တယိတ်ချံၚ်၊ နဝ်ဝေမ်ဗာ (၂)
ဒပ်ကံၚ်ဇြဳပၞာန် မကၠုၚ်မၚ်တောပ်ဗ္တိုက် ပ္ဍဲကွာန်ပါန်ပျေန်ကျဳ၊ ပွိုၚ်ဍုၚ်တယိတ်ချံၚ်၊ ရးဒေသဇၞော်တၞၚ်သဳဂှ် ဟိုတ်နူဒးဒုၚ်ဗ္တိုက်ဗ္တိုဟ်မာၚ်ဂှ်ရ ကောန်ဒပ်ကံၚ်ဇြဳပၞာန် ၅ တၠ ချိုတ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ဂလာန်ဂကောံဒပ်စဵုဒၞါဒေသတံရ။
တုဲကၠုၚ် ပ္ဍဲဂိတုအံက်တဝ်ဗာ (၃၁) အခိၚ်ဗ္တံၜိုတ် (၉) နာဍဳဂှ် နူကဵုသၞေဟ်ကၚ်စၟဳတ် (သရက်နှစ်ခွ) ဂှ် ဂကောံဒပ်ပံၚ်ကောံစဵုဒၞါဒေသတံ ဗ္တိုက်ဗ္တိုဟ်လဝ်မာၚ် ၃ မ ကုဒပ်ကံၚ်ဇြဳပၞာန် မကၠုၚ်မၚ်တောပ်ကၚ် ဗ္ဒါဲကွာန်ပါန်ပျေန်ကျဳဂှ်ရ။
ပရေၚ်ဗ္တိုက်ဏံဂှ်ဝွံ အတိုၚ်ပရိုၚ် ကောန်ဒပ်ကံၚ်ဇြဳပၞာန်တံ ကၠုၚ်မၚ်တောပ်ဗ္တိုက်ဂှ် ဒစးဒုၚ်မၚ်လဝ်တုဲ ဟိုတ်နူဗ္တိုက်ဗ္တိုဟ်လဝ်မာၚ်ဂှ်ရ လ္ပာ်ကံၚ်ဇြဳပၞာန် ဒးဂိလဝ်ရောၚ် ကောန်ဂကောံဒပ်စဵုဒၞါဒေသမွဲတၠ ဟီုရ။
ၜိုန်ရပ္တိတ်လဝ်ဇြဟတ် သွက်ဂွံအာစိုပ်ကပှ် လွဟ်လက်နက် ကောန်ဒပ်ကံၚ်ဇြဳပၞာန် (၅) တၠ မချိုတ်အာလဝ် အပ္ဍဲကဵုဒၞါဲဂှ် အပ္ဍဲပရေၚ်ဗ္တိုက်ဗ္တိုဟ်မာၚ်ဏံဂှ်ကီုလေဝ် ဟိုတ်နူအရီုပၞာန် ဒပ်ကံၚ်ဇြဳပၞာန်တံ စိုပ်ကၠုၚ်ဂှ်ရ ဒးကလေၚ်ဆုတ်လဝ်ရောၚ် သ္ဂးရ။
ကြဴနူဂကောံတောပ်ဗ္တိုက် ကံၚ်ဇြဳပၞာန်တံ ဒးဒုၚ်ဗ္တိုက်တုဲဂှ် ဒပ်ကံၚ်ဇြဳပၞာန်ဝွံ စနူဂိတုနဝ်ဝေမ်ဗာ (၁) အခိၚ်နူဂယးပြဟ်ဟ်ဂှ်တုဲ ထ္ပက်ကရောၚ်ပၞာန် လုပ်စိုပ်ကၠုၚ် လ္ပာ်ကွာန်ဝေန်ဝ၊ ဇြုံဇြေန်ဖျာ၊ တေဝ်ချံၚ်ကျဳ မၞုံပွိုၚ်ဍုၚ်တယိတ်ချံၚ်ရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ ပ္ဍဲကဵုတ္ၚဲဂှ် စဵုကဵုလ္ဒေါဝ်တ္ၚဲ ၁ နာဍဳဂှ် ပေါဲဗ္တိုက်ၜါလ္ပာ်တံ က္တဵုဒှ်လဝ် ဟွံမွဲကီုလေဝ် ညးဒေသလ္ၚဵု ဒစးဒုၚ်ဂြိပ်ဒဴပါဲဒလေတ်ဒၟံၚ်တံ နွံဒၟံၚ်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုအံက်တဝ်ဗာ (၁၇) ဂှ်လေဝ် ပ္ဍဲပွိုၚ်ဍုၚ်တယိတ်ချံၚ် အကြာကွာန်ကတောဲကဵု ကွာန်ဝေန်ဝတံဂှ် ဟိုတ်နူကရောၚ်ပၞာန်ကံၚ်ဇြဳပၞာန် ဒးဒုၚ်ကြတ်ဗ္တိုက်လဝ်အကြာဂၠံၚ်ဂှ်ရ ကောန်ဒပ်ကံၚ်ဇြဳပၞာန် ဟွံအောန်နူကဵု ၁၀ တၠ ဇီုကပိုက်ချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai