လိုၚ်ဇြာ၊ နဝ်ဝေမ်ဗာ (၂)
အတိုၚ်ညးကဵုပရိုၚ်ခိုၚ်ကၠိုက်တအ် ကဵုနၚ်လဝ်ပရိုၚ် ကလေၚ်ဗတိုက်ပလန်လဝ်တဲ ပ္ဍဲဒၞာဲကၠောန်ပ္တိတ် ကေုာံ ဒၞာဲဂိုၚ်ဒေပ် လွဟ်လက်နက်၊ မကမ်၊ မာၚ် ဒပ်ပၞာန်ဗၠးၜးကောန်ဂကူကချေၚ် KIA ဗွဲမဗဗွဲရဂှ် ကံၚ်ဇြဳပၞာန် လလောၚ်တြးလဝ် ပ္ဍဲဂိတုအံက်တဝ်ဗာ စၟတ် တ္ၚဲ ၃၁ အခိၚ်ဗ္တံရ။
ပ္ဍဲကဵုတ္ၚဲဂှ် ဂိတုအံက်တဝ်ဗာ စၟတ်တ္ၚဲ (၃၁) ပ္ဍဲအခိၚ်နူဂယးဂှ် ဟိုတ်နူ KIA၊ AA ကေုာံ ဂကောံပံၚ်ကောံတအ် ဗတိုက်သီကေတ်လဝ် ဗဒိုပ်ဂါန်ဒေါၚ်ယာန် ဒပ်ကံၚ်ဇြဳပၞာန် ဖျေံလဝ်ဗဒိုပ် လအ်ကဵုဗွဝ်စှ်သၞာံ မၞုံလ္တူဂၠံၚ် မျေတ်ဂျဳနာ – ဗာန်မဝ်ဂှ်ရ ကလေၚ်ဗတိုက်ပလန်လဝ်တဲ ဗီုလၟုဟ်ဏံရ။
ဒၞာဲကံၚ်ဇြဳပၞာန် ကလေၚ်ဗတိုက်ပလန်လဝ်တဲကဵု ဂကောံ KIA ဂှ် ဟိုတ်နူဒှ်ဒၞာဲ ကြပ်ညောန်ဒၟံၚ်ကဵု ပယျဵုဒၞက်ကီု၊ ကိစ္စပါဲဟွံဗၠး ဒးကၠောန်ရေၚ်တၠုၚ်ဂှ် ပါဲနူပရဟ်ဒုၚ်ကဵု လဝ်သမ္တီ ဇရေၚ်ကၟိန်ဍုၚ်ဇိုၚ်ဝုတ်ဒိုဟ်တုဲ ကၠောန်သ္ပလဝ်ပရေၚ်ကလေၚ်ဗတိုက်ပလန်တဲ ဗွဲမထိၚ်ဒဝ်ရဂှ် ဟီုလဝ်ရ။
ဆ္ဂးဒၞာဲသီဂိုၚ်ဒေပ်လွဟ်လက်နက် ဒပ်ပၞာန်ဗၠးၜးကောန်ဂကူကချေၚ် (KIA) နွံဒၞာဲလဵု ဗီုပြၚ်လဵု ဗတိုက်လဝ်ကဵုလွဟ်လက်နက် ချဳဒရာၚ်ပၞာန်သာ်လဵုဟီုဂှ် ဟွံဂွံဓမံက်ထ္ၜးလဝ် ပ္ဍဲတၚ်လလောၚ်တြး ကံၚ်ဇြဳပၞာန်ရ။
စပ်ကဵုတၚ်လလောၚ်တြးကံၚ်ဇြဳပၞာန်တုဲ နကဵုသြၚ်လောန်တိုၚ်မ် ၜိုန်ရကော်လဝ်ဖုၚ်ကေတ်လဝ်အဆက် ဇရေၚ်သ္ကိုပ်ဗိုလ်ဇၞော် နဝ်ဗူ ညးတာလျိုၚ်လလောၚ်ပရိုၚ် ဂကောံဗၠးၜးကောန်ဂကူကချေၚ် (KIO) ဟွံအောန်နူ (၅) ဝါကီုလေဝ် ကေတ်လဝ်အဆက် ဟွံဂွံရ။
