မတ်မလီု – နဝ်ဝေမ်ဗာ (၃)
ဝန်ဇၞော်ဥူအောၚ်မျိုဝ်မေန်၊ ဒုဝန်ဇၞော်ဥူအောၚ်ကျဝ်မိုဝ် ဌာနဝန်ဇၞော်အခေါၚ်အရာမၞိဟ် အလဵုအသဳညဳသၟဟ်ကောန်ဂကူ၊ ညးကဵုကသပ်သမ္မတ ကေုာံ ညးမၞုံအခေါၚ်ဟီုဂးရုၚ်သမ္မတ ဥူကျဝ်ဇြဝ်တအ်ဂှ် ဆဵုဂဗသဳကၠဳလဝ်ကဵု ဝန်ဇၞော်ဍုၚ်သ္အာၚ်ကနေဒါကီု သီုကဵုညးတာလျိုၚ်တအ်ရ။
ပ္ဍဲပေါဲသဳကၠဳဂှ် သဳကၠဳလဝ် ပရောပရောမမပ္တံကဵု အကာဲအရာက္တဵုဒှ်ဒၟံၚ် ပ္ဍဲကၟိန်ဍုၚ်ဗၟာနာနာကီု၊ ပရေၚ်ဓမံက်ရုပ်ရဴ ASEAN Five Points Consensus ကီု၊ ပရေၚ်ဖျေံစၟတ်သမ္တီတပ်ဒဏ်ကေတ်အရေဝ်ကံၚ်ဇြဳပၞာန် သာတုဲ ဂွံစိုပ်တရဴဴကီုတအ်ရ။
ကၟိန်ဍုၚ်ကနေဒါဂှ် ဒှ်ကၟိန်ဍုၚ်မိဿဟာဲကၟိန်ဍုၚ်ဗၟာ မွဲကၟိန်ဍုၚ်တုဲ ကိစ္စပရေၚ်ရီုဗၚ်ရေၚ်တၠုၚ်ဒၟံၚ်တအ်ဂှ် ကၠေံစိုတ်ကၠောန်ရေၚ်တၠုၚ်ဒၟံၚ်တုဲ သာတုဲ ဂွံစိုပ်တရဴမာန် နဲကဲဂၠံၚ်တရဴဂွံရီုဗၚ်တအ်ဂှ်လေဝ် ဂၠာဲဒၟံၚ်တုဲ နကဵုအလဵုအသဳ အကြာတၚ်အပိုၚ်ခြာမနွံဒၟံၚ် ကိစ္စကၠောန်ကဵုမာန်ဂှ် သွက်ဂွံကၠောန်ကဵု နွံဒၟံၚ်ဒတုဲရဂှ် ဒုဝန်ဇၞော်ကနေဒါ Morrison ဟီုလဝ်ရ။
ဂကောံညးစၞး NUG ဂှ်မ္ဂး ပါဲနူပရေၚ်ကေတ်အရေဝ်တပ်ဒဏ်ကၟာတ်လဒဵုဖျေံလဝ်လ္တူကံၚ်ဇြဳပၞာန်လၟုဟ်ဏံတုဲ သွက်ဂွံပံၚ်တောဲ ဖျေံအာ အကြာကၟိန်ဍုၚ်ထံက်ဂလာန်ကဵုဇြဟတ် ပရေၚ်ကၟိန်ဍုၚ်ဗၟာ လ္တူပရေၚ်တပ်ဒဏ် ကၟာတ်လဒဵုကေတ်အရေဝ် သာတုဲ ဂွံစိုပ်တရဴမာန် သဳကၠဳလဝ်ရဂှ် ဂွံတီကေတ်ရ။
သ္အာၚ်နူဂှ်ပၠန် သွက်ဂွံကဵုအာထံက်ပၚ် အရီုဗၚ်နဲကဲကွတ်ပညာ နွံဒၟံၚ်ပၟိက် ပ္ဍဲပရေၚ်အုပ်ဓုပ်၊ ပရေၚ်အုပ်ဓုပ်သၞောဝ်ဓဝ်တအ်ဂှ်လေဝ် ဗတိုက်ဖ္အောဝ်လဝ်ရဂှ် ဟီုလဝ်ရ။
သွက်ဂွံဓမံက်ပ္တိုန်ကဵုဓဝ်ဍာံ သွက်ညးဍုၚ်ကွာန် ကောန်ကၟိန်ဍုၚ်ဗၟာ ဒးဒုၚ်ဖံက်ပ္ကဝ်ဒၟံၚ်အခေါၚ်အရာမၞိဟ်တအ်ဂှ် နကဵုအလဵုအသဳကနေဒါ သွက်ဂွံဘိုၚ်ကရိုၚ်ပ္တိတ်ကဵုဇြဟတ်ကီု၊ သွက်ဂွံထံက်ကဵုဂလာန် တၚ် NUG ပ္တိတ်ဇြဟတ်ကၠောန်ရေၚ်တၠုၚ်ဒၟံၚ် သွက်ဂွံစောဲဂဗုတ် ကုကံၚ်ဇြဳပၞာန် ပ္ဍဲရုၚ်သၞောဝ်ဓဝ်ကၟိန်ဍုၚ်နာနာဂှ်လေဝ် ဂကောံညးစၞးဂှ် ဟီုလဝ်ရ။
ဂကောံညးစၞး NUG ဆဵုဂဗသဳကၠဳလဝ် ပ္ဍဲကၠတ်ထဝ်ကနေဒါၜါတန်ကီုတုဲ ကဵုတွဳဗွိုၚ်ကောန်ကၟိန်ဍုၚ်ဗၟာစိုပ်ကနေဒါတအ်လေဝ် ကၠောန်လဝ်ပေါဲသဳကၠဳရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
ဗီု – NUG
sanlontai