ညးဒေသပံၚ် ၆ တၠ ဒးဒုၚ်ရပ်လဝ်ဂှ် ဖျေံဒဏ်ထံၚ်

ပံၚ်၊ နဝ်ဝေမ်ဗာ (၃)

ညးဒေသ နူကဵုကွာန် ( ဥတ္တံတား) ကဵု ကွာန်ကျဲချာန်၊ ပွိုၚ်ဍုၚ်ပံၚ်၊ တွဵုရးဍုၚ်မန် ဒပ်ကံၚ်ဇြဳပၞာန် မရပ်ဒက်ဏာလဝ် ၆ တၠဂှ် ဖျေံစၟတ်လဝ်ဒဏ်ထံၚ် နူကဵု ၂ သၞာံ စဵုကဵု ၅ သၞာံဂှ် ဂွံတီကေတ် ဇရေၚ်ညးမစုက်လုက်ကဵု ဂကောံဒပ်ဗၠာဲသၟိၚ်တံရ။

ကံၚ်ဇြဳပၞာန်ဝွံ အပ္ဍဲဂိတုသေပ်တေမ်ဗာ သတ္တာဟပထမဂှ် ကြဴနူဗၠာဲသၟိၚ်ထိၚ်ရး ကိုဝ်ဝ်လွေန် နူကဵုဗ္ဒိုပ်ဗၠာဲသၟိၚ်ၝောံဍုၚ်ပံၚ် ဒးဒုၚ်ပန်ဂစိုတ် လ္တူဂၠံၚ်ကာ လ္ဂုၚ်−မတ်မလီု၊ အရာပ်မိုဝ်နာၚ် ပွိုၚ်ဍုၚ်ပံၚ်တုဲဂှ် ရပ်ဒက်ဏာလဝ် ညးဒေသဟွံအောန်နူကဵု ၁၀ တၠရ။

ပ္ဍဲကဵုဏံ ညးဒေသ ( ဥတ္တံတား) ဂမၠိုၚ် ကိုဝ်အံၚ်မေန်ထိုဲ၊ ကိုဝ်ချေတ်ထူပိုၚ်၊ သဝ်ရာဇာမေန် ကေုာံ မအေနဳနဳအံၚ် ဒၟံၚ်ကွာန်ကျဲချာန် မပံက်လဝ်ဂဗုတ် နကဵုၝောံပိုဒ်သၞောဝ်ရာဇသာတ်ဇၞော် ၅၀၅ (က) ဂှ် ပ္ဍဲဂိတုအံက်တဝ်ဗာ ၂၇ ဂှ် နူကဵုရုၚ်သၞောဝ်ဓဝ်ပွိုၚ်ဍုၚ်ပံၚ် ဖျေံစၟတ်လဝ်အမိၚ် မၞိဟ်မွဲ ဒဏ်ထံၚ် ၂ သၞာံရ။

သ္အာၚ်နူဂှ်ပၠန် ပ္ဍဲဂိတုအံက်တဝ်ဗာ ၃၁ တေံဂှ်လေဝ် ပါလုပ်သီုကဵုကောန်ကွာန် ( ဥတ္တံတား) ဥူသဵုမဵုအံၚ် ဒးဒုၚ်ရပ်လဝ်ဂှ် မၞိဟ် ၂ တၠဂှ် လ္ဂောံကဵုၝောံပိုဒ်သၞောဝ်ဗ္တိုက်သ္အးပွပကီုပရာပ် ၅၂ ဂှ်တုဲ ကံၚ်ဇြဳပၞာန် ဖျေံစၟတ်လဝ် ဒဏ်ထံၚ် ညးမွဲ ၅ သၞာံဂှ် ဂွံတီကေတ်ရ။

ပၞောဝ်ကဵုညးဖျေံအမိၚ်ဒဏ်ထံၚ်တုဲဂမၠိုၚ် မၞိဟ်တြုံတံဂှ် လ္ပာ်ကံၚ်ဇြဳပၞာန်တံ ပလံၚ်ဏာလဝ် လ္ပာ်ထံၚ်စာတ်သဓီုတုဲ မၞိဟ်ဗြဴတံဂှ် ပလံၚ်ဏာလဝ် လ္ပာ်ထံၚ်စာတ်ကျာ်မြဟ်ရောၚ် ဂၠိုက်ဂၠါဲဂွံတီကေတ် နူကဵုဗွိုၚ်ဂကောံဒပ်ဗၠာဲသၟိၚ်တံရ။

ပ္ဍဲတွဵုရးဍုၚ်မန် အပ္ဍဲကာလသီအဝဵုဏံ ညးဍုၚ်ကွာန်ကောန်အရာပ် ဗ္ဒါဲ ၈၀၀ ဒးဒုၚ်ရပ်လဝ်တုဲ ဗွဲမဂၠိုၚ်ဂှ် ကံၚ်ဇြဳပၞာန် ဖျေံစၟတ်လဝ် ဒုဟ်ဒဏ် ဒဏ်ထံၚ် နာနာသာ်ရောၚ်ဂှ် ဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် (AAPP) တံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media