နေပျဳဒဝ် – ဂျူလာၚ်(၁၄)
ပၞောဝ်ကဵုဂဗုတ်စောတ်စောဲလဝ် သမ္မတကၟိန်ဍုၚ် ဥူဝေန်မျေတ်ကဵု ဒဝ်အံၚ်သာန်သုကျဳတအ်ဂှ် ဂဗုတ်အဂတိ (၅)ဂဗုတ် ဆက်စပက်ကဵု ပရေၚ်လိၚ်၊ ရာန်ကေတ်လဝ် က္ၜၚ်ကျာသၞေၚ်ဝဲဂှ် စၟဳစၟတ်လဝ် ပ္ဍဲဌာန်ဂအုပ်ကၠတ်ထဝ်သၞောဝ်ဓဝ်ရဂှ် ညးစုက်လုက်ကဵု ရုၚ်သၞောဝ်ဓဝ်တအ် ဟီုကဵု ဌာန်ပရိုၚ်သြၚ် လောန်တိုၚ်(မ်)ရ။
စၟဳစၟတ်လဝ် ပ္ဍဲဂိတုဂျူလာၚ် စၟတ်တ္ၚဲ (၁၂) တုဲကၠုၚ်တေံတုဲ နာဲဗ္စာပါဗက်ရေၚ်တၠုၚ်ကဵုဒၟံၚ်ဂဗုတ် လ္ပာ်ဒဝ်အံၚ်သာန်သုကျဳတအ်ဂှ် တၚ်စောတ်စောဲတအ်ဂှ် ဟိုတ်နူဟွံဗဗွဲဗက်ကဵု သၞောဝ်ဥပဒေဂှ်ရ သွက်ဂွံဗလးကဵု နဒဒှ်ဟၟဲကဵုဒုဟ်ဒဏ်ဂှ် က္လေၚ်ခၠေဝ်သှ်လဝ်တုဲ လ္ပာ်ကံၚ်ဇြဳပၞာန်ဂှ် ဗလးကဵုဟွံထေက် ပုဟ်ဂှ် က္လေၚ်ဆေဝ်ဒဝ်လဝ်ရ။
အခိၚ်လၟုဟ်ဏံ စပ်ကဵုဂဗုတ်တောဲ တိုန်ဒၟံၚ်တၚ်ဂရၚ်ပ္တီ ကေုာံ တၚ်ဂရၚ်ပ္တီတၟေၚ်တအ်ဂှ်တုဲ ဟိုတ်နူနွံဒၟံၚ် ပၟိက် သွက်ဂွံသဳကၠဳ ကုတၠဂဗုတ်နွံဒၟံၚ်ဂှ်ရ ၜိုန်ရဂကောံနာဲဗ္စာတအ် အာတ်မိက်လဝ် သွက်သ္ဂောံက္လိဂွံ အခေါၚ်ဆဵုဂဗ ကုသမ္မတကၟိန်ဍုၚ် ကေုာံ ညးကဵုကသပ်ကၟိန်ဍုုၚ် ဒဝ်အံၚ်သာန်သုကျဳ ညးမဆေၚ်စပ် တအ်ဂှ်ကီုလေဝ် ကံၚ်ဇြဳပၞာန် ဒုၚ်လဝ်တဲဟၟဲဏီရဂှ် ညးစုက်လုက်တအ် ဟီုသ္ဂးလဝ်ရ။
ဂဗုတ်လ္ပာ်ကံၚ်ဇြဳပၞာန်စောတ်စောဲလဝ်တအ်ဂှ် ပ္ဍဲလက်အလဵုအသဳ NLD သွက်ဂွံကၠောန်ရေၚ်တၠုၚ် ကမၠောန်ရီုဗၚ်ဟံၚ်ပြာ်ဂှ် ပ္ဍဲကိစ္စရာန်ဂၠေံကေတ်လဝ် က္ၜၚ်ကျာသၞေၚ်ဝဲ ကေုာံ ကိစ္စပလေဝ်ပလေတ် ထိၚ်ဒဝ်တအ်ဂှ် ဗက်လဝ်အဂတိဂးတုဲ ကံၚ်ဇြဳပၞာန် ဖျေံလဝ်ဒဏ်ထံၚ် ပွိုၚ်(၇)သၞာံရ။
စပ်ကဵုတၚ်စောတ်စောဲတအ်တုဲ သမ္မတဥူဝေန်မျေတ်ကဵု ဒဝ်အံၚ်သာန်သုကျဳတအ်ဂှ် ဒုဟ်ဒဏ်ဟၟဲ ပုဟ်ဂှ် အခိၚ်တိတ်ဟီုလဝ် ပ္ဍဲအခိၚ်ပ္တိတ်ရုၚ်စၟဳစၟတ် ပ္ဍဲရုၚ်သၞောဝ်ဓဝ်အချုက်ထံၚ် နေပျဳဒဝ်ရဂှ် ဂွံတီကေတ်ရ။
သ္အာၚ်နူဂှ်ပၠန် ဒုသမ္မတ ဥူဟေန်နရဳဗာန်ထဳယူလေဝ် စပ်ကဵုဂဗုတ်ဏံတုဲ သမ္မတကၟိန်ဍုၚ်ကီု သီုကဵုညးကဵုကသပ်ကၟိန်ဍုၚ် ဒဝ်အံၚ်သာန်သုကျဳတအ်ဂှ် ရေၚ်တၠုၚ်လဝ် အတိုၚ်စေဝ်ပၞောန်သၞောဝ်ရဂှ် ကၠုၚ်တိတ်ဟီုလဝ် နဒဒှ်သက်သဳရဂှ် ညးစုက်လုက်မွဲတၠ ဟီုသ္ဂးလဝ်ရ။
ပၞောဝ်ကဵုဂဗုတ်လ္ပာ်ကံၚ်ဇြဳပၞာန်စောတ်စောဲလဝ် ညးတာလျိုၚ်ကၟိန်ဍုၚ်ကဆံၚ်သၠုၚ်အိုတ် ၜါတၠတအ်ဂှ် ဂဗုတ်တိုန်ဒၟံၚ်တၚ်ဂရၚ်ပ္တီ ကေုာံ တၚ်ဂရၚ်ပ္တီတၟေၚ်တအ်ဂှ် သွက်ဂွံထပ်စၟဳစၟတ်အာ ပ္ဍဲဂိတုဂျူလာၚ် စၟတ်တ္ၚဲ (၁၈) ကၠုၚ်စိုပ်ဂတဏံ နွံဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
sanlontai