ကၠာပေါဲသဳကၠဳကဆံၚ်လ္တူ ကိုဝ်ရဳယျာသၠုၚ်ကျာကဵု ဂျပါန်တံ ဂွိုအ်စိုပ်ဏီ ကိုဝ်ရဳယျာသၟဝ်ကျာ ပန်ဗလးကမ်လှောဝ်

ပျုၚ်ယာန်၊ ဂျူလာၚ် (၁၃)

က္ဍိုပ်သ္ကိုပ်ကိုဝ်ရဳယျာသၠုၚ်ကျာ ကေုာံ က္ဍိုပ်သ္ကိုပ်ဂျပါန်တံဝွံ ပ္ဍဲကဵုကောံဓရီုကဆံၚ်လ္တူနေတိုဝ်တံဂှ် သွက်ဂွံသဳကၠဳ ပရေၚ်ဘပဠဍုၚ်သ္အာၚ်တံ သီုကဵုကိုဝ်ရဳယျာသၟဝ်ကျာ မပိုၚ်ပြဳလဝ် လွဟ်လက်နက်နျူကလဳယျာတံဂှ် စဳဇန်လဝ်ဂှ်ရ ကိုဝ်ရဳယျာသၟဝ်ကျာဂှ် ပ္ဍဲဂိတုဂျူလာၚ် (၁၂) တေံ ကၠောန်သ္ပပန်ဗလးလဝ် ကမ်လှောဝ်ဍေံ မခယျဂွံ ကမ်လှောဝ်ပန်ပှော်အကြာတိုက် (ICBM) ဂှ်ရ။

ကိုဝ်ရဳယျာသၟဝ်ကျာဝွံ က္ၜၚ်ကျာထံၚ်ပရိုၚ်အမေရိကာန်ဂမၠိုၚ် ဒဒှ်ရလုပ်စိုပ်ဖံက်ပ္ကဝ်လဝ် ပ္ဍဲကဵုတွဵုဒၞက် အပ္ဍဲဒေသအပိုၚ်အခြာပရေၚ်ပိုန်ဒြပ်ဍေံတံဏောၚ်ဂှ် စောတ်စောဲလဝ်ရ။ က္ၜၚ်ကျာဗၠိုပ်ဍာ် ဖ္ဍိုက်ပ္တိုန်ကမ်လှောဝ်ခရုသ် မသုၚ်စောဲလဝ်ဇြဟတ်ဓာတ်နျူကလဳယျာအမေရိကာန်ဂှ် အာစိုပ်ဂေတ်ဝေၚ်လဝ် ကိုဝ်ရဳယျာသၠုၚ်ကျာ ခြာဟွံလအ်ဂှ်လေဝ် ပ္တိုန်ဒုဟ်ဗျိပၠုတ်ဟီုဂးလဝ်ရ။

ကိုဝ်ရဳယျာသၟဝ်ကျာ ကလေၚ်ခၠေဝ်အာ လ္တူပွသာ်ဏံဏောၚ် ကဵုကတိတုဲဂှ် ဗလးပ္တိုန်လဝ် ကမ်လှောဝ်သာ်ဏံရ။

ကမ်လှောဝ် သံသယနွံဒၟံၚ် ဒှ်ကမ်လှောဝ် ICBM မာန်ဂှ်ဝွံ ပဝ်ယာန်လဝ် လလအ်ပွိုၚ် (၇၄) မိနေတ် သမၠုၚ်ပေ (၆၀၀၀) ကဳလောမဳတာကဵု ခြာဇမ္ၚောဲ (၁၀၀၀) ကဳလောမဳတာဂှ်ဂးတုဲ ဝန်အပ္ဍဲဂကောံအလဵုအသဳဂျပါန် ဟဳရိုဝ်ကာသူမာတ်သူနဝ်ဂှ် ပ္ဍဲကဵုကမ်လှောဝ် ကိုဝ်ရဳယျာသၟဝ်ကျာတံပန်ဗလးလဝ်ဂမၠိုၚ်ဂှ် မဏံဝွံ ဒှ်အခိၚ်ပဝ်ယာန်လအ်အိုတ်ရောၚ် ဟီုဂးလဝ်ရ။

ကမ်လှောဝ်ဝွံ ဒတုံစှ်ေ ပ္ဍဲကဵုခြာဇမ္ၚောဲ နူကဵုဗၟံက်တ္ကအ်ကိုဝ်ရဳယျာ (၅၅၀) ကဳလောမဳတာနွံမာန်ရောၚ်ဂှ် ဂကောံဒပ်မၚ်မွဲပြၚ်ၜဳဂျပါန်တံ ချိၚ်ခယျလဝ်အိုတ်ရ။

