ဒဒှ်ရဒးဒုၚ်သီလဝ်ဍုၚ် ပိဍုၚ်ဂှ် ကံၚ်ဇြဳပၞာန်ဒုၚ်ဝန်

မတ်မလီု – နဝ်ဝေမ်ဗာ (၃)

ဟိုတ်နူဂကောံမဟာမိတ်ကောဒေံ (၃) ဂကောံထ္ပက်ပၞာန်ဗတိုက်လဝ် ပ္ဍဲတွဵုရးသေံသၟဝ်ကျာတုဲ ဒးဗလးလဝ်တဲ ဍုၚ်ချေန်ယှိုဲဟဝ်၊ ဖောၚ်ဇြိုၚ် ကေုာံ ကျူကုတ် (ပါန်ဇြိုၚ်)တအ်ရဂှ် ညးမၞုံအခေါၚ်ဟီုဂးကံၚ်ဇြဳပၞာန် ဂအုပ်ဗိုလ်ဇြဝ်မေန်ထောန် ဒုၚ်ဝန်ဟီုဂးလဝ်ရ။

ပ္ဍဲပေါဲသောၚ်ကလးပရိုၚ်ကံၚ်ဇြဳပၞာန် ကၠောန်ဗဒှ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁) တုဲကၠုၚ်တေံဂှ် ညးဟီုလဝ်သာ်ဏံရ။

“အခိၚ်လၟုဟ်ဏံ အလဵုအသဳပိုဲကီု၊ ဂကောံအုပ်ဓုပ်တအ်၊ ဂကောံဂီုကၠီုတအ် ဒၞာဲဒးဗလးလဝ်တဲ နွံဒၟံၚ်ရ”ဂှ် ဂအုပ်ဗိုလ်ဇၞော်ဇြဝ်မေန်ထောန် ဟီုလဝ်ရ။

သ္အာၚ်နူဂှ်ပၠန် ပ္ဍဲတွဵုရးသေံသၟဝ်ကျာ ပေါဲဗတိုက်ဒေသကိုဝ်ကတအ်ဂှ် ၜိုတ် ၅ သၞာံမွဲဝါ ဒှ်ဒၟံၚ်ပဋိပက္ခ အကြာကောန်ဂကူမွဲကဵုမွဲ ဒှ်ဒၟံၚ်သက်က်ရဂှ်လေဝ် ညးဟီုလဝ်ဏီရ။

ဟိုတ်နူဂကောံမဟာမိတ်ကောဒေံ (၃) ဂကောံ MNDAA၊ TNLA ကေုာံ AA တအ် ဗတိုက်လဝ်တုဲ စဵုကဵုတ္ၚဲဏံ ဗဒိုပ်ကံၚ်ဇြဳပၞာန်ဇၞော်၊ ဍောတ် အပံၚ်လၟိဟ်စဵုကဵု ၉၀ ဗဒိုပ်ပြၚ် သီကေတ်မာန်လဝ်ရဂှ် လလောၚ်တြးလဝ်ရ။

ပရေၚ်ချဳဒရာၚ်ပၞာန် ၁၀၂၇ ယၟုဇၞော်တိုန်ကၠုၚ်ဒၟံၚ် အကြာမွဲၜါတ္ၚဲဏံဂှ် ပါဲနူဂကောံဇြဟတ်ပၠန်ဂတးကောန်ဍုၚ်အရၚ် ပါလုပ်သီုအလဵုအသဳညဳသၟဟ်ကောန်ဂကူ (NUG) တုဲ သီုကလိဂွံလဝ်ပရေၚ်ထံက်ဂလာန် ညးဍုၚ်ကွာန်တအ်ရ။

အတိုၚ်တၚ်လလောၚ်တြး ဂကောံမဟာမိတ်ကောဒေံပိဂကောံတအ်ဂှ်မ္ဂး ပရေၚ်ချဳဒရာၚ်ပၞာန် ပ္ဍဲပွိုၚ် (၅) တ္ၚဲဏံ သီဂွံလဝ် ဗဒိုပ်ကံၚ်ဇြဳပၞာန် (၈၇) ဗဒိုပ်တုဲ ဍုၚ်ချေန်ယှိုဲဟဝ်၊ ဖောၚ်ဇြိုၚ် ကေုာံသိန္နဳတအ်ဂှ် ထိၚ်ဒဝ်လဝ် သီုဖအိုတ်ရဂှ် လလောၚ်တြးလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁)ရ။

ပရိုၚ် – သြၚ်လောန်တိုၚ်မ်

ဗီု – The Kokang