ညံၚ်ညးကၠုၚ်စိုပ်အခန်ကၞာပ္တိုန်စရာဲ တ္ၚဲအာဇာနဲတအ် ဟွံဂွံကေတ်နၚ် ကပေါတ် (၁၀)ဂကူ ပါလုပ်သီုဖုၚ်ဂှ် ကံၚ်ဇြဳပၞာန် တာဒၞာလဝ်

နေပျဳဒဝ် – ဂျူလာၚ်(၁၄)

နကဵုညးကၠုၚ်စိုပ် ဒၞာဲဌာန်ကၠောန်ဗဒှ် အခန်ကၞာတ္ၚဲအာဇာနဲ မရနုက်ကဵု (၇၆)ဝါ ကၠုၚ်စိုပ် ပ္ဍဲဂိတုဂျူလာၚ် စၟတ်တ္ၚဲ (၁၉)ဏံ ညံၚ်ဟွံဂွံကေတ်နၚ် ကပေါတ် (၁၀)ဂကူ ပါလုပ်သီုဖုၚ်တဲဂှ် ဓမံက်လဝ် ပ္ဍဲမဳဒဳယာတြးဝါဒကံၚ်ဇြဳပၞာန်ရ။

ပ္ဍဲတ္ၚဲအာဇာနဲဂှ် နကဵုညးကၠုၚ်စိုပ် ပ္ဍဲလွဳမာန်အာဇာနဲ၊ ရုၚ်ဝန်အပ္ဍဲ ကေုာံ တိုက်ထ္ၜးပျးဂအုပ်ဗိုလ်အံၚ်သာန်တအ်ဂှ် ဟွံကဵုအခေါၚ်ကေတ်နၚ် ဖုၚ်တဲ၊ ထိုၚ်ခွက်၊ ကမ္မရာ၊ ဇၟန်ပ္ကဴ၊ စန်ပ္ကဴ၊ အလာံ၊ ပၟတ်ခရက်၊ ဗဳနိုၚ်၊ ပလၚ်-ဍေၚ်ဗူ၊ ကၞေဟ်မှၚ် ကေုာံ လေံနာနာရဂှ် ဟီုသ္ဂးလဝ်ရ။

ပ္ဍဲတ္ၚဲအာဇာနဲသၞာံဏံ ပလေဝ်ပလေတ်ဒၟံၚ် သွက်ဂွံကၠောန်ဗဒှ်အခန်ကၞာ ဗလးအလာံကၟိန်ဍုၚ်ကဝက်တိုၚ်အလာံ ပ္ဍဲတိုက်ထ္ၜးပျးဂအုပ်ဗိုလ်အံၚ်သာန် ကေုာံ ရုၚ်ဝန်အပ္ဍဲတအ်တုဲ ပ္ဍဲကဵုရုၚ်ဍိုပ်ဍဴသာယျာ ဍုၚ်လဂုၚ်ဂှ်လေဝ် ဗ္ဂိန်ကဵုအာဒါန်ပိဏ္ဍပါတ်ရောၚ်ဂှ် ဂွံတီကေတ်ရ။

မ္ၚးနူဂှ်ပၠန် နဒဒှ်စၟတ်သမ္တီ တ္ၚဲအာဇာနဲ ပလေဝ်ပလေတ်လဝ် ညံၚ်ဂွံထ္ၜးပျးတၟေၚ်တၟဟ် ပ္ဍဲတိုက်ထ္ၜးပျး ဂအုပ်ဗိုလ်အံၚ်သာန်မာန်တုဲ ပ္ဍဲဂိတုဂျူလာၚ် စၟတ်တ္ၚဲ (၁၉)ဂှ် ကဵုအာအခေါၚ်လုပ်စိုပ် ပ္ဍဲတိုက်ထ္ၜးပျး ဂအုပ်ဗိုလ် မၞုံပ္ဍဲဂၠံၚ်နာတ်မောက် ဗွဲမသက္ကုၚုဟ်မးရောၚ်ဂှ် ဌာနက္ဍိုက်က္ဍိုပ်သုတေသနတြေံတြဟ် ကေုာံ တိုက်ထ္ၜးပျးကောန်ဂကူ ကံၚ်ဇြဳပၞာန် လလောၚ်တြးလဝ်ရ။

အခိၚ်လၟုဟ်ဏံဂှ် သွက်ဂွံကၠောန်ဗဒှ်တ္ၚဲအာဇာနဲဂးတုဲ သိုၚ်ဗဒှ်လဝ်ဗာန်ကာ ပ္ဍဲမွဲဗွိုၚ် ဗ္ဒာဲရုၚ်ဝန်အပ္ဍဲ ကံၚ်ဇြဳပၞာန်တုဲ သၠုၚ်ပ္တိုန်လဝ် ရေၚ်ဂီုကၠီုရဂှ် ဂွံတီကေတ်ရ။

ပ္ဍဲလက်ထက်တၠအဝဵုတြေံ ဥူတာန်ယှိုဲကၠာတေံဂှ် ၜိုန်ရဒဝ်အံၚ်သာန်သုကျဳ ညးမဒှ်ကောန်ဝုတ်ဂအုပ်ဗိုလ်အံၚ်သာန် ဂွံအခေါၚ်တိုန်စိုပ် အခန်ကၞာအာဇာနဲကီုလေဝ် ပ္ဍဲလက်ထက်တၠအဝဵုလၟုဟ်ဏံဂှ်မ္ဂး သ္ပတံနူ သၞာံ ၂၀၂၁ တုဲ ဒးဒုၚ်ကၟာတ်လဒဵုလဝ် အခေါၚ်တိုန်စိုပ်အခန်ကၞာအာဇာနဲရ။

ပရိုၚ်သြၚ်လောန်တိုၚ်(မ်)

ဗီုရုပ် – ဗီုရုပ်တြေံ