မတ်မလီု – နဝ်ဝေမ်ဗာ (၂)
ပ္ဍဲပရေၚ်ချဳဒရာၚ်ပၞာန် ၁၀၂၇ ဂကောံကောဒေံပိဂကောံ ပွိုၚ် ၅ တ္ၚဲဂှ် ပါလုပ်သီုဗဒိုပ်ဇၞော်၊ ဗဒိုပ်ဍောတ်၊ ဗဒိုပ်ပၞာန်ဆေၚ်ကဵုသွာၚ်ပၞာန် ကံၚ်ဇြဳပၞာန် အပံၚ်လၟိဟ် (၈၀)ဗဒိုပ်ပြၚ် သီုဍုၚ်ချေန်ယှိုဲဟဝ်၊ ဖောၚ်သိုၚ် ကေုာံ ဍုၚ်သိန္နဳတအ် ထိၚ်ဒဝ်လဝ် သီုဖအိုတ်မာန်ရဂှ် လလောၚ်တြးလဝ်ရ။
ပ္ဍဲဂိတုအံက်တဝ်ဗာ စၟတ်တ္ၚဲ (၃၁) အခိၚ်ဗ္တံဂှ် တၚ်ဗတိုက်ဖ္အောဝ်ဆဝ်ပ္ၚုဟ် သွက်ကောန်ဒပ်ပၞာန်ဗၟာ သၟဝ်တဲကံၚ်ဇြဳပၞာန် ဗွဲတၟေၚ်ဂးတုဲ ဓမံက်ထ္ၜးလဝ် ပ္ဍဲတၚ်လလောၚ်တြး ဂကောံမဟာမိတ်ကောဒေံပိဂကောံဂှ်ရ။
ပ္ဍဲကဵုပေါဲဗတိုက်ဆေၚ်မုက်တအ်ဂှ်လေဝ် ကောန်ဒပ်ကံၚ်ဇြဳပၞာန် ဒးချိုတ် ဂွံလဝ်ဘဲဝပ်ဗွဲမဂၠိုၚ်တုဲ လွဟ်လက်နက်မကမ် ကပေါတ်အရပ်စပ်ပၞာန် ဗွဲမဂၠိုၚ်တအ်လေဝ် သီဂွံလဝ်တုဲ ကောန်ဒပ်ကံၚ်ဇြဳပၞာန် ဟွံမိက်ချိုတ် ၁၀၀ ပြၚ်တအ်ဂှ် ဖျေံလွဟ် လုပ်စိုပ်ကၠုၚ်လဝ်ရဂှ် ဂကောံမဟာမိတ်ကောဒေံပိဂကောံ ကဵုလဝ်သမ္တီရ။
ပ္ဍဲပရေၚ်ချဳဒရာၚ်ပၞာန်ဂှ် ဆက်စၠောံကဵု ဂကောံကောဒေံတအ် ကေုာံ ကောန်ဒပ်ကြပ်ညောန်တအ်တုဲ မၞိဟ်ကၠုၚ်အပ်လွဟ်နွံဒၟံၚ်တုဲ ကောန်ဒပ်ကံၚ်ဇြဳပၞာန် ဟွံမိက်ချိုတ်အိုတ်လမျီု ပ္ဍဲကာလပရေၚ်ချဳဒရာၚ်ပၞာန်တအ်ကဵု ဆက်စၠောံကဵုဂကောံသ္ၚိကၟိန်၊ မသ၊ ကောဒေံ ကေုာံ သ္ကအ်ရဲတအ်မွဲကဆံၚ်တုဲ သွက်ဂွံတိတ်ဗၠးဂှ် ရီုဗၚ်ရေၚ်တၠုၚ်ကဵုလဝ်တုဲ ညးဗၠးတိတ်အာတအ်ဂှ်လေဝ် နွံရဂှ် ဓမံက်ထ္ၜးလဝ်ပ္ဍဲတၚ်လလောၚ်တြးရ။
