ကွာန်ပျူသဝ်ထဳ ပ္ဍဲပေါက် ပ.က.ဖ တအ် လုပ်ဗတိုက်လဝ်

ပေါက် -ဂျူလာၚ်(၁၄)

ရးဒေသမဂွေ၊ ကွာန်ပျူသဝ်ထဳ မၞုံပွိုၚ်ဍုၚ်ပေါက်ဂှ် ဒပ်စဵုဒၞာညးဍုၚ်ကွာန်တအ် လုပ်စိုပ်ဗတိုက်လဝ်တုဲ စံၚ်ပလီုဏာလဝ်ကွာန်ရဂှ် ပ.က.ဖ မျာၚ် လလောၚ်ပ္တိတ်လဝ် ပရိုၚ်ရ။

ဂိတုဂျူလာၚ် စၟတ်တ္ၚဲ (၁၁) တုဲကၠုၚ်တေံ အခိၚ်နူဂယးဂှ် လုပ်စိုပ်လဝ် ကွာန်ပျူ တပ်ကုမ်-ယွာတေတ် ပွိုၚ်ဍုၚ်ပေါက်တုဲ ကောန်ပၞာန် ကေုာံ ပျူသဝ်ထဳတအ် ဇီုကပိုက်ဒးချိုတ်လဝ် နွံရ။

“နူတနေံတေံ အခိၚ်နူဂယးဂှ် လုပ်ဗတိုက်လဝ်။ လ္ပာ်ဍေံတအ် ဇီုကပိုက်ဒးလဝ် ဂၠိုၚ်ဒၟံၚ်။ ကောန်နာဲပေါက်ဂှ် ပ္တိတ်ကဵုလွဟ်ဏောၚ် ဟီုလဝ်တုဲ ပန်ပသောၚ်မာန်လဝ် ပျူသဝ်ထဳဒးရပ်ဒၟံၚ်တံဒုန် ဗူလေတ်လှသွေကဵုလဝ်ဂှ်ရ” ဂှ် ညးတာလျိုၚ် ပ.က.ဖ မျာၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ၊

အခိၚ်ပန်ပှ်ောဗတိုက်လဝ်ဂှ် လ္ပာ်ကံၚ်ဇြဳပၞာန် မၞိဟ်ဂြိပ်တိတ်ဂၠိုၚ်တုဲ ကောန်ဒပ်ပရေၚ်စဵုဒၞာတအ် သီဂွံကွာန် စံၚ်ပလီုလဝ်တုဲဂှ် ဟိုတ်နူပၞာန်ကျာရီုပန်တုဲ ကောန်ဒပ်ကံၚ်ဇြဳပၞာန်ကဵု ပျူသဝ်ထဳတအ် ပရေၚ်ဇီုကပိုက်ဒးလဝ် နွံရဂှ် ညးဟီုလဝ်ဏီရ။

အခိၚ်ဒှ်ဒၟံၚ်ပေါဲဗတိုက်ကဵု အခိၚ်ပေါဲဗတိုက်ဒှ်တုဲဂှ်လေဝ် ဟိုတ်နူဒပ်ကံၚ်ဇြဳပၞာန် ပ္ဍဲဍုၚ်ပေါက် ပန်ဖျေံနၚ်လွဟ်ဇၞော် ၁၂၀-မမ တုဲ ပရေၚ်ဇီုကပိုက်ဒးပြေၚ်ဂၠဴ ၜိုန်နွံကီုလေဝ် ဟိုတ်နူသ္ဂံၚ်ဒပ်စဵုဒၞာညးဍုၚ်ကွာန်တအ်တုဲ ကောန်ပၞာန်(၅)တၠ ကေုာံ ပျူသဝ်ထဳ(၂၃)တၠ ဒးချိုတ်လဝ်ရဂှ် ဂွံတီကေတ်ရ။

သ္အာၚ်နူဂှ်ပၠန် ညးဍုၚ်ကွာန် (၇)တၠ ကံၚ်ဇြဳပၞာန်ကဵု ပျူသဝ်ထဳတအ် ရပ်ကေတ်လဝ် နူလောန်ကၠုၚ် ၜိုတ် (၁၀)တ္ၚဲတေံဂှ်လေဝ် ရီုပ္တိတ်လဝ်မာန်တုဲ လ္ပာ်ဒပ်ပရေၚ်စဵုဒၞာ ဇီုကပိုက်ဒးလဝ်ဘဲဝပ် ဟွံဒးဒှ်ဓဝိၚ် (၃)တၠရဂှ် ဂွံတီကေတ်ရ။

ပရေၚ်ချဳဒရာၚ်ပၞာန်ဏံ ဒပ် YRF ပွိုၚ်ဍုၚ်ပေါက်၊ PDF ခရိုၚ်ပခုက္ကူ တံဒပ်(၁၁/၁၈)၊ ဂကောံ PKU Earthquake၊ ပ.က.ဖ ပေါက်၊ ဂကောံစဵုဒၞာကွာန်ပေါက်၊ ပ.က.ဖ မျာၚ် တံဒပ်(၃) ဒပ်လ္ပာ်(၂၊ ၄) ဒပ်စြေက် သ္အာၚ်နူဂှ် ဒပ်ဒမၠုက်ဍုၚ်ဇၞော်ပခုက္ကူတအ် ပံၚ်တောဲ ချဳဒရာၚ်လဝ်တုဲ သီဂွံလဝ်လွဟ်ကၠောန် (၇)ဒကိုအ်ရဂှ် ဂွံတီကေတ်ရ။

ပရိုၚ်-သြၚ်လောၚ်တိုၚ်(မ်)

ဗီုရုပ် – ပ.က.ဖ မျာၚ်