ပ္ဍဲထဝါဲ ကွဳစက်ပၞာန်မွဲဖ္ဍိုက် ဒးဒုၚ်ဗတိုက်တုဲ ပါလုပ်သီုဒုအရန်ဗိုလ် ဒးချိုတ်လဝ် ၃ တၠ

ထဝါဲ၊ ဂျူလာၚ်(၁၄)

ရးဒေသဇၞော်တၞၚ်သြဳ၊ ပွိုၚ်ဍုၚ်ထဝါဲ၊ ကွာန်ဇဟာ၊ ပ္ဍဲဂၠံၚ်ကွဳစက်ထဝါဲ-ရေဝ်ဂှ် ဟိုတ်နူကွဳစက်ကံၚ်ဇြဳပၞာန်မွဲဖ္ဍိုက် ဒးဒုၚ်ကြတ်ဗတိုက်လဝ်တုဲ ပါလုပ်သီုဒုအရန်ဗိုလ် ဒးချိုတ်လဝ် (၃) တၠရဂှ် ဂကောံပၠန်ဂတး ဒပ်ဒမၠုက်ထဝါဲ DGRF ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဂိတုဂျူလာၚ် စၟတ်တ္ၚဲ (၁၂) တုဲကၠုၚ်တေံ အခိၚ်ဗ္တံ ၜိုတ် (၃)နာဍဳဂှ် ကွဳစက်ပၞာန်မွဲဖ္ဍိုက် တိတ်ကၠုၚ်နူဒပ်အမၠံက်ကံၚ်ဇြဳပၞာန် စၟတ် (၃၀၂) ဖျေံသ္ဇိုၚ်ထဝါဲဂှ် ဒပ်ပံၚ်ကောံ ဒပ်စဵုဒၞာဒေသတအ် ကြတ်ဗတိုက်လဝ်ရ။ 

ဟိုတ်နူကွဳစက်ပၞာန်ဒးဒုၚ်ကြတ်ဗတိုက်လဝ်တုဲ ကွဳစက်ဂှ် ထ္ပက်စှ်ေအာသ္ကဲဂၠံၚ်တုဲ သီုဒုအရန်ဗိုလ် မွဲတၠ ဒးချိုတ်လဝ် (၃) တၠတုဲ ဂွံလဝ်ဘဲဝပ် (၂)တၠရ။ 

အခိၚ်ဗတိုက်ပန်ပှော်တုဲ ၜိုန်ရပ္တိတ်လဝ်ဇြဟတ် သွက်ဂွံလပှ်ကေတ် လွဟ်လက်နက် နူကောန်ဒပ်ကံၚ်ဇြဳပၞာန်ကီုလေဝ် ဟိုတ်နူကြပ်ဒၟံၚ်ကဵု ဒပ်အမၠံက်တုဲ ကလေၚ်ဆုတ်တိတ်လဝ် သီုဟၟဲအန္တရာယ်ရဂှ် ညးတာလျိုၚ် ဒပ်ပၠန်ဂတး ဒပ်ဒမၠုက်ထဝါဲ DGRF မွဲတၠ ဟီုသ္ဂးလဝ်ရ။ 

နူပရေၚ်ပန်ပှော်တုဲဂှ် ကောန်ဒပ်ကံၚ်ဇြဳပၞာန်တအ် စိုပ်ကၠုၚ် ကပှ်ကေတ်ဏာဇွတုဲ ကွဳစက်ပၞာန် ထ္ပက်စှ်ေဒၟံၚ်သ္ကဲဂၠံၚ်ဂှ်လေဝ် ကၠုၚ်တံၚ်ကေတ်ဏာလဝ် ကဵုစက်ကရုၚ်ရဂှ် သ္ဂးလဝ်ရ။ 

ဟိုတ်နူကံၚ်ဇြဳပၞာန် ဒးဒုၚ်ကြတ်ဗတိုက်လဝ်တုဲ တာဲတာ နွံဗ္ဒာဲဂှ်လေဝ် ဒပ်ကံၚ်ဇြဳပၞာန်စံၚ်ပလီုဏာလဝ်ရဂှ် ဂွံတီကေတ်ရ။ 

သ္အာၚ်နူဂှ်ပၠန် ကောန်အရာပ်ညးဍုၚ်ကွာန် (၂) တၠဂှ်လေဝ် လ္ပာ်ကံၚ်ဇြဳပၞာန် ပန်ဂစိုတ်ဏာလဝ်ရဂှ် ၜိုန်ရလ္ပာ်ဂကောံ DGRF လလောၚ်တြးလဝ်ကီုလေဝ် ဒှ်ညးလဵုရောဂှ် နကဵုသြၚ်လောန်တိုၚ်(မ်) ဃောဆက်လ္ၚတ်ဂၠိုက်ဂၠာဲဒၟံၚ်ဖိုဟ်ရ။ 

ပ္ဍဲဂိတုဂျောန် စၟတ်တ္ၚဲ (၁၁)တုဲကၠုၚ်တေံလေဝ် သၞေဟ်ကၚ်စၟဳစၟတ်ကံၚ်ဇြဳပၞာန် မၞုံဂၠံၚ်လုပ်ဍုၚ်ထဝါဲဂှ် ဒးဒုၚ်ဗတိုက်လဝ်တုဲ ကောန်ဒပ်ကံၚ်ဇြဳပၞာန်လ္ၚဵုတအ် ဂွံလဝ်ဘဲဝပ်ဏီရ။ 

ပရိုၚ်-သြၚ်လောန်တိုၚ်(မ်)

ဗီုရုပ်-DRGF