မတ်မလီု၊ နဝ်ဝေမ်ဗာ (၃)
တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ကွာန်ကျောန်တဝ်၊ လ္တူဂၠံၚ်ဇၞော် လဂုၚ်-မတ်မလီုဂှ် ကွဳစက်ညးအာတရဴမွဲဖ္ဍိုက် ဟိုတ်နူဒးဒုၚ်ဗတိုက်လဝ်တုဲ ညးအာတရဴ ပါဗက်ကၠုၚ်ကွဳစက်ဂှ် (၈) တၠ ဒးလဝ်ဘဲဝပ်ရဂှ် ညးဒေသကီု သီုဂကောံရီုဗၚ်ဟံၚ်ပြာ်မၞိဟ်တအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကွဳစက်ကၟာတ်စဵုဒ္ၚောဝ် ပ္ဍိုက်ညးအာတရဴဴ ယာဉ်လိုၚ်တရဴဇမ္ၚောဲ “အောၚ်ကျဝ်မိုဝ်” ဂှ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁) အခိၚ်ဗ္တံၜိုတ် ၉ နာဍဳကဝက် နူကျာ်ထဝ် ဃောဒဳလုပ်ကၠုၚ် လ္ပာ်ဍုၚ်မတ်မလီုဂှ် ဒးဒုၚ်ဖံက်ခတိုဟ်လဝ်မာၚ် ဗ္ဒာဲဆေၚ်ကၠေၚ် PT Power ရ။
ဟိုတ်နူဒးဒုၚ်ဖံက်ခတိုဟ်လဝ်မာၚ်တုဲ မၞိဟ်တြုံ (၄) တၠ ကေုာံမၞိဟ်ဗြဴ (၄) တၠ အပံၚ်မၞိဟ် ဍိုက်ပါဗက်ကၠုၚ်ကွဳစက်ဂှ် (၈) တၠ ဒးလဝ်ဘဲဝပ်တုဲ ပ္ဍဲကဵုဂှ် မၞိဟ်တြုံဒးလဝ်ကဝေက်မာၚ်ပ္ဍဲဗုၚ်မွဲတၠဂှ်မ္ဂး အကာဲအရာဒးဒှ်ဓဝိၚ်နွံဒၟံၚ်ရဂှ် ဂွံတီကေတ်ရ။
ကွဳစက်ညးအာတရဴဴ ဒးဒုၚ်ဖံက်ခတိုဟ်လဝ်မာၚ်ဏံ ညးဍုၚ်ကွာန်အာတရဴ (၄၀) တၠ ဍိုက်ပါဗက်ကၠုၚ်တုဲ ပ္ဍဲကဵုပရေၚ်ပရောဏံ ညးအာတရဴ ဒးလဝ်ဘဲဝပ်တအ်ဂှ်မ္ဂး ပလံၚ်ဗစိုပ်လဝ် ရုၚ်ဂဥုဲညးဍုၚ်ကွာန်ခရိုၚ်သဓီုရဂှ် ဂကောံရီုဗၚ်ဟံၚ်ပြာ်မၞိဟ်တအ် ဟီုလဝ်ရ။
ပ္ဍဲကဵုဂၠံၚ်ကွဳစက် လဂုၚ်-မတ်မလီု ကွဳစက်ပ္ဍိုက်ညးအာတရဴကီု သီုကွဳစက်ပ္ဍိုက်ဗၞိက်တအ် ဒးဒုၚ်ဗတိုက်ဒၟံၚ်ဂှ် ပ္ဍဲမွဲကာလသီအဝဵုဏံ ပရေၚ်ပန်ပှော် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတအ် ဒှ်ဒၟံၚ်ခြာဟွံဟွံလအ်ရ။
အတိုၚ်တၚ်ဂၞၚ်သြၚ်လောန်တိုၚ်မ် ပကောံပကေဝ်ဂွံလဝ်မ္ဂး ပ္ဍဲမွဲကာလသီအဝဵုဏံ ပ္ဍဲဂၠံၚ်ကွဳစက်လဂုၚ်-မတ်မလီုဂှ် အကြာပေါဲဗတိုက်ၜါလ္ပာ်ဂှ် ကောန်အရာပ်ညးဍုၚ်ကွာန် ဟွံအောန်နူ (၂၀) တၠ ဒးချိုတ်လဝ်တုဲ ဒးလဝ်ဘဲဝပ် ဗ္ဒာဲ (၆၀) တၠ နွံရ။
ပရိုၚ် – သြၚ်လောန်တိုၚ်မ်
ဗီု – မဳဒဳယာတြးဝါဒကံၚ်ဇြဳပၞာန်
sanlontai