ပ္ဍဲကျာ်ထဝ် မၞိဟ် (၁၆) တၠပါလုပ်သီုကောန်ကမၠောန်ၜံက်ခါဲထဝ် ဒပ်ကံၚ်ဇြဳပၞာန်ရပ်ဏာ

ကျာ်ထဝ်၊ ဂျူလာၚ် (၁၅)

တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ လကြဴကၠံသတ်ဗြဴကၠေၚ် ကွာန်အၚ်္ဂဘိုဝ်ဂှ် ဒပ်ကံၚ်ဇြဳပၞာန်လုပ်စိုပ် နဇြဟတ်ပေၚ်ပေၚ် ရပ်ကေတ်ဏာ မၞိဟ် (၁၆) တၠ ပါလုပ်သီုကောန်ကမၠောန်ခါဲထဝ် ကၠောန်ဒၟံၚ်ကမၠောန်ၜံက်ခါဲထဝ်ရဂှ် ဂွံတီကေတ် နူ PDF ခရိုၚ်သဓီုရ။

ကောန်ဒပ်ကံၚ်ဇြဳပၞာန် ဇြဟတ်ဒပ် (၆၀) ပြၚ်ဂှ် ပ္ဍဲဂိတုဂျူလာၚ် စၟတ်တ္ၚဲ (၁၃) အခိၚ်ဇိုၚ်သဝ်တ္ၚဲ ၜိုတ် (၃)နာဍဳဂှ် လုပ်စိုပ်ကၠုၚ် နကဵုကွဳစက်ဖဝ်တုဲဂှ် ရပ်ကေတ်ဏာလဝ် သ္ဇိုၚ်ဝန် (၁၆) တၠ ပါလုပ်သီုသၟာကမၠောန်ခါဲထဝ်၊ ညးဒဳဗက်ဗေတ်ဟိုဝ် ကေုာံ မာန်နေဂျာ ကုမ္ပဏဳတဵုလွဳပါန်သိၚ်္ဂဳရ။

ပၞောဝ်ညးဒးဒုၚ်ရပ်လဝ်တအ်ဂှ် နူကမၠောန်ၜံက်ခါဲထဝ် သၟာကမၠောန် (၁၀)တၠ၊ သၟာဒဳကွဳစက်ဗေတ်ဟိုဝ် (၃)တၠ၊ နူကုမ္ပဏဳတဵုလွဳပါန်သိၚ်္ဂဳမာန် နေဂျာကိုဝ်မျိုဝ်မျေအ်ကျဝ်ကီု သီုသ္ဇိုၚ်ဝန်ကိုဝ်ကိုဝ်ချေတ် (၂)တၠတအ် ဒးဒုၚ်ရပ်လဝ်ရ။

ဒပ်ကံၚ်ဇြဳပၞာန် ရပ်ကေတ်ဏာသ္ဇိုၚ်ဝန်ကမၠောန်ၜံက်ခါဲထဝ်ဂှ် သီုသီကေတ်ဏာလဝ် ဗေတ်ဟိုဝ် (၃) ဖ္ဍိုက်၊ စက်ဖဳထဝ် (၁) မ ကီု ရိုက်တာဲသၟာကမၠောန်တအ် မံၚ်ဒၟံၚ်ဂှ်လေဝ် စံၚ်ပလီုဏာလဝ်ရ။

မုဟိုတ် ဒပ်ကံၚ်ဇြဳပၞာန်ဂွံရပ်ကေတ်ဏာညးတအ်ရောဂှ် နကဵုသြၚ်လောန်တိုၚ်(မ်) ဃောဆက်လ္ၚတ် ဂၠိုက်ဂၠာဲဒၟံၚ်ဖိုဟ်ရ။

ညးဒးဒုၚ်ရပ်လဝ်တအ်ဂှ် ဒပ်ကံၚ်ဇြဳပၞာန် ဒက်ရပ်လဝ် ပ္ဍဲဗဒိုပ်ဗၠာဲသၟိၚ်ၝောံဍုၚ်ကျာ်ထဝ် ကေုာံ ဌာန်ဂအုပ်ၝောံဒပ် (၄၄) တုဲ သၟာန်သၟုက်စၟဳစၟတ်ဒၟံၚ်ရဂှ် ဂွံတီကေတ် နူညးစုက်လုက်ကဵုကံၚ်ဇြဳပၞာန်တအ်ရ။

တွဵုရးဍုၚ်မန် ပွိုၚ်ဍုၚ်ကျာ်ထဝ်ဂှ် ပ္ဍဲမွဲကာလဒပ်ပၞာန်သီအဝဵုဏံ ဒပ်ကံၚ်ဇြဳပၞာန် ထ္ၜးဟိုတ်နာနာ ရပ်ကေတ်ဒၟံၚ် တၠကမၠောန် ကေုာံ ကောန်အရာပ် ညးဍုၚ်ကွာန်တအ်တုဲ အာတ်မိက်ကေတ်ဒၟံၚ် သြန်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-Social Media