်ဏံ ဒစးဒုၚ်စဵုဒၞါတုဲ ဟွံဂွံတြးဂဥုဲဂစိုတ်စၟတ်တံ ဗွဲမဂတာပ်အခိၚ်ဂှ်ကီု၊ ပွမကဵုပညာ ဂဒဵု၊ ချာဲ၊ လှာဲ၊ စၟဳတ်တံ ဍိုန်လျဂှ်တုဲ ဒှ်ကၠုၚ်ယဲ ဂၠိုၚ်ကၠုၚ်ရ။
“ပရေၚ်စဵုဒၞါဂှ် စဵုကဵုဟွံမွဲဒှ်ဒၟံၚ်ရ။ ဓမ္မတာတှ်ေ စဵုဒၞါယဲပုၚ်ဂှ် ပိုယ်တံ ကၠောန်ဟွံဂွံပုဟ်။ အဓိက ဒးဟံၚ်ဍာ်မြံၚ်တံ၊ စုတ်တြးဂဥုဲဂစိုတ်စၟတံ၊ စုတ်ကလိုဝ်ရေန်တံဂှ် ၜိုတ်အဲတီဂှ်တှ်ေ ပ္ဍဲကဵုသၞာံဏံ ကၠောန်လဝ်ဂှ် ဟွံဂွံဆဵုကေတ်ပုဟ်။ ယဲဂှ် လၟုဟ်ဂၠိုၚ်ဒၟံၚ်ဏောၚ်။ ပ္ဍဲကဵုရုၚ်ဂဥုဲလေဝ် ဂၠိုၚ်ဒၟံၚ်တုဲ အသိၚ်ဍေံသ္ကာတ်ဟာဟီုမ္ဂး သ္ကာတ်ဒၟံၚ်ဏောၚ်။ ကောန်ၚာ်တံလေဝ် ဒှ်ဂၠိုၚ်ဒၟံၚ်ရ။ ပ္ဍဲကဵုဗ္ဒမ်ဂဥုဲလွဳ ကောန်ၚာ်တံဂှ်လေဝ် ကောန်ၚာ်တံဂှ် ပေၚ်က္ဍတ်ဒၟံၚ်ဟဂှ်ရ။ ပ္ဍဲကဵုရုၚ်ဂဥုဲဂှ် အ္စာ၊ အ္စာၝောံ ဟွံရုမ်ဂပ်ပုဟ်။ ဟွံရုမ်ဂပ်တုဲ ပ္ဍဲကဵုရုၚ်ဂဥုဲဂှ်လေဝ် သီဂိုၚ်ဟွံအိုတ် ဒှ်ကၠုၚ်ရ” သာ်ဝွံ အ္စာဂဥုဲမွဲတၠ ဟီုရ။
ယဲပုၚ်ဂှ်ဝွံ က္တဵုဒှ် ပ္ဍဲအခိၚ်ကသီုဂၠိုၚ်တုဲ ဒှ်ယဲကၠောံထၞာန်ကၠုၚ် နူကဵုဇၟိတ် အေဒဳ(သ်) မဍတ်ပါ်ကၠုၚ် နူကဵုဍာ်သ္အးသ္အးဇ္ၚးဇ္ၚးတံဂှ်ရ။
မၞိဟ်က္တဵုဒှ်ယဲပုၚ် ဗွဲမဂၠိုၚ်ဂှ်ဝွံ ကောန်ၚာ်သၟတ် နူအာယုက် (၅) သၞာံ စဵုကဵု (၉) သၞာံတံ က္တဵုဒှ်ဂၠိုၚ်ဒၟံၚ်တုဲ ဟိုတ်နူယဲသ္ကာတ်မြဟ်နွံဒၟံၚ်ဂှ်ရ ယဝ်ရဟွံလွဳဗွဲမဂတာပ်အခိၚ်မ္ဂး လမျီုဒးဆောံလေၚ်တံ သၠုၚ်တိုန်မာန်ဏောၚ်ဂှ် အ္စာဂဥုဲတံ သ္ၚဳဂၠိပ်လဝ်ရ။
အခိၚ်လၟုဟ်ဂှ်လေဝ် ကောန်ၚာ်သၟတ်တံဝွံ မ္ၚးနူဒှ်ယဲပုၚ်ဂှ် သီုကဵုဒှ်ဒၟံၚ် ယဲကသအ်ဂုဟ်တံဂှ်တုဲ ဒှ်ဒၟံၚ်အကာဲအရာဒးဂွိၚ်ကၠုၚ်တုဲ ယဝ်ရဒှ်ကၠုၚ်သီုၜါမ္ဂး ပ္ဍဲကဵုကောန်ၚာ်တံဂှ် အန္တရာယ်လမျီုသာတုဲဂၠိုၚ်ကၠုၚ်ဏောၚ်ဂှ် အ္စာဂဥုဲမွဲတၠ ဟီုရ။
