“အခေါၚ်ကောန်ပၞာန်တအ် ဗ္တောန်ပညာ၊ အခေါၚ်လုပ်သှ်လိက်၊ အခေါၚ်တိုန်တက္ကသိုလ်အဝေတေန်ဒှ်တံ ကၟာတ်လဝ်ဖအိုတ်ရ၊ အဓိကဂှ် လ္ပာ်ဍေံတအ် (ကံၚ်ဇြဳပၞာန်) ဂွိၚ်ဒၟံၚ် ဖေက်ကောန်ဒပ်တအ် ဂြိပ်တိတ်ဒၟံၚ်ရ”

ဟိုတ်နူပၞာန်ဒုၚ်ဒဝ်ပၠန်ဂတးညးဍုၚ်ကွာန်တအ်တုဲ မွဲကရောံကဵု ဇြဟတ်ဒပ် ဒးလေၚ်ဒိုက်ကၠုၚ်ဒၟံၚ်ဂှ် ပ္ဍဲကဵုဒပ်ကံၚ်ဇြဳပၞာန် သီုစိုတ်ဓာတ်ဒးစှ်ေကၠုၚ်ဒၟံၚ်ဂှ် ဟိုတ်နူဟွံမိက်တိတ်မုက်ပၞာန် ဟွံမိက်ဗတိုက်ပၞာန်တုဲ ပရေၚ်ဟွံကလၚ်အမိၚ် ဂၠိုၚ်တိုန်ကၠုၚ်ဒၟံၚ်တုဲ ကောန်ဒပ်ဂြိပ်တိတ်တအ်လေဝ် သာဂၠိုၚ်ကၠုၚ်ဒၟံၚ်ရ။

အတိုၚ်လိက်ဒုၚ်စဳရေၚ် ပၞာန်ဒုၚ်ဒဝ်စဵုဒၞာညးဍုၚ်ကွာန် အလဵုအသဳညဳသၟဟ်ကောန်ဂကူ ပေၚ်ၜါသၞာံဂှ်မ္ဂး ပ္ဍဲမွဲကာလဒပ်ပၞာန်သီအဝဵုဏံ ကောန်ဒပ်ပၞာန် ကေုာံဗၠာဲသၟိၚ် ၁၃၀၀၀ ပြၚ်တအ် ပါလုပ်လဝ် ပ္ဍဲပရေၚ်ချဳဒရာၚ်ဒစဵုဒစးအဝဵု ဟွံပ္ကီုပရာပ် CDM ရဂှ် လလောၚ်တြးလဝ်ရ။

ဟိုတ်ဂှ်ရ စပ်ကဵုအကာဲအရာ ပ္ဍဲဒပ်ပၞာန်သီအဝဵုကီု၊ ပရေၚ်လုပ်စိုပ်ကၠုၚ် CDM ကီု၊ သွက်ဂွံထိၚ်ဒဝ် လ္တူပရေၚ်ကောန်ဒပ် ဂြိပ်တိတ်ဂၠိုၚ်ကၠုၚ်ဒၟံၚ် ပါလုပ်သီုပရေၚ်သတ်ပညောန် (ဖရဲသီး) ပါလုပ်ဒၟံၚ် ပ္ဍဲဒပ်ပၞာန်ဂှ် ဗီုပြၚ်လဵုပ္တိတ်ဒၟံၚ်ဇြဟတ်ရောကီု၊ စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ်ကဵု ညးတာလျိုၚ်မေမေအ်ယေန်ခွေန် ကိုဝ်မျိုဝ်မျေအ်အောၚ် ရီုဗၚ်ကဵုဒၟံၚ် ညံၚ်ဂွံလုပ် CDM ရ။

