သွက်ဂွံကၠောန်ဗဒှ်ကောံဓရီုပရေၚ်ၜိုဟ်လလမ်ဂှ် ကံၚ်ဇြဳပၞာန် ကေုာံ RCSS တံ သဳကၠဳ

နေဗျဳဒဝ်၊ ဂျူလာၚ် (၁၄)

ကမ္မတဳပ္ညဳပ္ညပ် ထ္မံက်ရုပ်ရဴပရေၚ်ၜိုဟ်လလမ် ကေုာံ ပရေၚ်ညဳသၟဟ်ဂကူ (NSPNC) ကေုာံ ကံၚ်ဇြဳ ကလေၚ်ပ္တန်ရးသေံ (RCSS) တံ သဳကၠဳလဝ် ပရေၚ်သ္ဂောံကၠောန်ဗဒှ် ကောံဓရီုပရေၚ်ၜိုဟ်လလမ် ပ္ဍဲနေဗျဳဒဝ်ရောၚ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။

ပ္ဍဲဂိတုဂျူလာၚ် ၁၁ ကဵု ၁၂ တေံ ညးစၞး နူကဵုဂကောံသဳကၠဳပရေၚ်ၜိုဟ်လလမ်ကံၚ်ဇြဳပၞာန် ကေုာံ ညးအုပ်ကာလၟိဟ်(၁) သဝ်သာၚ်ၚေန်၊ ကေၚ်ကာဗော် သဝ်သံၚ်သာန် ကေုာံ ကမ္မတဳက္ဍိုက်ပ်ဗဟဵု သဝ်သာၚ်ဟာန် နူကဵုကံၚ်ဇြဳကလေၚ်ပ္တန်ရးသေံ (RCSS) တံ တိုန်စိုပ်သဳကၠဳလဝ်အိုတ်ရ။

ပ္ဍဲကဵုပေါဲသဳကၠဳဆဵုဂဗ တ္ၚဲပထမဂှ် တၚ်မိက်ဂွံပလေဝ်ပလေတ် နူကဵုသၞောဝ်သ္ဇိုၚ် ၂၀၀၈ တံဂှ်ကီု၊ တၚ်တုပ်လဝ်စိုတ် ပ္ဍဲကဵုပေါဲသဳကၠဳကၠာတေံဂှ်ကီု ညံၚ်ဂွံထ္မံက်ရုပ်ရဴမာန်၊ ကိစ္စကၠောန်ဗဒှ် ကောံဓရီု ပရေၚ်ၜိုဟ်လလမ်တံဂှ် သဳကၠဳလဝ်အိုတ်ရောၚ် ထ္မံက်ထ္ၜးလဝ်ရ။

သ္အာၚ်နူဂှ်ပၠန် ကိစ္စစပ်ကဵုပရေၚ်ဒေသညိၚ်ဝတ်၊ ပရေၚ်ဗ္တိုက်သ္အးဂဥုဲၜူမာဲ၊ ကိစ္စစပ်ကဵုပရေၚ် ဖောအ်ဗြေဝ် ကေုာံ ပရေၚ်ရီုဗၚ်ထံက်ပၚ် စပ်ကဵုပရေၚ်ဗ္စာရဏာမၞိဟ်တံဂှ်လေဝ် သဳကၠဳလဝ်ညးသ္ကအ်ရောၚ်ဂှ် ကံၚ်ဇြဳပၞာန် လလောၚ်ပ္တိတ်လဝ်ရ။

ပ္ဍဲကဵုပေါဲသဳကၠဳ တ္ၚဲဒုတိယဂှ် ဆက်သဳကၠဳပ္ညဳပ္ညပ်လဝ် ပရူပရာ မသဳကၠဳလဝ် တ္ၚဲပထမ တ္ၚဲကၠာဂှ်တုဲ တၚ်တုပ်စိုတ် မကလိဂွံလဝ် နူကဵုမပ္ညဳပ္ညပ်လဝ်ညးသ္ကအ် ပွိုၚ် ၂ တ္ၚဲတံဂှ် ၜိုန်ရထ္ပက်စၟတ်တဲ သ္ပဒတန်လဝ်ကီုလေဝ် လလောၚ်ပ္တိတ်လဝ် သောဲသောဲဗြောဲဗြောဲဂှ် ဟွံမွဲရ။

စပ်ကဵုကိစ္စ မထ္ပက်လဝ်စၟတ်တဲတၚ်တုပ်စိုတ် ဇရေၚ်ညးအုပ်ကာလၟိဟ် (၁) သ္ကိုပ်ဗိုလ်ဇၞော်သာၚ်ၚေန် နူကဵုကံၚ်ဇြဳကလေၚ်ပ္တန်ရးသေံ မတိုန်စိုပ်လဝ် ပေါဲသဳကၠဳ ကုကံၚ်ဇြဳပၞာန်ဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံလဝ် နကဵုဖုၚ် ဟွံအောန်နူကဵု ပိဝါကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။

ပရူပရာကၠောန်ဗဒှ်ကောံဓရီုပရေၚ်ၜိုဟ်လလမ်ကၟိန်ဍုၚ်ဂှ် ဂကောံသဳကၠဳပရေၚ်ၜိုဟ်လလမ် ကံၚ်ဇြဳပၞာန်ဂှ်ဝွံ တုဲကၠုၚ်ပ္ဍဲဂိတုမာတ်ချ် သတ္တာဟတတိယတေံ စသဳကၠဳလဝ်ကဵု ဂကောံဟွံထ္ပက်လဝ် စၟတ်တဲဒေါအ်ပန်ပှော် မပ္တံကဵု ဂကောံ “ဝ” UWSP ၊ ဂကောံမိုၚ်လာ NDAA ကေုာံ ဗော်တောတက်ရးသေံ SSPP တံရ။

ကြဴနူဂှ်တုဲ ပ္ဍဲဂိတုဂျောန် သတ္တာဟလက္ကရဴအိုတ်ဂှ် သဳကၠဳပ္တိုန်ထ္ၜးလဝ်ကဵု ဂကောံရပ်လွဟ် ကောန်ဍုၚ် အရၚ်ဂမၠိုၚ် မပ္တံကဵု ဌာန်ဂအုပ်ဗၠးၜးကောန်ဂကူပအိုဝ် (PNLO) ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် (DKBA) ၊ ကံၚ်ဇြဳပရေၚ်ၜိုဟ်လလမ်ကရေၚ် (KNU/KNLA-PC) ၊ ဗော်သွးဒဳမဝ်ကရေတ် တေတ်လာဟူ (LDU) ကေုာံ ဗော်ဗၠးၜးရးရခေၚ် (ALP) တံရ။

ကြဴနူဒပ်ပၞာန်သီထောံအဝဵုကၟိန်ဍုၚ် နကဵုဇြဟတ်လွဟ်တုဲဂှ် က္ဍိုပ်သ္ကိုပ်ပၞာန်ဂှ် သွက်ဂွံသဳကၠဳပရေၚ် ၜိုဟ်လလမ်ဂှ် ကော်ဘိက်ကၠုၚ်တုဲ ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ ဒေါအ်ပန်ပှော် (၇) ဂကောံကဵု ဂကောံရပ်လွဟ်ကောန်ဍုၚ်အရၚ် ဟွံဂွံထ္ပက်လဝ်စၟတ်တဲ (၃) ဂကောံတံ (၅) ဝါဟွံက တိုန်စိုပ်သဳကၠဳလဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI