ဗ္ဒိုပ်ညးဒဒိုက်ဂါဇြာ ဒးဒုၚ်ဗ္တိုက်တုဲ ပါလုပ်သီုကဵုဟာမာသ်ကောန်မာန်ဒါဂှ် အပံၚ်မၞိဟ် ၅၀ ချိုတ်အာ

ဂျေရုသလေန်၊ နဝ်ဝေမ်ဗာ ၂

အပ္ဍဲပရေၚ်ဗ္တိုက် ဗ္ဒိုပ်ညးဒဒိုက် ဂျာဗာလဳယာ ဂၠိုၚ်ကဵုလၟိဟ်မၞိဟ်မတန်တဴ ပ္ဍဲဒေသဂါဇြာ နကဵုတရဴကျာဂှ် ပါလုပ်သီုကဵုဟာမာသ်ကောန်မာန်ဒါမွဲတၠ အဳဗရာဟေန်ဘိုၚ်ရာရဳဂှ် အပံၚ်မၞိဟ် ၅၀ တၠ ချိုတ်အာလဝ်ရောၚ် ဂကောံဒပ်စဵုဒၞါအေဿရေ (IDF) လလောၚ်ပ္တိတ်လဝ်ပရိုၚ်ရ။

အဳဗရာဟေန်ဘိုၚ်ရာရဳ ဟာမာသ်ကောန်မာန်ဒါ မဒးချိုတ်အာလဝ်ဂှ်ဝွံ ဒှ်ညးဒးဒုၚ်စောဲစပ်လဝ် နဒဒှ်မၞိဟ်စဳဇန် ပ္ဍဲကဵုပရေၚ်ဗ္တိုက် အေဿရေတံ မဒးဂိအာလဝ် ပ္ဍဲဂိတုအံက်တဝ်ဗာ ၇ တုဲကၠုၚ်တေံဂှ်ရ။

ဟိုတ်နူပရေၚ်ဗ္တိုက်တရဴကျာ အေဿရေတံဂှ်တုဲ လ္ပာ်ပါလက်သတိုၚ် အောန်အိုတ် ၅၀ ဟွံက ချိုတ်အာလဝ်ဂှ် သၞာဲဒဴပရေၚ်ထတ်ယုက် ပါလက်သတိုၚ်တံ သ္ပဒတန်လဝ်တုဲ ဂကောံဟာမာသ်ဂှ် ဒဒှ်ရကောန်မာန်ဒါညးတံ ဒးဒုၚ်ဂစိုတ်ဂှ် ကယျာန်ပါဲလဝ်ရ။

ဒုသ္ကိုပ်ဗိုလ်ဇၞော် ဂျိုဝ်နတာန်ကောန်ရဳကာတ် ညးမၞုံအခေါၚ်ဟီုဂး ဂကောံဒပ်စဵုဒၞါအေဿရေ (IDF) ဂှ် ညးမချိုတ်အာဂမၠိုၚ်ဝွံ ဒှ်သၟာဗ္တိုက် ဟာမာသ်တံသၟးရတုဲ အခိၚ်ထီုသၟဝ်တိ လာ်စှ်ေအာဂှ် ဒးချိုတ်အာလဝ် အပ္ဍဲပရေၚ်ဗ္တိုက်ဂှ်ရ။

သ္အာၚ်နူဂှ်ပၠန် ဂျာဗာလဳယာ မစၟတ်လဝ် နဒဒှ်ဗ္ဒိုပ်ညးဒဒိုက်ဂှ် ဂကောံဟာမာသ် ရပ်စပ်ဒၟံၚ် နဒဒှ်တမ်ဒပ်ဌာန်ဂအုပ်ရောၚ် သာ်ဝွံ စောဲစပ်လဝ်တုဲ ပ္ဍဲဒၞါဲလ္ၚဵုတံဂှ်လေဝ် ကောန်ဒပ်ဗလးတိတံ ထိၚ်ဒက်လဝ်ရောၚ် သ္ဂးရ။

အပ္ဍဲချဳဒရာၚ်ပၞာန်ဏံဂှ် အခိၚ်ပ္တိတ်ဇြဟတ် သွက်ဂွံသီဗ္ဒိုပ်ဟာမာသ်ပၟိက်ဇၞော် မၞုံပ္ဍဲဂျာဗာလဳယာမွဲဂှ် ကောန်ဒပ်ညးတံၜါတၠ ဒးချိုတ်အာလဝ်ရောၚ် ဂကောံဒပ်စဵုဒၞါအေဿရေ သ္ပဒတန်လဝ်ရ။

ညးမချိုတ်အာ အပ္ဍဲပရေၚ်ဗ္တိုက်ဂှ်ဝွံ ဒဒှ်ရဒှ်ကောန်အရာပ်ရောၚ် ဂလာန်ဟာမာသ်တံဂှ်လေဝ် လ္ပာ်အေဿရေ တးပါဲလဝ်တုဲ ကၠာဂွိုအ်ကၠောန်သ္ပပရေၚ်ဍိုက်ဗ္တိုက်ဂှ် သွက်ညးသ္ပဒတဴ ပ္ဍဲကဵုဒေသတံဏံ ဂွံဗၠးဘဲဂှ် ကော်လဝ် သွက်ဂွံဆုဲပြံၚ် လ္ပာ်သၠုၚ်ကျာတေံတုဲယျဂှ် ကလေၚ်ခၠေဝ်ပၠန်လဝ်ရ။

Ref: The Week Magazine