သြၚ်လောန်တိုၚ်(မ်) – ကၠာအိုတ်ဏံ ကြဴနူဒပ်ပၞာန်ထပ်ဂလိုၚ်ပတိုန်အယုက် ကာလကာတၟေၚ်တုဲဂှ် အကာဲအရာကောန်ဒပ်ပၞာန် လုပ်ကၠုၚ် CDM ဗီုပြၚ်လဵု နွံကၠုၚ်ရောၚ်။

ကိုဝ်မျိုဝ်မျေအ်အောၚ် – ဗ္ၜတ်လုပ်ကၠုၚ် CDM ဂှ် ပျဳဒုယေန်ခွေန်၊ ပျဳဒုတာဂေါၚ်တအ် မေမေအ်ယေန်ခွေန်တအ် သီုဖအိုတ်ဂှ် ဂကောံရီုဗၚ် CDM တအ်သီုဖအိုတ်တှ်ေ ၜိုတ် ၁၄၀၀၀ နွံဏောၚ်။ ကြဴနူသီအဝဵုတုဲ လကြဴဏံဂှ် သွာၚ်ဇြဟတ် ပ္ဍဲဒပ်အောန်စှ်ေကၠုၚ်ဂှ်တှ်ေေ ရံၚ်ကဵုဗ္ၜတ်လုပ် CDM သၟး ဟွံဂွံ။

ဗ္ၜတ်လုပ်ကၠုၚ် CDM နွံ။ ဗ္ၜတ်ဂြိပ်တိတ်နူဒပ် နွံ။ သီုကဵုဗ္ၜတ်သတ်ပညောန်တအ် ဒးတော်စုတ်ရ။ ပ္ဍဲကဵုပိုဲဂှ် ဗ္ၜတ်လုပ်ကၠုၚ် CDM ဒပ်ပၞာန်ကဵု ဗၠာဲသၟိၚ်ပံၚ်ထောံတှ်ေ ၜိုတ် ၁၄၀၀၀ နွံဏောၚ်။ တုဲပၠန် ဇြဟတ်အာ လ္ပာ်ဍေံတအ်တှ်ေ မၞိဟ်ဂြိပ်နူဒပ် ဂြိပ်နူဗၠာဲသၟိၚ်တအ် နွံဏောၚ်။

သြၚ်လောန်တိုၚ်(မ်) – အကာဲအရာသတ်ပညောန် ဗီုလဵုနွံရော၊ တၚ်ဍေံတအ်ကဵုပရိုၚ်ဂှ် ဗီုပြၚ်လဵု စၟဳစၟတ်ဒၟံၚ်ရော။

ကိုဝ်မျိုဝ်မျေအ်အောၚ် – အကာဲအရာသတ်ပညောန်တအ်ဂှ် ဂၠိုၚ်ကၠုၚ်ရ။ လ္ၚဵုဂှ် ဗီုပြၚ်လဵု ဂွံဆက်စၠောံ။ ဒၞာဲလဵုဂွံပလံၚ်ပရိုၚ်ရောဟီုဂှ် ဟွံတီလေဝ် နွံစလေပ်ဂှ်ရတှ်ေ တၚ်တၞဟ်ခြာ အကာဲအရာကၠာတေံကဵု အကာဲအရာလၟုဟ်ဂှ် ကၠာတေံတှ်ေ သ္ပတံနူစရိတ်ဖုၚ်စရိတ်တအ် မုတအ်ဒှ်တံ ဒးထံက်ပၚ်ဒၟံၚ် ဗီုဏံနွံရ။ သ္ကုတ်လကြဴဏံဂှ် ဇြဟတ်သတ်ပညောန်ဂှ် ဂၠိုၚ်တိုန်ကၠုၚ်ကွေံကွေံရ။