နကဵုကံၚ်ဇြဳပၞာန်ဂှ် ကြဴနူဒးဒုၚ်သီကေတ်လဝ်ဗဒိုပ်တုဲ နူကဵုဂိတုအံက်တဝ်ဗာ စၟတ်တ္ၚဲ (၃၁) အခိၚ်ဒေါဝ်တ္ၚဲ စဵုကဵုစိုပ်အခိၚ်ဗ္တံဂှ် ပန်ဖျေံလဝ်လွဟ်ဇၞော် ပ္ဍဲမွဲပွဳပွိုၚ်လိုၚ်ဇြာ အဆက်ဆက်တုဲ သီုဂြာတ်ထောံဖျေံလဝ်ဗုမ် ကဵုက္ၜၚ်ကျာ ဗတိုက်လဝ်ရဂှ် ဓမံက်ထ္ၜးလဝ် ပ္ဍဲဌာန်ပရိုၚ်ဒေသတအ်ရ။
ဟိုတ်နူပရေၚ်ဗတိုက်ပန်ကံၚ်ဇြဳပၞာန် ဗီုလၟုဟ်ဏံတုဲ သ္ၚိဒၟံၚ်ညးဍုၚ်ကွာန် နူလ္ပာ်ကွာန်ဂျာထ ၆ မ တူပၟတ် ဒှ်အာပတေၚ်ရဂှ် ညးတာလျိုၚ်လလောၚ်ပရိုၚ် KIA သ္ကိုပ်ဗိုလ်ဇၞော်နဝ်ဗူ ဟီုလဝ်ကဵု ဌာန်ပရိုၚ်သြၚ်လောန်မ် တ္ၚဲတုဲကၠုၚ်တေံ အခိၚ်ဒေါဝ်တ္ၚဲဂှ်ရ။
အတိုၚ်တၚ်လလောၚ်တြးကံၚ်ဇြဳပၞာန် လလောၚ်တြးလဝ်မ္ဂး ပ္ဍဲလ္တူဂကောံဇြဟတ်ပံၚ်ကောံ KIA လုပ်စိုပ်ဗတိုက်လဝ် ဗဒိုပ်လေဝ်လုမ် မၞုံလ္တူဂၠံၚ်ကွဳစက် မျေတ်ဂျဳနာ – ဗာန်မဝ် ပ္ဍဲဂိတုအံက်တဝ်ဗာ စၟတ်တ္ၚဲ ၆ တေံဂှ် နကဵုဒပ်ပၞာန် ဆက်စၠောံလဝ် နူကဵုဂကောံကၠောန်ဗဒှ်ပရေၚ်သဳကၠဳ ဓဝ်ၜိုဟ်လလံမဆေၚ်စပ် (Peace Talk Creation Group) ရဂှ် ဟီုလဝ်ရ။
ပ္ဍဲကဵုဂၠံၚ်ဍာန်ညးဍုၚ်ကွာန်တအ် သုၚ်စောဲဒၟံၚ် ဗီုလၟုဟ်ဏံ ညံၚ်ဟွံဂွံထပ်ကလေၚ်ကၠောန် ပွပ္ကီုပရာပ်ကီု ယဝ်ရထပ်ကၠောန်ကၠုၚ် ပွပ္ကီုပရာပ်မ္ဂး နကဵုဒပ်ပၞာန် သွက်ဂွံအေၚ်ဒုၚ်မာန်အိုတ်အစောန်တုဲ ကၠောန်သ္ပအာ ပရေၚ်ကလေၚ်ပလန်တဲ ဗွဲမဗဗွဲရောၚ်ဂှ် ကဵုလဝ်သမ္တီ ကလေၚ်လဝ်ပရိုၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးကံၚ်ဇြဳပၞာန်ရ။
ပ္ဍဲဂိတုနဝ်ဝေမ်ဗာ စၟတ်တ္ၚဲ (၁) ဂှ်လေဝ် ပ္ဍဲမွဲပွဳဗွိုၚ်ဍုၚ်လိုၚ်ဇြာဂှ် ဒပ်ကံၚ်ဇြဳပၞာန် ထပ်ဂြာတ်ထောံဖျေံဗုမ် ဗတိုက်လဝ်တုဲ ဒတုံစှ်ေပါ်ခတိုဟ်လဝ် ဗ္ဒာဲဒဵုအလောအ်န်ဘွောမ် ( အလော့န်ဘွမ်) ရဂှ် ဂွံတီကေတ်အတိုၚ် ညးဒေသတအ်ဟီုလဝ်ရ။
ပရိုၚ် – သြၚ်လောန်တိုၚ်မ်
ဗီု – ချာန်နေဝ်တြးဝါဒကံၚ်ဇြဳပၞာန်
sanlontai