သ္အာၚ်နူဂှ်ပၠန် ပ္ဍဲဂိတုအံက်တဝ်ဗာ စၟတ်တ္ၚဲ (၃၀) ဂှ် ဗဒိုပ်ကံၚ်ဇြဳပၞာန် ဇြဟတ်နွံ ၅၀ သီုအလုံမွဲဗဒိုပ်ဂှ် လ္ပာ်ဒပ်ပၠန်ဂတးတအ် ၜိုန်ရဗတိုက်သရိုဟ်ဂွံလဝ် ပ္ဍဲအပ္ဍဲပွိုၚ် (၂) နာဍဳဓဝ်ကီုလေဝ် ဟိုတ်နူဒုၚ်ကျလဝ် ဗွဲမဂတာပ်အခိၚ်တုဲ မၞိဟ်မွဲဟွံသှ်ေ ကဵုဗၠးတိတ်လဝ်နူဘဲလမျီုတုဲ ဖျေံကဵုလဝ်ဒၞာဲ ဗွဲမဂီုကၠီု ပ္ဍဲဒၞာဲဗၠးဘဲရဂှ် ဂွံတီကေတ်ရ။
နကဵုဒပ်မဟာမိတ်တအ်ဂှ် ညံၚ်တၚ်ရန်တၟံပရေၚ်ချဳဒရာၚ်ပၞာန် ဂွံအံၚ်ဇၞးမာန် ဟိုတ်နူဆက်ကၠောန်ရေၚ်တၠုၚ်အာဂှ်ရ နကဵုကောန်ဒပ်ကံၚ်ဇြဳပၞာန်တအ် သွက်ဂွံလုပ်ကၠုၚ်ဖျေံလွဟ်ညးသ္ကအ်ဂှ်လေဝ် ဗတိုက်ဖ္အောဝ်လဝ်ရ။
ပရေၚ်ဂီုကၠီုအန္တရာယ်လမျီု ညးကၠုၚ်လုပ်စိုပ်ဖျေံလွဟ်တအ်ဂှ် ကေတ်လဝ်ကဵုတာလျိုၚ် ဗွဲတၟေၚ်တုဲ ညံၚ်ဟွံဂွံဇီုကပိုက်ဒး ဂုဏ်သိက္ခာမၞိဟ် ဂုဏ်သိက္ခာကောန်ပၞာန် ရေၚ်တၠုၚ်ကဵုအာရောၚ်ဂှ် ဟီုလဝ်တုဲ ပရေၚ်ပျဲပျာံဍဵုဍိုက်၊ ကၠေက်ဒက်တအ်ဂှ်လေဝ် ကၠောန်အာဟွံသေၚ်တုဲ ညံၚ်ဂွံကလေၚ်ဆဵုဂဗ ပံၚ်ကောံကဵု ဂကောံသ္ၚိကၟိန်မသကောဒေံ ဗွဲမပြဟ်ဂှ်လေဝ် ၜိုတ်သၟဟ်အစောန် ရီုဗၚ်ရေၚ်တၠုၚ်ကဵုအာရောၚ်ဂှ် ဟီုလဝ်ရ။
သွက်ဂွံအာကၠုၚ်တရဴဴဂှ်လေဝ် ရီုဗၚ်ထံက်ပၚ်ကဵုအာ စရိတ်တရဴရောၚ်တုဲ သ္အာၚ်နူဂှ် ညးဂိယဲ ဟွံထတ်ယိုတ်တအ်ဂှ်လေဝ် မၚ်မွဲရံၚ်စံၚ်ကဵု ပရေၚ်ထတ်ယိုတ်ရောၚ်ဂှ် ကဵုလဝ်သမ္တီရ။
ပရိုၚ် – သြၚ်လောန်တိုၚ်မ်
ဗီု – 1027 operation
sanlontai