တောၚ်ကုက် – ဂျူလာၚ်(၁၄)
နကဵုတၚ်စောတ်စောဲ ဆက်စပ်ဒၟံၚ်ကဵု ဒပ်ပၞာန်ရခေၚ် AA ညးဒေသပွိုၚ်ဍုၚ်တောၚ်ကုက် တွဵုရးရခေၚ်၊ (၆)တၠတအ်ဂှ် ကံၚ်ဇြဳပၞာန် ဖျေံကၠုၚ်ဒဏ်ထံၚ် နကဵုသၞောဝ်ဥပဒေဗတိုက်သရိုဟ်ပွပ္ကီုပရာပ် ၝောံပိုဒ် – ၅၂ (က) ပ္ဍဲဂိတုဂျူလာၚ် စၟတ်တ္ၚဲ(၁၁) (၄)သၞာံဇဳရဂှ် ဂကောံသ္ၚိကၟိန်အိန်ထံၚ်ညးတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ညးဒးဒုၚ်စောတ်စောဲ ဒးဒုၚ်ရပ်လဝ်တအ်ဂှ် အခိၚ်ရပ်ကေတ်လဝ် မုသက်သဳသာဓကဟၟဲမွဲသာ် ဖျေံလဝ်ဒဏ်ထံၚ်ရဂှ် ဟီုသ္ဂးလဝ်ရ။
“ရပ်ဂွံလဝ် ကပေါတ်ဖံက်ခတိုဟ်ဟီုတုဲ စောတ်စောဲလဝ် နွံရ။ အခိၚ်လၟုဟ်ဏံ AA ဂှ်လေဝ် နုက်ပါဲပ္တိတ်လဝ် နူဂကောံပ္ကီုပရာပ်တုဲယျ ဣဏံဂှ် မုဒှ် ဂွံဖျေံအသံဗီုဏံရော ပိုဲလေဝ် ကေတ်ဟွံဒးရ” ဂှ် ညးလုပ်ဂကောံသ္ၚိကၟိန်ညးတအ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ညးဒးဒုၚ်ဖျေံဒဏ်ထံၚ်တအ်ဂှ် ဒှ်ကိုဝ်တာန်နိုၚ်၊ ကိုဝ်ဌေမောၚ်၊ ကိုဝ်ကျဝ်တေန်အောၚ်၊ ကိုဝ်နေယျေဝ်ဝေန်၊ ကိုဝ်မောၚ်ကျဳ ကေုာံ ကိုဝ်မောၚ်ၚေဝ်တအ်တုဲ ညးတအ်သီုညးဖအိုတ်ဂှ် ဒှ်ညးဒေသတောၚ်ကုက်ရဂှ်ဂွံတီကေတ်ရ။
သီရုပ်ကဵုဂဗုတ်တအ်တုဲ သွက်ဂွံကလေၚ်ဗလးပ္တိတ်ကဵု ညးဒးဒုၚ်ရပ်လဝ်တအ်ဂှ်ကီု သီုသွက်ဂွံစၟဳစၟတ် ဗွဲမကိတ်ညဳကဵု ပရေၚ်တၟော်ဗ္စာပရေၚ်မၞိဟ်ဂှ်လေဝ် ညးလုပ်ဂကောံကၟိန်အိန်ထံၚ်ညးတအ် အာတ်မိက်လဝ်ရ။
ပ္ဍဲသၞာံ ၂၀၂၀ ဂိတုဨဗြဴ ကဵု ဂိတုဂျောန် လောန်ကၠုၚ်တုဲတေံဂှ် ဒပ် ခ.လ.ရ – ၅၁ စိုပ်ကၠုၚ် နကိစ္စပရေၚ်ချဳဒရာၚ်ပၞာန် ပ္ဍဲပွိုၚ်ဍုၚ်တောၚ်ကုက်ဂှ် လုပ်စိုပ်ရပ်ကေတ်လဝ်ညးတအ် ပ္ဍဲသ္ၚိဒၟံၚ်တုဲ ညးနွံယၟုဗိုလ်ဇၞော်အောၚ်ဝေယာန်ဂှ် သ္ပမၞိဟ်တေၚ်ဂဗုတ်တုဲ စောဲလဝ်ဂဗုတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ
sanlontai