ပ္ဍဲကဵုဂိတုဨပရဴဂှ် ကိုဝ်ရဳယျာသၟဝ်ကျာဝွံ စမ်ၜတ်ဗလးပ္တိုန်လဝ် ICBM ဍေံ အလန်ပထမကၠာအိုတ်တုဲ ပၞောဝ်ကဵုပရေၚ်စမ်ၜတ် ကမ်လှောဝ်မွဲဒါဇြိန်ပြၚ် အပ္ဍဲသၞာံဏံဂှ် ဒှ်မွဲလေဝ် မဒှ်ရ။

ကမ်လှောဝ်ပန်ပှော်အကြာတိုက် ကိုဝ်ရဳယျာသၟဝ်ကျာဂှ်ဝွံ သွက်ဂွံဗ္တိုက်ဒၞါဲပွန် ပ္ဍဲကဵုကၟိန်ဍုၚ်အမေရိကာန် ဒၞါဲလဵုဟွံဟီု ပဝ်ယာန်မာန်ရောၚ် ညးလ္ၚတ်ဂမၠိုၚ် ပတှ်ေစှ်ေစိုတ်တုဲ သ္ဇက်ဂွံခၞံဗဒှ် မကမ်နျူကလဳယျာ မလေပ်စုတ်တဴ ပ္ဍဲကဵုကမ်လှောဝ်တံဂှ်လေဝ် နွံဒၟံၚ်ဂှ် သ္ဂးအိုတ်ရ။

သၞာဲဒဴ နူကဵု Asian Institute for Policy Studies မွဲတၠဂှ်လေဝ် ပ္ဍဲဂိတုမေတေံ ကြဴနူကိုဝ်ရဳယျာသၟဝ်ကျာ ဗလးပ္တိုန် ဂြိုဟ်ပ္တောံထံၚ်ပရိုၚ်ညးတံ အလန်ကိုပ်ကၠာအိုတ်တုဲ ဟွံအံၚ်ဇၞးတုဲဂှ် ကလေၚ်ဂ္စါန်ကၠုၚ် သွက်ဂွံဟံၚ်သိက္ခာလေဝ် ဒှ်မာန်ရောၚ် ဟီုဂးလဝ်ရ။

ပ္ဍဲကဵုကောံဓရီုနေတိုဝ်ကဆံၚ်လ္တူ မကၠောန်ဗဒှ်ဒၟံၚ် ပ္ဍဲကဵုဍုၚ်လေတ်တူနဳယျာဂှ် သမ္မတကိုဝ်ရဳယျသၠုၚ်ကျာ ယောန်သက်ယောဂှ် သွက်ဂွံသဳကၠဳ ပရေၚ်ပန်ဗလးကမ်လှောဝ်တံဂှ် ကော်လဝ် ကောံဓရီုကံၚ်ဇြဳဂီုကၠီုကောန်ဂကူ ကာတၟေၚ်တုဲ တၞဟ်နသ္ဂောံဆေၚ်မုက် ကုပရေၚ်ဘပဠတံဏံဂှ်လေဝ် သွက်ဂွံအာတ်မိက် ပရေၚ်ကောံကလောံညဳသာဍုၚ်သ္အာၚ်တံ ဗိုန်န်ဂှ် သုၚ်စောဲအာ ကောံဓရီုကဆံၚ်လ္တူဏံဏောၚ်ဂှ် ကဵုလဝ်ကတိရ။

“ပွမဂၠါဲသၞသာ်ဏံတံဂှ် ပိုယ်တံ ပါဲဟွံဗၠးပုဟ်၊ အရာမခၠေဝ်ပၠန် သ္ကာတ်တ်မြဟ်ဟ် နူကဵုဍုၚ်သ္အာၚ်တံကဵု နူကဵုပရေၚ်ညဳသာကောံကလောံတံဂှ် မ္ဒးခၠေဝ်ပၠန်အာ ကုပြဝကိုဝ်ရဳယျာသၟဝ်ကျာတံဏောၚ်” ဂှ် သမ္မတယောန် ဟီုဂးလဝ် နူကဵုရုၚ်ညးမွဲကဆံၚ်ရ။

ပွမပန်ဗလးကမ်လှောဝ်သာ်ဏံဂှ်ဝွံ ဘပဠဒၟံၚ် ပရေၚ်ၜိုဟ်လလမ် ကေုာံ ပရေၚ်ညိၚ်ဝတ် အပ္ဍဲဒေသကဵု ဍုၚ်သ္အာၚ်တံဂှ်တုဲ ဒဒှ်ရဂျပါန် ဒစဵုဒစး ဂၠံၚ်တရဴကလုတ်တမာန် မၞုံဗေကျေန်တံဂှ်လေဝ် သ္ကိုပ်ဝန်ဇၞော်ဂျပါန် မာတ်သူနေဝ် ဟီုဂးလဝ်ရ။

Ref: Reuters