ၜက်ကၠုၚ်တိဍာ်မ္ဂး ဗ္တိုက်ပ္တိတ်အာဏောၚ် UWSA ကဵုသတိ

ပါန်သာန်၊ နဝ်ဝေမ်ဗာ (၂)

စပ်ကဵုပေါဲဗ္တိုက် ရးသေံသၟဝ်ကျာဂှ်တုဲ တရဴတိုက်၊ တရဴကျာတံ ယဝ်ရၜက်ၜေတ်ကၠုၚ်တိဍာ် စပ်ကဵုပရေၚ်ပၞာန်နွံမ္ဂး ကလေၚ်ပၠန်ဗ္တိုက်ပ္တိတ်အာဏောၚ်ဂှ် ပ္ဍဲဂိတုနဝ်ဝေမ်ဗာ ၁ တေံ ဗော်ညဳသၟဟ်ရး “ဝ” (UWSP/UWSA) လလောၚ်ပ္တိတ်လဝ်ရ။

နကဵုဂကောံဒပ် “ဝ” တံ ရပ်စပ်မူဟွံဗက်လ္ပာ်ဂှ်တုဲ အပ္ဍဲပေါဲဗ္တိုက်ရးသေံသၟဝ်ကျာဂှ် လ္ပာ်လဵုမှ ပါလုပ်ဗ္တိုက်အာ ဟွံသေၚ်တုဲ နကဵုဂကောံဇြဟတ် မပါလုပ်ဒၟံၚ် အပ္ဍဲပဋိပက္ခတံဂမၠိုၚ် သွက်ဂွံဆဵုဂဗသဳကၠဳ ပရေၚ်ဒေါအ်ပန်ပှော်အိုတ်ဂှ် ဖ္တိုက်ဖ္အောဝ်လဝ်ရ။

UWSA ဂှ် စဵုဒၞါကဵုအာ ဂီုကၠီုတိဍာ်၊ ဒြပ်ရတ်သ္ၚိသွဝ်ညးဍုၚ်ကွာန်တံ ကေုာံ ပရေၚ်ဂီုကၠီု အပ္ဍဲတွဵုရးတံဏောၚ်ဂှ်လေဝ် ကဵုလဝ်သမ္တီရ။

သ္အာၚ်နူဂှ်ပၠန် ညးဍုၚ်ကွာန် ပါဲဒဴကၠုၚ်ဘဲပၞာန် ဒေသ “ဝ” တံဂှ် လ္ဂောံကဵုပရေၚ်ဗ္စာရဏာမၞိဟ်တံမ္ဂး သွက်ဂွံဖျေံကဵုဒၞါဲ မသက္ကုၚုဟ်ဂှ်ကဵု ပွမမၚ်မွဲရီုဗၚ်တံဂှ် ကၠောန်ၜိုတ်ကဵုအာဏောၚ် ပါလုပ် ပ္ဍဲတၚ်လလောၚ်တြးဂှ်ရ။

စပ်ကဵုတၚ်လလောၚ်တြးဏံဂှ်တုဲ သြၚ်လောန်တိုၚ်(မ်) ဆက်စၠောံသၟာန်သၟုက်လဝ် ညးဒုၚ်တာလျိုၚ် ရုၚ်ဆက်ဆောံ ဍုၚ်လာယှိုဝ် UWSA ဥူညဳရာမ်ဂှ် ကလေၚ်ခၠေဝ်ကၠုၚ်လဝ် “အတိုၚ်တၚ်လလောၚ်တြးဂှ်ရ” သာ်ဝွံ မဒှ်ရ။

အပ္ဍဲချဳဒရာၚ်ပၞာန် ၁၀၂၇ မဟာမိတ်ကောဒေံပိဂကောံတံ ဂွံ ၅ တ္ၚဲဂှ် ပ္ဍဲကဵုဍုၚ်လာယှိုဝ်၊ ကောတ်ခိုၚ်၊ ကျံက်မေဝ်၊ သိန္နီ၊ မိုဝ်ကုတ် ကေုာံ ပ္ဍဲကဵုဍုၚ်မူဇြေဝ်တံဂှ် ညးဍုၚ်ကွာန်ပါဲဒဴဘဲပၞာန် မွဲဠက်ပြၚ် နွံတုဲ ကောန်ၚာ်အယဲဟွံစိုပ် ၅ တၠပါလုပ်ဂှ် ၁၁ တၠ ဒးချိုတ်အာလဝ်ရောၚ် ဒပ်ပၞာန်တအာၚ် TNLA လလောၚ်ပ္တိတ်လဝ်ရ။

UWSP/ UWSA ဝွံ အုပ်ဓုပ်ဒၟံၚ် တွဵုရးဝ နကဵုပရေၚ်အုပ်ဓုပ်အပိုၚ်၊ ပရေၚ်စဳရေၚ်သၞောဝ်အပိုၚ်တံဂှ်တုဲ ဒှ်ဂကောံရပ်လွဟ်ကောန်ဍုၚ်အရၚ်ဇြဟတ်ဇၞော် မပိုၚ်ပြဳလဝ် လွဟ်လက်နက်စပ်ကဵုပရေၚ်ပၞာန်ဂတာပ်ခေတ် ဗွဲမဂၠိုၚ်ဂၠေၚ်မွဲရောၚ် မဒှ်ရ။

ပရိုၚ်−သြၚ်လောန်တိုၚ်(မ်)

ဗီု−EPA/ Wa Channel