သွက်ဂွံဒးထံက်ပၚ် မုလေဝ်ဟၟဲရပုဟ်။ သတ်ပညောန်တအ်ဂှ် သွက်ဂွံဂွံ Code ဟီုတှ်ေ နွံရ။ သွာၚ်လှုဲလှာ်ဂှ် ဟွံဒးကေတ်ပုဟ်။ မုလေဝ် ပၟိက်ဟၟဲပုဟ်။ အခိၚ်မိၚ်ဂွံဂွံ Code ဏံဟီုဂှ်တှ်ေ ဍေံတအ်အာတ်မိက်ကၠုၚ်ရ။ ပ္ဍဲကဵုသတ်ပညောန်ဂှ် ဆၜိုတ်အဲမိက်ဂွံကဵုပရိုၚ်ဟီုဓဝ်ဂှ် ဗက်ဒုၚ်ဒၟံၚ်တဲ ကြာန်န်ဟွံသေၚ်။

ယဝ်ရဒးဟီုတှ်ေ သွက်ဂွံခါန်ကၞက်ညးယိုက်ဝန်ရ။ ကာလစမ်ၜတ်ရလေဝ်။ တုဲတဴကဵု ပရိုၚ်ဍေံကဵုနၚ် ပရေၚ်ပရိုၚ်ဍေံကဵုနၚ်လဝ်ဂှ် ၜိုတ်ဂလိုၚ်လဵု ခိုၚ်ကၠိုက်ရော။ ပရိုၚ်ပ္ဍဲဗလးမုက်တိတအ်ရ။ မၞိဟ်ဇၞော်လဵု ကဵုယာဉ်လဵု မုနွံရောဟီုဂှ် ပိုဲပ္ကိတ်စၟဳစၟတ်ကဵု ဂကောံ ပ္ဍဲဗလးမုက်တိတေအ်ရ။

ပရိုၚ်ဍေံကဵုနၚ်လဝ်ဂှ် ပလံၚ်ကဵုလဝ် ပ္ဍဲဗလးမုက်တိ ဌာနမဆေၚ်စပ်တအ်နွံရ။

ပရိုၚ်ခိုၚ်ကၠိုက် နွံဟၟဲဂှ် ပ္ကိတ်စၟဳစၟတ်ကဵု ဂကောံပ္ဍဲဗလးမုက်တိတအ်ရ။ ဂကောံပ္ဍဲဗလးမုက်တိတအ်ဂှ် ဂၠံၚ်ဍာန်ဇွောံမ၊ ဂၠံၚ်ဍာန်မၞိဟ်ဇၞော်ကၠုၚ်ဟီုဂှ် ယဝ်ရဍာံတှ်ေ ပိုဲကလေၚ်ဟီုထ္ၜးရ။ ညးကဵုပရိုၚ်တအ်ဂှ် ယဝ်ရကဵုနၚ်ပရိုၚ်ဍာံဍာံ ခိုၚ်ၚ်ဏောၚ်တှ်ေ နူလ္ပာ်ပိုဲ သ္ပကဵုစၟတ်သမ္တီရ။

သြၚ်လောန်တိုၚ်(မ်) – ကံၚ်ဇြဳပၞာန်ဂှ်သွက်ဂွံထိၚ်ဒဝ် ညးကဵုပရိုၚ် ပ္ဍဲဒပ်ပၞာန်၊ အကာဲအရာကောန်ဒပ်ဂြိပ်ဂၠိုၚ်ဒၟံၚ်မာန်ဂှ် မုကၠောန်ဒၟံၚ် ပ္ဍဲဒပ်ပၞာန်နွံ တီလဝ်ကီုရော။

ကိုဝ်မျိုဝ်မေန်အောၚ် – အခိၚ်လၟုဟ်ဏံဂှ်တှ်ေ ညံၚ်ဟွံဂွံသ္ပ CDM ဂၠိုၚ်ၚ်ဂှ် ခဍာတ်ပံၚ်ကၠုၚ်ကဵု ကောန်ဒပ်ကဆံၚ်သ္ဇိုၚ်တအ်ရ။ ညံၚ်တိတ်တရဴဟွံဂွံဂှ် သီကေတ်လဝ်တၞးကာဒ်ကောန်ဍုၚ်ရ။ ကိစ္စနွံယဝ်ရဒးဗလးပ္တိတ် မ္ၚးတှ်ေ မၞိဟ်မွဲ ဓဝ်ဟွံဗလးရပုဟ်။ ထ္ၜးဟိုတ်ကဵု ပရေၚ်ဂီုကၠီုမ္ၚးဒပ်တုဲ ယဝ်တိတ်မ္ၚးဒပ်တှ်ေ အန္တရာယ်နွံဒၟံၚ်တအ် ၝတအ်လ္ပတိတ်မ္ၚး ဒၟာနူအန္တရာယ်နွံတုဲ ဗီုပြၚ်ဟွံကဵုတိတ်မ္ၚးကီု အကာဲအရာဟွံဗလးပ္တိတ် မၞိဟ်မွဲဓဝ်ကီုဂှ် နွံကၠုၚ်ရ။

ဗီုကဵုသီကေတ်လဝ် တၞးကာဒ်ကောန်ဍုၚ် ဗီုကဵုပြံၚ်သၠာဲကၠောန်ကၠုၚ် Smart Card တအ်။ ပ္ဍဲကဵုသၞာံဗ္တောန်ပညာ နူသၞာံအာတေံဂှ် မၞိဟ်လုပ်အာ CDM ဂၠိုၚ်ဒၟံၚ်ရ။ သၞာံဏီတှ်ေ အခေါၚ်ကောန်ပၞာန်တအ် ဗ္တောန်ပညာ၊ အခေါၚ်လုပ်သှ်လိက်၊ အခေါၚ်တိုန်တက္ကသိုလ်အဝေတေန်ဒှ်တံ ကၟာတ်လဝ်ဖအိုတ်ရ၊ အဓိကဂှ် လ္ပာ်ဍေံတအ် (ကံၚ်ဇြဳပၞာန်) ဂွိၚ်ဒၟံၚ် ဖေက်ကောန်ဒပ်တအ် ဂြိပ်တိတ်ဒၟံၚ်ရ၊ ဆ္ဂး မၞိဟ်မိက်ဂွံတိတ်ဍာံဍာံတအ်ဂှ်တှ်ေ စိုပ်ကၠုၚ်ဒၟံၚ်ပိုဲ နဲကဲစုၚ်တွဵုရ။

သြၚ်လောန်တိုၚ်(မ်) – အကာဲအရာဘဝကောန်ဒပ်ပၞာန် ယိုက်ဒၟံၚ်တာလျိုၚ် ပ္ဍဲဒပ်ပၞာန်အခိၚ်လၟုဟ်ကဵု ဂကောံသ္ၚိကၟိန်ကောန်ဒပ် CDM တအ်ဂှ် ဗီုပြၚ်လဵု တၞဟ်ခြာဒၟံၚ်နွံရော။

ကိုဝ်မျိုဝ်မျေအ်အောၚ် – တၞဟ်ခြာဒၟံၚ် တၟာဂလိုၚ်ရ။ အကြာပ်ဒပ်ဇၞော် ပ္ဍဲကဵုဒပ်ပၞာန်မွဲတၠတှ်ေ ဂွံဒၟံၚ်ၜိုတ်ၜါကိုတ်ၜါလက်ရ။ ကုတ်လဝ် သြန်ပကောံ၊ စရိတ်ဒုၚ်လျိုၚ်လမျီုတအ် ကုတ်လဝ်၊ ကုတ်လဝ်သြန်ဂလေံကိုဝ်ဗေတ်၊ ကုတ်လဝ်စရိတ်ချိုတ်ဂျိုၚ်တၞဟ်တအ်ရ။

အကြာပ်ဒပ်ဇၞော်တှ်ေ ဗွဲမဂၠိုၚ် ကောန်ၚာ်နွံမွဲဏောၚ် ဂကောံသ္ၚိကၟိန် နွံၜိုတ် ပိပန်။ သီုအလုံမွဲဂိတုဂှ် ဆၜိုတ်ပန်လက်ဓဝ်တှ်ေ ဗီုလဵုဂွံစရော။

