လှာဒကှ်၊ နဝ်ဝေမ်ဗာ (၂)
လ္တူဍုၚ်လှာဒကှ် တွဵုရးကရေၚ်ဂှ် ပ္ဍဲကဵုပေါဲဗတိုက် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတး ပ္ဍဲဂိတုနဝ်ဝေမ်ဗာ စၟတ်တ္ၚဲ (၂) သ္ပတံနူ အခိၚ်နူဂယး (၅) နာဍဳဂှ် ပရေၚ်ဇီုကပိုက်ချိုတ်ဂျိုၚ် သီုၜါလ္ပာ် နွံဒၟံၚ်ရဂှ် ဂွံတီကေတ် အတိုၚ်ညးဒေသတအ် ဟီုလဝ်ရ။
ပေါဲဗတိုက်ဂှ် နူကဵုဂကောံဇြဟတ်ပၠန်ဂတးတအ် လုပ်စိုပ်ဗတိုက်လဝ် ပ္ဍဲဗဒိုပ်ဗၠာဲသၟိၚ်သၟဝ်တဲကံၚ်ဇြဳပၞာန်၊ ဌာန်ဂအုပ်တံဒပ် ကေုာံ ဒၞာဲဒပ်ကံၚ်ဇြဳပၞာန်တအ် ဖျေံလဝ်ဗဒိုပ်တအ်တုဲ ပေါဲဗတိုက်ၜါလ္ပာ်သ္ကာတ်မြဟ်က္တဵုဒှ်လဝ်ရ။
ဟိုတ်နူပေါဲဗတိုက်ၜါလ္ပာ်တုဲ ဒၟာနူမကမ်လွဟ်ဇၞော် ဒတုံစှ်ေပါ်ခတိုဟ်လဝ် ပ္ဍဲအရာပ်မၞိဟ်မံၚ်တအ်တုဲ ကောန်အရာပ်လ္ၚဵု ဇီုကပိုက်ဒးလဝ် နွံတုဲ စမြိုၚ်သ္ၚိဒၟံၚ်တအ်လေဝ် ဇီုကပိုက်ဒးလီုလာ်လဝ် နွံရ။
ပ္ဍဲပေါဲဗတိုက်ဂှ် ဒပ်ကံၚ်ဇြဳပၞာန် ကၠုၚ်ပန်ရီုလဝ်ကဵုက္ၜၚ်ကျာ အခိၚ်နူဂယး ၜိုတ် (၁၀) နာဍဳကဝက်ဂှ်တုဲ အခိၚ်ဇိုၚ်သဝ်တ္ၚဲဂှ်မ္ဂး ပေါဲဗတိုကတ် ကလေၚ်ညိၚ်ဝတ်အာလဝ်ရဂှ် ညးဒေသတအ် ဟီုလဝ်ရ။
အတိုၚ်ပရိုၚ်ပ္ဍဲဗလးမုက်တိမ္ဂး ပရေၚ်ဇီုကပိုက်ၜါလ္ပာ် ၜိုန်နွံဒၟံၚ်ကီုလေဝ် လၟိဟ်ချိုတ်တ်ပၠိုတ်တ်ဂှ် နကဵုသြၚ်လောန်တိုၚ်မ် ဃောလ္ၚတ်ဂၠိုက်ဂၠာဲဒၟံၚ်ဖိုဟ်ရ။
ညးဒေသတအ်လေဝ် ဟိုတ်နူပေါဲဗတိုက်ၜါလ္ပာ်သ္ကာတ်မြဟ်ဒၟံၚ်တုဲ ညံၚ်ဟွံဂွံသ္ပ ပရေၚ်အာကၠုၚ် ပ္ဍဲလ္ပာ်ဂၠံၚ် လှာဒကှ်-ကျာ်ပိဂှ်ကီု ပၟိက်ဟၟဲမ္ဂး လ္ပတိတ်တရဴကီုဂှ် ဗတိုက်ဖ္အောဝ်လဝ်ရ။
လ္တူဍုၚ်လှာဒကှ်ဂှ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁) အခိၚ်ဗ္တံဂှ်လေဝ် နူတံဒပ် ခလရ -၂၈၄ ကံၚ်ဇြဳပၞာန် ဖျေံသ္ဇိုၚ်ပ္ဍဲဍုၚ် ပန်ဖျေံဒၟံၚ်လွဟ်ဇၞော်ကြာန်န် နွံလဝ်တုဲ ပ္ဍဲလ္ပာ်ကွာန်ခုက်ခွာ မၞုံလ္တူဂၠံၚ်လှာဒကှ်-ကြုၚ်ဒဵုဂှ်လေဝ် ပေါဲဗတိုကတ်ဆေၚ်မုက်ၜါလ္ပာ် ဒှ်လဝ်နွံရဂှ် ဂွံတီကေတ် နူတံရိုဟ်တၚ်ဂၞၚ်ပရိုၚ်ဗလးမုက်တိတအ်ရ။
ပ္ဍဲပွိုၚ်ဍုၚ်လှာဒကှ် တိဍာ်ဒပ်မဟာ ၆ KNU ဂှ် ပ္ဍဲဂိတုအံက်တဝ်ဗာ တုဲကၠုၚ် စၟတ်တ္ၚဲ (၂၄) တေံဂှ်လေဝ် အကြာဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်ကဵု ဒပ်ပံၚ်ကောံပၠန်ဂတးတအ် ပေါဲဗတိုက်ဆေၚ်မုက် သ္ကာတ်မြဟ်လဝ် ဗ္ဒာဲဍုၚ်ကြုၚ်ဒဵုရ။
ဟိုတ်နူပေါဲဗတိုက်ဒှ်လဝ် ပ္ဍဲဒေသကြုၚ်ဒဵုတုဲ ညးဒေသ နူကွာန်ဟွံအောန်နူ (၅) ကွာန်တအ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲတုဲ စဵုကဵုအခိၚ်လၟုဟ်ဏံ ဟွံဂွံကလေၚ်စဴဌာန်ဒၟံၚ်ဏီရဂှ် ဂွံတီကေတ် နူညးဒေသတအ်ရ။
ပရိုၚ် – သြၚ်လောန်တိုၚ်မ်
ဗီု – Lion Battalion တပ်ခွဲ (၃)
sanlontai