မတ်မလီု၊ ဂျူလာၚ်(၁၄)
အပ္ဍဲတွဵုရးဍုၚ်မန် ဂဥုဲဇဗဒးပၠုပ်ပ္တိုန်မံၚ်နူဍုၚ်သ္အာၚ်လ္ၚဵုတံ စပိုတ်အိုတ်တုဲ ၚုဟ်မးတံလေဝ် ထပ်က္ဍၚ်ကၠုၚ်ရဂှ် တၠကမၠောန်ဆေၚ်ဂဥုဲတံကဵု အ္စာဂဥုဲတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဂဥုဲဇဗဒးပၠုပ်ပ္တိုန်မံၚ်နူဍုၚ်သ္အာၚ်တံဂှ် ဟိုတ်နူၚုဟ်ဒဝ်ဠာက္ဍၚ်တိုန်တံကဵု အခက်အခုဲဒးပၠုပ်ပ္တိုန် ဂဥုဲဇဗတံတုဲ ပ္ဍဲဗွဝ်ဖျာ ဂဥုဲဇဗလ္ၚဵုပိုတ်အိုတ်တုဲ ဒးဂဗမံၚ်ကဵုအကာဲအရာ ၚုဟ်က္ဍၚ်တိုန်တံရ။
ၚုဟ်ဒဝ်ဠာဂှ် ကြဴနူအမေရိကာန် ကၟာတ်လဒဵုကေတ်အရေဝ် ကုတိုက်သြန်ကံၚ်ဇြဳပၞာန်ထိၚ်ဒဝ်လဝ် ၂မတံတုဲဂှ် မွဲဒဝ်ဠာမ္ဂး ၚုဟ်သၠုၚ်တိုန်ကၠုၚ် စဵုကဵုဗ္ဒါဲ ၃၂၀၀ဒ္ကေဝ်တုဲ ပ္ဍဲအရာပၠုပ်ပ္တိုန်ဂဥုဲဇဗတံဂှ်လေဝ် ဟိုတ်နူတၚ်သၞောတ်ဗ္ၜတ်ကံၚ်ဇြဳပၞာန်တံတုဲ ဂဥုဲဇဗလ္ၚဵုတံ ပိုတ်အိုတ်ကၠုၚ်လဝ် မဒှ်ရ။
ဟိုတ်နူဂဥုဲဇဗလ္ၚဵုပိုတ်အိုတ်ကၠုၚ်ဂှ်ရ အပ္ဍဲဗွဝ်ဖျာ ဂဥုဲဒးသုၚ်မံၚ်ဟွံဒေါံဟွံဂွံတံဂှ် တန်တဴကဵုဂကူအဇာတုဲ သၠုၚ်တိုန်ကၠုၚ် နူ၁၀တၟံကၠံ စဵုကဵု ၅၀တၟံကၠံရဂှ် ဂွံတီကေတ်ရ။
“ဂဥုဲဂှ် တိုန်မံၚ်ရ။ ဆ္ဂး ဂဥုဲနွံမံၚ်သတံက်တံဂှ်တှ်ေ ဟွံတိုန်ပုဟ်။ ဂဥုဲသတံက်အောန်မံၚ်တံဂှ်တှ်ေ ကုမ္ပဏဳတံ အဟိန်ထိၚ်သွံအာမံၚ်ဂှ် ၚုဟ်က္ဍၚ်တိုန်အာရ။ ဒှ်မံၚ်ဗွဲမဂၠိုၚ်ဂှ်တှ်ေ ဂဥုဲဂှ် ပၠုပ်ဟွံဂွံပုဟ်။ ပၠုပ်ဂွံဂှ် ဟိုတ်နူအကံက်ခေါန်လေဝ် ပါကီုရ။ လၟုဟ်ဂှ် ကံက်ဗပဵုပ္တိုန်အကံက်ခေါန်ဏောၚ်သ္ဂးတုဲ ဒှ်မံၚ်ရ။ သွက်ဂွံပၠုပ်ဂဥုဲပိုတ်အိုတ်အာသီုဖအိုတ်တံဂှ် ကဵုအခိၚ်ဟွံမာန်ပုဟ် လအ်ကွေံကွေံရ။ ဂဥုဲပိုတ်အာတုဲတှ်ေ ကလေၚ်ပၠုပ်ဟွံမာန်ရပုဟ်။ ဂဥုဲပိုတ်အာတှ်ေ ၚုဟ်ဂှ် တိုန်အာရ အဓိပ္ပာယ်ဂှ်ရ။ ဂဥုဲပိုတ်လေပ်မံၚ်လၟိုန်တံဂှ်တှ်ေ ဒးရာန်ကဵုၚုဟ်ဂၠိုၚ်ၚ်ရ။ ကုမ္ပဏဳဂှ် ကဵုဟွံမာန်ပုဟ်။ ဓမ္မတာ နူဒှ်ၜိုတ် ၁၀၀၀ဂှ် ဒှ်အာ ၜိုတ် ၂၀၀၀ရ။ တုဲပၠန်ၚုဟ်တိုန်လေဝ်နွံမံၚ်ဏီတှ်ေ ဓမ္မတာဂှ်တှ်ေ နွံမံၚ်ပ္ဍဲၚုဟ်ဖျာ ဟွံပြေပြံၚ်လးလးတံဂှ်ရ” ဂှ် သ္ဂးရ။
ဟိုတ်နူအခက်အခုဲပၠုပ်ပ္တိုန်ဂဥုဲဇဗတံတုဲ ဂဥုဲဒးသုၚ်စောဲမံၚ်ဟွံဒေါံဟွံဂွံ ဂဥုဲယဲဆီၜေတ်ကဵု ဂဥုဲယဲပဿဴဍာတ်တံ ပိုတ်အိုတ်မံၚ်တုဲ ၚုဟ်ဂဥုဲဗ္ဒါဲသီုဖအိုတ် က္ဍၚ်တိုန်ကၠုၚ်မံၚ် ဂၠိုၚ်ကဵုဆ မဒှ်ရ။
အ္စာဂဥုဲမွဲတၠဂှ်လေဝ် ဟိုတ်နူၚုဟ်ဂဥုဲက္ဍၚ်တိုန်ကၠုၚ်တုဲ စဵုကဵုကဆံၚ်မၞိဟ်သ္ဇိုၚ်တံကဵု ကဆံၚ်မၞိဟ်အဇာလ္ဒောဝ်တံ ဂွံရာန်ဂဥုဲမာန်ဂှ် ခက်ခုဲကၠုၚ်တုဲ ဟိုတ်နူထ္ၜး ရုၚ်ဂဥုဲ၊ ဗ္ဒမ်ဂဥုဲဟွံမာန်ရတုဲ ဒးရာန်သုၚ်မံၚ်ဂဥုဲပ္ဍဲဆေၚ်ဂဥုဲတံရတုဲ ယဲတံ သာတုဲက္ဍၚ်တိုန်ကၠုၚ်မာန်မံၚ်ဂှ် ဟီုရ။
“ၚုဟ်ဂဥုဲဂှ် ပ္ဍဲမွဲဂိတု၊ ၜါဂိတုအဆက်က်ဏံဂှ် လ္ပာ်တိုန်တံသၟးရ။ ဂဥုဲလ္ၚဵုတံတှ်ေ တိုန်အာ နူ ၂၀ စဵုကဵု ၜိုတ်၅၀တၟံကၠံရ။ အဓိကဂှ်တှ်ေ ဟိုတ်နူတၚ်(၂)တၚ်ရ။ ကုမ္ပဏဳပၠုပ်ပ္တိုန်တံဂှ်လေဝ် ဗွဲမဂၠိုၚ် ပ္ဍဲအကာဲအရာဏံဂှ် ဟွံဒေါံဟွံဂွံ ဍေံတံပ္တိုန်ရ။ တုဲပၠန်ဂှ် ၚုဟ်ဒဝ်ဠာရလေဝ်။ လၟုဟ် ၜိုတ်အဲမိၚ်လဝ်ဂှ် အကံက်ခေါန်တံလေဝ် ပဵုကၠုၚ်တီတီဒှ်ဒှ်ရဂှ် ဟီုရ။ မ္ၚးနူၚုဟ်ဒဝ်ဠာပၠုပ်ပ္တိုန်တံ ဂၠိုၚ်မံၚ်ဂှ် အကံက်ခေါန်ဂှ်လေဝ်ပဵုတုဲ ဍေံတံဂှ် ထပ်ပံၚ်ထောံဂဥုဲဂှ်ပၠန်ရ။ ၚုဟ်ဂဥုဲတံဂှ် က္ဍဟွံစိုပ်ရပုဟ်။ ပြဿနာဂှ် အခိၚ်က္ဍဟွံစိုပ်ရတှ်ေ လ္တူနူရုၚ်ဂဥုဲ ဗ္ဒမ်ဂဥုဲဂှ် ဒးတုဲထောံကဵုဆေၚ်ဂဥုဲ ပ္ဍဲအရာပ်တံရ။ ယဲဍောတ်တ်လ္ၚဵုတံဂှ်တှ်ေ သက်သာအာဏောၚ်၊ ယဲဇၞော်ဇၞော်ဇေတ်တ်တံဂှ်တှ်ေ သာတုဲပရေံအာရ။ ညးတံသာတုဲဒှ်ကၠုၚ်အခက်အခုဲရ။ ကာလတိုန်ရုၚ်ဂဥုဲဂှ် မ္ၚးနူသၠုဲအိုတ်ဂှ် မၞိဟ်ယဲဂှ်လေဝ် သာတုဲယဲက္ဍၚ်ကၠုၚ်မာန်မံၚ်ရ”ဂှ် သ္ဂးရ။
သ္အာၚ်နူဂှ်ပၠန် နကဵုညးဍုၚ်ကွာန်တံဂှ် ဟိုတ်နူၚုဟ်ဂဥုဲက္ဍၚ်မံၚ်တုဲ ယဝ်ရလွဳယဲတံ နကဵုဂဥုဲ ဗီုဒှ်ကဵုဒှ်ရမ္ဂး ယဲသာတုဲက္ဍၚ်ကၠုၚ်မာန်တုဲ ချိုတ်ဟွံထေက်မွဲသာ် သ္ဒးချိုတ်အာတံလေဝ် ဒှ်ကၠုၚ်မာန်မံၚ်ဂှ်ရ သွက်ဂွံစွံသတိအိုတ်ဂှ် ဖ္တိုက်ဖ္အောဝ်လဝ်ရ။
ပြဟ်ဟ်ဏံဂှ်လေဝ် ဂဥုဲဇဗဗွဲမဂၠိုၚ်တံဂှ် ပ္ဍဲကုမ္ပဏဳတံဂှ် သှ်ေအောန်ကၠုၚ်တုဲ ယဝ်ရကံၚ်ဇြဳပၞာန်တံ ထပ်ပတေၚ်ဓရတ်ကၠုၚ် အခေါၚ်ပၠုပ်ပ္တိုန်ဂဥုဲဇဗတံမ္ဂး ပရေၚ်ဇီုကပိုက်လ္တူဗွဝ်ဖျာတံ ဇၞော်ကၠုၚ်မာန်မံၚ်ရဂှ် ညးပၠုပ်ပ္တိုန်ဂဥုဲဇဗတံ သ္ၚဳဂၠိပ်လဝ်ရ။
ဍုၚ်ဗၟာဂှ် ဂဥုဲဇဗကေုာံ ကပေါတ်ဆက်စပ်တံဂှ် အဓိကပၠုပ်ပ္တိုန်မံၚ် နူကဵုဍုၚ်သေံ၊ ကြုက်တံကဵု ဍုၚ်အိန္ဒိယတံတုဲ ပ္ဍဲကာလဒပ်ပၞာန်သီအဝဵုဂှ် ဒးဆေၚ်မံၚ်မုက် ကုဂဥုဲဇဗပိုတ်အိုတ်တံ မွဲဏှမွဲဏှမဒှ်ရ။
ပရုၚ်-သြၚ်လောန်တိုၚ်မ်
ဗီု-CJ
sanlontai