ပ္ဍဲ CDM ဂှ် မုလေဝ်သက်ဂွံဒးယိုက်ဂၠေၚ်တာလျိုၚ်ဟၟဲပုဟ်။

ကောန်ပၞာန်မွဲဂှ် ယဝ်ရလုပ်ကၠုၚ် CDM တှ်ေ မၞိဟ်ပလးမွဲတှ်ေ ဂွံဒၟံၚ်မွဲကိုတ်။ တုဲတှ်ေ ယဝ်ဂကောံသ္ၚိကၟိန်ပါကၠုၚ်တှ်ေ ဂွံၜါကိုတ်။ ကောန်ၚာ် ပါကၠုၚ်မွဲတှ်ေ ဒှ်အာပိကိုတ်ရ။ ကောန်ၚာ်ပါကၠုၚ်ၜါတှ်ေ ပန်ကိုတ်ဟီုတှ်ေ ကဵုဒၟံၚ် နူကဵုမွဲကိုတ်စဵုကဵုပန်ကိုတ်ရ။ ဣဏံဂှ် လ္ပာ်ဏံ မုလေဝ်သက်ဂွံဒးယိုက်ဂၠေၚ်တာလျိုၚ် ဟၟဲပုဟ်။

ပ္ဍဲကဵုဒပ်ဂှ် ကဵုလဝ်ၜိုတ်ၜါကိုတ်မွဲလက်ရ။ ကုတ်ထောံစရိတ်တေံစရိတ်ဏံဟီုတှ်ေ ၜိုတ် ပန်လက်ဘာ်ရ သှ်ေပ္ဍဲဍေံတအ်။ ပါဲနူဂှ်ပၠန် ဂကောံသ္ၚိကၟိန်ဍေံတအ် သီုဒးယိုက်ဂၠေၚ်ဒၟံၚ်တာလျိုၚ်ဏီရ။ ဒးမၚ်မပ္တံကဵုကၚ် မၞိဟ်ပ္ဍဲဒပ်တအ်တီရ။ လ္ပာ်ဏံဂှ် သီုဂွံဒၟံၚ်အထံက်ပၚ်ဏီရ။

ဘာသာဇကုကဵုဇကု အခေါၚ်ကၠောန်ကမၠောန် ဗၠးဗၠးၜးၜးလေဝ် ဂွံဒၟံၚ်ဏီရ။ လ္ပာ်ဏံဂှ် ကၠောန်ကမၠောန်ဏောၚ်၊ CDM တအ်ဂှ် ရကလေၚ်ကၠောန်ဒၟံၚ်ထံက်ပလံၚ်နွံရ။ ဍေံတအ်ကၠောန်ကမၠောန်။ သြန်ဂွံနၚ်တအ်ဂှ် ဍေံတအ်ကဵုဍေံတအ်ကလေၚ်ရီုဗၚ်ညးသ္ကအ် နွံရ။

သြၚ်လောန်တိုၚ်(မ်) – လကြဴအိုတ်ဏံ နကဵုဂကောံရီုဗၚ်ကဵုဒၟံၚ် ညံၚ် CDM တအ် ဂွံတိတ်ကၠုၚ်နူဒပ်ပၞာန်မာန်ဂှ် ပ္ဍဲရာသဳတၟးဇး ကၠုၚ်စိုပ်ဂတဏံ ဗ္ၜတ်လုပ်ကၠုၚ် CDM ၜိုတ်ဂလိုၚ်လဵု နွံမာန်ရော။ မုဟိုတ်ရောဟီုဂှ် သ္ၚဳဂၠိပ်ထ္ၜးကဵုညိ။

