ဒုၚ်ဇြယိတ်၊ ဂျူလာၚ် (၁၄)
ဒုသ္ကိုပ်ဗၠာဲသၟိၚ် မျဵုသဳဟ နူကဵုဗ္ဒိုပ်ဗၠာဲသၟိၚ်ဒုၚ်ဇြယိတ်၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ်ဝွံ ပ္ဍဲဂိတုဂျူလာၚ် ၁၂ ဂှ် ဗ္ၜူအရက်တုဲ လုပ်ဇီုလဝ် နကဵုကွဳစက် မဍိုက်ကၠုၚ်ဂှ်ရ ညးဍုၚ်ကွာန်ကောန် အရာပ် (၅) တၠ ကလိဂွံလဝ်ဝပ်တုဲ ပါလုပ်လဝ်သီုကဵုကောန်ၚာ်မွဲတၠဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒုသ္ကိုပ်ဗၠာဲသၟိၚ် မျဵုသဳဟ ဗ္ၜူအရက်တုဲ မဒဳကၠုၚ်ကွဳစက် နူကဵုက္ဍိုပ်ဒဒန်သက်တိုၚ်တြေံဂှ်ဝွံ ကာလစိုပ် ဒုၚ်ဇြယိတ် အရာပ် (၃) လ္တူဂၠံၚ်ကွဳစက် လ္ဂုၚ်−မတ်မလီုဂှ် ဇီုဒးလဝ် ကွဳလိုန်ဓာတ် ကောန်ဝုတ်၊ ကောန်ဂၟာန်၊ ကောန်စဴ သ္ကိုပ်အုပ်ဓုပ်အရာပ် ဥူတာန်ဝေန် မဍိုက်ပါဗက်ကၠုၚ်ဂှ်ရ။
ကြဴနူသ္ကိုပ်အုပ်ဓုပ်အရာပ် ဥူတာန်ဝေန်စိုပ်ကၠုၚ်တုဲဂှ် ညးတံၜါတၠ အရေဝ်ဂၠိုၚ်ညးသ္ကအ်တုဲ ဒုသ္ကိုပ်ဗၠာဲသၟိၚ် မျဵုသဳဟဝွံ ပွမဒုၚ်ဂုဏ် လ္တူကောန်ဇာတ်သ္ၚိကၟိန်ညးတံလေဝ် ဟွံမွဲတုဲ ဖံက်ပန်သေနာတ် ဘပဠတုဲ ဒဳတိတ်အာလဝ်ကွဳစက်ဂှ် ဂွံတီကေတ်ရ။
ဒုသ္ကိုပ်ဗၠာဲသၟိၚ် မျဵုသဳဟ မဒဳတိတ်အာ ကွဳစက်ဂှ်ဝွံ ထပ်ဇီုဒး ညးဗြဴ (၂) တၠ မဒဳကၠုၚ် လ္တူဂၠံၚ်ဗ္ဒါဲကွာန် သာယာကုန်ဂှ်တုဲ ဒဳဓရိပ်ဏာလဝ်ကွဳစက်ညးရောၚ်ဂှ် ညးမစုက်လုက်ကဵု ဂြောဝ်ဂတာ ဒးဒုၚ်ဇီုကွဳစက်တံ ဟီုရ။
ဟိုတ်နူပရေၚ်ကွဳစက်ဇီုဂှ်တုဲ ညးဗြဴ (၂) တၠ မကလိဂွံလဝ်ဝပ်ဂှ်ဝွံ ဒၟါနူဝပ်ဂၠိုၚ်ဂှ်ရ ဒးပ္တိုန်လဝ်ရုၚ်ဂဥုဲ ဒုၚ်ဇြယိတ်တုဲ ကောန်ဇာတ် သ္ကိုပ်အုပ်ဓုပ် (၃) တၠဂှ် ကလိဂွံအာလဝ်ဝပ်ဇီုကပိုက်ဒးအာညိညရ။
လ္တူလၟေၚ်ဒဒှ် ကွဳစက်ဇီုဏံဂှ် ကံၚ်ဇြဳပၞာန် ကေတ်တာလျိုၚ် သောၚ်ကလးကဵု ဟွံမွဲတုဲ လ္ပာ်ဗၠာဲသၟိၚ်တံဂှ်လေဝ် ကေတ်လဝ်ဒုဟ် ကုဒုသ္ကိုပ်ဗၠာဲသၟိၚ် မျဵုသဳဟဂှ် ဟွံမွဲပုဟ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai