ညံၚ်လေဝ်ပေန်၊ နဝ်ဝေမ်ဗာ (၂)
ပ္ဍဲခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် ပေါဲဗ္တိုက်ဟွံမွဲမွဲသာ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံတုဲ ကောန်ၚာ်အာယုက်မွဲသၞာံဘာ်မွဲတၠ ပါလုပ်ဂှ် ညးဍုၚ်ကွာန်ကောန်အရာပ် ၈ တၠ ကလိဂွံလဝ်ဝပ်ရောၚ် ပ္ဍဲဂိတုအံက်တဝ်ဗာ (၃၁) တေံ KNU ဗဟဵု လလောၚ်ပ္တိတ်လဝ်ရ။
တုဲကၠုၚ် ပ္ဍဲဂိတုအံက်တဝ်ဗာ ၃၀ တေံ ၜိုတ်အခိၚ်ဇိုၚ်သဝ်တ္ၚဲ ၃ နာဍဳကဝိုက်ဂှ် ပေါဲဗ္တိုက်ဟွံမွဲမွဲသာ် နူကဵုတမ်ဒပ်ကံၚ်ဇြဳပၞာန် စၟတ် (၂၆၄) ဖျေံသ္ဇိုၚ်ပွိုၚ်ဍုၚ်ကျံက်ကျဳ ခရိုၚ်ညံၚ်လေဝ်ပေန် KNU ဂှ် ပန်ပှော်စုတ်လဝ် လွဟ်ဇၞော် ၂ မ ပ္ဍဲကဵုကွာန်ဒံၚ်ခေန်ရ။
ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ကောန်ကွာန်ဒံၚ်ခေန်ဂမၠိုၚ် မအိယှိုဲဇြေန် အာယုက် ၁၃ သၞာံ၊ မတောန်ယှိုဲဇြေန် အာယုက် ၁၅ သၞာံ ကေုာံ ညးဒေသဂမၠိုၚ် ဒဝ်တေတေ၊ ဥူထိုဲတေန်တံ ကလိဂွံလဝ်ဝပ်မကမ်ညးသ္ကအ်အိုတ်ရ။
ပ္ဍဲကဵုတ္ၚဲဂှ်ရ နူကဵုဒပ်ကံၚ်ဇြဳပၞာန်တံ နကဵုတၚ်ရန်တၟံနွံနွံ ပန်ပှော်စုတ်လဝ် လွဟ်ဇၞော် ဟွံအောန်နူကဵု ၁၉ မ ပ္ဍဲကဵုကွာန်ပျေန်ယျေကျဳ၊ ဂွဵုကုန်၊ ယျေဖျူကာန်၊ ညံၚ်ပေန်ကျဳ ကေုာံ ပ္ဍဲကဵုကွာန် (မီးလောင်းကုန်း) မၞုံပွိုၚ်ဍုၚ်ယှိုဲကျေန် KNU တံဂှ်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်ဂှ်ရ မာၚ်မေန်ခဇြဝ် အာယုက်မွဲသၞာံဘာ်ပြၚ်၊ မယျောန်န် အာယုက် ၃ သၞာံ ဒၟံၚ်ကွာန်ယျေဖျူကာန်တံ ပါလုပ်ဂှ် ညးဒေသ ၄ တၠ ထပ်ကလိဂွံလဝ်ဝပ်ရ။
တုဲကၠုၚ် ပ္ဍဲဂိတုအံက်တဝ်ဗာ ၂၈ တေံဂှ်လေဝ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် အပ္ဍဲပွိုၚ်ဍုၚ်မုၚ် KNU တံဂှ်တုဲ ညးဍုၚ်ကွာန်ဒေသ ၂၀၀၀ ပြၚ် နူကဵုကွာန် ၅ ကွာန် ပါလုပ်သီုကဵုကွာန်ကျံက်ကျဳပံက်၊ သာပ်မာန်ပံက်တံဂှ်ဝွံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်တၚ်လလောၚ်တြး KNU ရ။
ပ္ဍဲတိဍာ် ဒပ်မဟာ (၃) ခရိုၚ်ညံၚ်လေဝ်ပေန် KNU ဂှ် အပ္ဍဲကာလဒပ်ပၞာန်သီအဝဵုဏံ မ္ၚးနူကဵုပေါဲဗ္တိုက်ၜါလ္ပာ်ဂှ် ဟိုတ်နူပြဝ ဝးပ္ကဝ်အခေါၚ်အရာမၞိဟ် ဒပ်ကံၚ်ဇြဳပၞာန်တံဂှ်တုဲ ညးဍုၚ်ကွာန်ဒေသ ၜါကိုဋ်ပြၚ် ဒးဂြိပ်ဒဴပါဲဒလေတ်ဒၟံၚ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံဖိုဟ်ဂှ် ဗော်သွးမှာဇန်ကရေၚ်တံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−KNU
sanlontai