ကိုဝ်မျိုဝ်မျေအ်အောၚ် – ဗ္ၜတ်လုပ်ကၠုၚ် CDM ဂှ် သွက်ဂွံဂၠိုၚ်တိုန်ကၠုၚ် နွံရ။ သွက်ဂွံဂၠိုၚ်တိုန်ဟီုဂှ် လ္ပာ်ကံၚ်ဇြဳပၞာန်ဂှ် သၞာံဏံတှ်ေ ဟွံကဵုအခေါၚ်တိုန်ဘာရပုဟ်။ အကာဲအရာဟွံကဵုအခေါၚ်တိုန်ဘာတအ် ဒပ်ကဵုဒၟံၚ်အကာဲအရာ ဟွံကဵုအခေါၚ်လုပ်သှ်လိက် သၞာံဏံလေဝ် နွံဒၟံၚ်ရ။ ကောန်ဒပ်ပၞာန်တအ်ဂှ် ပ္ဍဲအကာဲအရာလဵု တိတ်ကၠုၚ်ဗီုပြၚ်လဵု ဒှ်စလေပ်ရ။ ဗီုပြၚ်လဵု တိတ်ကၠုၚ်လေပ်ရောဟီုတှ်ေ ပိုဲတီဒၟံၚ်အခိၚ် တုဲတုဲရ။ သွက် CDM တအ် ဂွံလုပ်ကၠုၚ် နွံဂၠိုၚ်ဒၟံၚ်ရ။

နကဵုပိုဲဂှ် လုပ် CDM ကဵုဒှ် ဟွံလုပ်ကဵုဒှ် ပိုဲဟွံဒှ်ဓဝိၚ်ကွေံကွေံပုဟ်။ ညံၚ်ဍေံတအ်ဟွံဂွံလုပ် CDM ဟီုတုဲ ကၟာတ်ထောံလဝ် ပ္ဍဲဒပ်ရ။ ဇြဟတ်သတ်ပညောန်ဂှ် ဂၠိုၚ်တိုန်ခ္ဍၚ်ရ။ ယဝ်ရဍေံတအ်ကဵုထောံအခေါၚ်အာကၠုၚ်ဗၠးၜး မၞိဟ်မိက်ဂွံလုပ် CDM လုပ်ယဝ်ရပံက်ကဵုဏောၚ်တှ်ေ ဗ္ၜတ်လုပ်ကၠုၚ် CDM ဂၠိုၚ်တိုန်ကၠုၚ်ဏောၚ်။

ဍေံတအ်ကၟာတ်လဝ်ခ္ဍၚ် သွက်ပိုဲဂွံပရိုၚ်ဂၠိုၚ်ခ္ဍၚ်ရ။ လုပ်ကၠုၚ် CDM ယျတှ်ေ လ္ပာ်ဏံဒးကဵုသြန်ထံက်ပၚ်။ ဒးစဳဇန်ကဵုဒၞာဲမံၚ်စံၚ်တအ်၊ ဒးစဳဇန်ကဵု ဇွောံမစၞစတအ်ဂှ်ရ လ္ပာ်ပိုဲလေဝ် ဒှ်ဒၟံၚ်ပရေၚ်ခက်ခုဲ ဇၞော်ကဵုဇြဟတ်ရ။

ဇၟာပ်ပ်ကၠုၚ်ဂှ် ရီုဗၚ်ဏောၚ် ဒုၚ်တဲဏောၚ်။ ဍေံတအ်ကၟာတ်လဝ်ခ္ဍၚ် ဇြဟ်သတ်ပညောန် ဂၠိုၚ်တိုန်ခ္ဍၚ်ရ။ ဇြဟတ်သတ်ပညောန်ဂှ်လေဝ် ခိုဟ်ဒၟံၚ်ကွေံကွေံရ။ မၞိဟ်ကဵုဒၟံၚ် MOD တိုက်ရိုက်လေဝ် နွံဒၟံၚ်ရ။