“သၞာံဏံဂှ် မ္ၚးနူယဲပုၚ်ဂှ် ယဲကသအ်ဂုဟ်လေဝ် ပါဒၟံၚ်ကီုဏောၚ်။ ဒှ်သီုခ္ဍက်၊ ဒးချာံတုဲ သ္ကာတ်တ်မြဟ်ဟ်ဂှ်ဒှ်ဒၟံၚ်ရ။ ဒးဂွိၚ်ဟာဟီုမ္ဂး ဒးဂွိၚ်ဒၟံၚ်ဏောၚ်။ ကောန်ၚာ်တံ နူကဵုမြဟ်ဟ်မြဴမြဴ ခိုဟ်ဟ်ဂှ် ယဲပုၚ်လေဝ် ဒှ်ဒၟံၚ် positive ကီုဏောၚ်။ ယဲပုၚ်ဂှ် ဟွံသ္ကာတ်မြဟ်မွဲသာ် ချိုတ်အာ နကဵုယဲကသအ်ဂုဟ်ဂှ်လေဝ် ချိုတ်ဒၟံၚ်ဏောၚ် ဟီုဒၟံၚ်ဗီုဏံရ။ ယဲပုၚ်ဓမ္မတာဏံမ္ဂး ခ္ဍက်၊ ဒးချာံဂှ် ဍေံဟွံဒှ်မွဲစွံပုဟ်။ ဇကုဂမ္တဴ၊ ဒှ်ဍံက်က်ဍေန်န်၊ ထ္အအ်၊ ကောန်ၚာ်ဂှ်သၠိၚ်ၚ်ၚုဟ်ဟ်တံဂှ် ဒှ်လက္ချန်ဍေံရ။ လက္ချန်စပ်ကဵုယဲကသအ်ဂှ် ဟွံပါစအှ်ေပုဟ်။ လဆောဝ်လဆောဝ်တှ်ေ တောဲဒှ်စလေပ်ရ။ ဆ္ဂး သၞာံဏံဂှ် တောဲဒှ်ကဵုယဲကသအ်ဂုဟ်ဏံမ္ဂး ကောန်ၚာ်တံဂှ် သာတုဲအန္တရာယ်ဂၠိုၚ်ဏောၚ်။ ခ္ဍက်၊ ဒးချာံလေဝ် ဂၠိုၚ်ဏောၚ်။ ကောန်ၚာ်ဒှ်သီုယဲပုၚ်တံဂှ်ဟီုမ္ဂး သာတုဲအန္တရာယ်ဂၠိုၚ်” ဂှ် သ္ဂးရ။
ယဲကသအ်ဂုဟ် မဒှ်ဒၟံၚ်မွဲစွံကဵု ယဲပုၚ်ဂှ်ဝွံ ဒှ်စၟယဲတၟိ ယဲကသအ်ဂုဟ်ဓမ္မတာတံမွဲဂကူလေဝ် ဒှ်မာန်တုဲ မဗဳဇကဝ်ဝေဒ်တၟိမွဲဂကူလေဝ် ဟီုမာန်ကီုလေဝ် ဟိုတ်နူစက်စၟဳတ်စမ်ၜတ်တံ ဟွံမွဲဂှ်ရ တီကေတ် ချိုတ်တ်ပၠိုတ်တ် ဟွံမာန်ပုဟ်ဂှ် ညးဆက်ဟီုရ။
အခိၚ်လၟုဟ်ဂှ်ဝွံ ဟိုတ်နူဒှ်ဒၟံၚ်ရာသဳယဲပုၚ် က္တဵုဒှ်ဂၠိုၚ်ဂှ်ရ ကောန်ၚာ်တံ ယဝ်ရမံၚ်စပရေံကၠုၚ်မ္ဂး သွက်ဂွံထ္ၜးရုၚ်ဂဥုဲ၊ ဗ္ဒမ်ဂဥုဲ ကြပ်ပ်တံဂှ် နွံပၟိက်တုဲ ယဝ်ရဟွံလွဳလွတ် ဗွဲမဂတာပ်အခိၚ်မ္ဂး ယဲဂှ်က္ဍၚ်ကၠုၚ်တုဲ ဒဵုကဵုလမျီုအိုတ် က္တဵုဒှ်မာန်ဂှ်ရ သွက်ဂွံစွံသတိဗွဲတၟေၚ်အိုတ်ဂှ် အ္စာဂဥုဲဂမၠိုၚ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−TLT/CJ
sanlontai