မတ်မလီု၊ နဝ်ဝေမ်ဗာ (၂)
ဟိုတ်နူပေါဲဗ္တိုက် မက္တဵုဒှ်ဒၟံၚ် ပ္ဍဲရးသေံသၟဝ်ကျာဂှ်တုဲ ပရေၚ်ကူသာန်သွံရာန်ဗၞိက်ပယျဵု ကြုက်−ဗၟာၜါဍုၚ် ဒေါအ်ဒေၚ်အာသီုဖအိုတ်ဂှ်ရ ၚုဟ်ကပေါတ်ဗၞိက်တံ သၠုၚ်တိုန်ကၠုၚ် ဂၠိုၚ်ကဵုဆမာန်ရောၚ် တၠပညာပရေၚ်ပိုန်ဒြပ်တံကဵု သၟာဗၞိက်ပယျဵုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုအံက်တဝ်ဗာ ၂၇ တုဲကၠုၚ်တေံတုဲ ပ္ဍဲကဵုဒေသသ္ကုတ်သၟဝ်ကျာ တွဵုရးသေံ မၞုံလ္ပာ်ဂၠံၚ်အဓိက ပရေၚ်ကူသာန်သွံရာန်ပယျဵု ကြုက်−ဗၟာဂှ် အကြာဂကောံမဟာမိတ်ကောဒေံပိဂကောံကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်ၜါလ္ပာ်တံ က္တဵုဒှ်ဒၟံၚ် ဗွဲမသ္ကာတ်မြဟ်ရ။
ဟိုတ်နူပေါဲဗ္တိုက်ဂှ်တုဲ ပရေၚ်ကူသာန်သွံရာန်ပယျဵုၜါဍုၚ် ဒေါအ်ဒေၚ်အာလဝ်တုဲ အပ္ဍဲဒေသဂှ်လေဝ် ညးဍုၚ်ကွာန်တံ ဒးဆေၚ်ဒၟံၚ်မုက် ကရောံကပေါတ်ဗၞိက်ဟွံမွဲ အောန်ဒၟံၚ်ဂှ် သီုကဵုအကာဲအရာ ၚုဟ်ဖျာက္ဍၚ်တိုန်ကၠုၚ်တံ ဂၠိုၚ်ကဵုဆရ။
သၟာဗၞိက်ပယျဵုမွဲတၠဂှ် ဟိုတ်နူပေါဲဗ္တိုက်ဂမၠိုၚ်တုဲ ၚုဟ်ကပေါတ်ဗၞိက်တံ စဵုကဵုစၟဳစဟွံဂွံ ၚုဟ်က္ဍၚ်ကၠုၚ်မာန်တုဲ စနူကဵုဗၞိက်အပြောံ သ္ဂောံရပ်စပ်ပ္ဍဲပရေၚ်တဵုလွဳသ္ဇိုၚ်တံဂှ် ၚုဟ်ဗၞိက်သၠုၚ်တိုန်ကၠုၚ် ဂၠိုၚ်ကဵုဆမာန်ရောၚ် ဟီုရ။
“ဒေါအ်ဒေၚ်အာအိုတ်ယျ။ ပြဟ်ဟ်ဏံ ကြုက်ကၟာတ်လဝ်တုဲ ကပေါတ်တံဏံ ဟွံအာ လ္ပာ်ကြုက်မ္ဂး ဗီုလဵုဂွံပရော။ ဒးဟီုတပ်ပ်မ္ဂး ၚုဟ်ဗၞိက်ဖျာတံ တိုန်ကၠုၚ်ဏောၚ်။ လၟုဟ်မှဂှ် ပ္ဍဲကဵုဒေသပါဲဒဴဘဲပၞာန်တံဂှ် ၚုဟ်ဖျာတံ တိုန်ဒၟံၚ်ယျ။ နူကဵုကြုက်ဂှ် ဒးရာန်ဒၟံၚ် စနူကဵုကပေါတ်အရပ်စပ်မၞိဟ် စဵုကဵုကပေါတ်ဗၞိက်အပြောံတံ ဒးရာန်ဒၟံၚ်ဖအိုတ်ဏောၚ်။ စဵုကဵုစၟဳစဟွံဂွံ ၚုဟ်ဂှ် က္ဍၚ်အာဏောၚ်။ ပပ္တံနူကဵု ကပေါတ်ဗၞိက်ပရေၚ်တဵုလွဳဂမၠိုၚ်၊ ဝါဲတံ၊ ကပေါတ်တမ်တံဂှ်တှ်ေ တိုန်အာကွေံကွေံဏောၚ်။ ပ္ဍဲပယျဵုဂှ် သ္ၚုမွဲရိုက်ရဂှ် ဒှ်ဒၟံၚ် ၆ ကိုဋ်၊ ၇ ကိုဋ်ယျဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် လ္ဂောံကဵုအကာဲအရာ ပေါဲဗ္တိုက်လၟုဟ်မ္ဂး ပရေၚ်ကူသာန်သွံရာန်ပယျဵုၜါဍုၚ် ဒေါအ်ဒေၚ်အာတံ သာဂၠိၚ်သ္ၚောဲမာန်ဂှ်ရ ကပေါတ်ဗၞိက်ပိုတ်သ္ကုတ်တံဂှ် အပ္ဍဲကာလခြာဟွံလအ်ဏံ သ္ဇက်ဒးဆေၚ်မုက်နွံဒၟံၚ်ရောၚ် ညး ဆက်ဟီုရ။
ကၟိန်ဍုၚ်ဗၟာဝွံ ကပေါတ်ဗၞိက်အရပ်စပ်မၞိဟ် ၇၅ တၟံကၠံဂှ် ဒးပၠောပ်ဒၟံၚ် နူကဵုဍုၚ်ကြုက် အဓိကတုဲ ဟိုတ်နူအသိၚ်အလိုန်ပေါဲဗ္တိုက်ရးသေံသၟဝ်ကျာဂှ်တုဲ အပ္ဍဲဍုၚ်ဂှ် ကိုန်ဒးဂဗအာ ဘဲဒဏ်ၚုဟ်ဖျာက္ဍၚ်တံ နွံဒၟံၚ်ရောၚ် မဒှ်ရ။
တၠပညာပရေၚ်ပိုန်ဒြပ်မွဲတၠဂှ်လေဝ် ဟိုတ်နူပဋိပက္ခပရေၚ်ပၞာန်တံတုဲ ကရောံၚုဟ်ဖျာက္ဍၚ်တံဂှ် ကဏ္ဍဗၞိက်ပၠောပ် ဗၞိက်ပလံၚ်တံ စှ်ေကၠုၚ်တီတီဂှ် ဒးဂဗကၠုၚ်မာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္ဍဲကဵုပရေၚ်သွံရာန် ကဵုကြုက်အဓိကဂှ်တှ်ေ ဒးပၠောပ်နၚ် နူကဵုဍေံတံဂှ် ဂၠိုၚ်ဒၟံၚ်ဏောၚ်။ ဟီုမ္ဂး ကပေါတ်ကြုက် ဗၞိက်အရပ်စပ်မၞိဟ် အပ္ဍဲဍုၚ်ဏံ ၚုဟ်သ္ဂောံတိုန်အာဂှ် နွံဏောၚ်။ လ္ပာ်ဇကုတံ ပလံၚ်ဏာလ္ပာ်ဍေံတံဂှ်တှ်ေ ဒးပလံၚ်ကပေါတ်တိတ်နူဍာ်တံဟီုမ္ဂး စပ်ကဵုလ္ပာ်ဏံတုဲ ဒးဇီုကပိုက်တံ ဂၠိုၚ်ဏောၚ်။ လ္ပာ်ကြုက်တေံ ရမျာၚ်တိတ်ကၠုၚ် သာ်လဵုရောဟီုဂှ် ဒးမၚ်ကျောဝ်ဏောၚ်။ လ္ပာ်ဇကုတံဂှ် ဗၞိက်ပၠောပ်ကီု ဗၞိက်ပလံၚ်ကီုတံဂှ် စှ်ေအာဏောၚ်။ ဆ္ဂး အဓိကဂှ်တှ်ေ ဒှ်ဒၟံၚ်ဗၞိက်ပၠောပ်ဏောၚ်။ ကပေါတ်ဗၞိက်အရပ်စပ်မၞိဟ် မၞုံပ္ဍဲဍုၚ်ဗၟာတံ (၇၅) တၟံကၠံပြၚ်ဂှ် ဒှ်ဒၟံၚ်ကပေါတ်ကြုက်တံ ဂၠိုၚ်ဏောၚ်။ ဂၠိုၚ်ကဵုအောန် ဇီုကပိုက်ကၠုၚ်ဏောၚ် ထေၚ်ရ။ မွဲပၠန်ဂှ် အရာဏံဂှ် အာလလအ်လဵုရောဟီုဂှ် တန်တဴဒၟံၚ်ဏောၚ်“ သာ်ဝွံ သ္ဂးရ။
ဟိုတ်နူပေါဲဗ္တိုက် မက္တဵုဒှ်ဒၟံၚ်လၟုဟ်ဂှ်တုဲ ကပေါတ်ဗၞိက်ကြုက် မသုၚ်စောဲဒၟံၚ် ပ္ဍဲကဵုဍုၚ်ဗၟာ အဓိကဂှ် ညံၚ်ဂွိုအ်ပိုတ်အာဂှ် တၠကမၠောန်လ္ၚဵုတံ ကၠောန်ၜိုတ်ဒၟံၚ် သွက်ဂွံပၠောပ်ပ္တိုန် နူကဵုဂၠံၚ်ဍာ်တံရ။
အာကဵုဂၠံၚ်ကွဳစက်မ္ဂး ပရေၚ်သွံရာန်ဗၞိက် လအ်ဒၟံၚ် ပွိုၚ် ၃ တ္ၚဲဓဝ်ဂှ် ယဝ်ရသွံရာန်ကဵု ဂၠံၚ်တရဴဍာ်မ္ဂး အောန်အိုတ် လအ်အာ နူကဵုမွဲဂိတုဘာ် စဵုကဵုၜါဂိတုမာန်သၟးဟွံက ဟိုတ်နူခရိတ်အိုတ် ပရေၚ်ပလံၚ်ဗစိုပ်တံက္ဍၚ်ဒၟံၚ်ဂှ်ရ ဒှ်ကၠုၚ်ဟွံမာန်ပုဟ်ဂှ် တၠကမၠောန်ပရေၚ်ပိုန်ဒြပ်ဂမၠိုၚ် သ္ၚဳဂၠိပ်လဝ်ရ။
ဍုၚ်ဗၟာဝွံ နူကဵုဍုၚ်ကြုက်ဂှ် ပၠောပ်ပ္တိုန်ဒၟံၚ် ကပေါတ်ဗၞိက်အရပ်စပ်မၞိဟ်နာနာ၊ ကပေါတ်ဗၞိက်အပြောံ အရပ်စပ်ပရေၚ်သိုၚ်ခၞံဂမၠိုၚ်၊ ကပေါတ်ဓာတ်လလဳဂမၠိုၚ်၊ ဝါဲဓာတ်တံကီု သီုကဵုကပေါတ်ဗၞိက်တၞဟ်သ္အာၚ်တံ အဓိကရ။
သွံဒၟံၚ်လ္ပာ်ဍုၚ်ကြုက်ဂှ်တှ်ေ ကပေါတ်ဗၞိက်တိတ်နူဍာ်ဂမၠိုၚ်၊ သ္ၚု ကေုာံ ကၞောန်သ္ၚု၊ ၜဲနာနာ၊ ရဝ်ဗာ၊ သတ်ဆုသတ်ဒုန်တံသၟးဟွံက ပလံၚ်ပ္တိုန်သွံတြးဒၟံၚ် ကပေါတ်ဗၞိက်တိတ်နူပရေၚ်တဵုလွဳတံတုဲ ဟိုတ်နူပေါဲဗ္တိုက်လၟုဟ်တုဲ ဗၞိက်ပၠောပ်ကီု ဗၞိက်ပလံၚ်ကီုဂှ် ဒေါအ်ဒေၚ်အာယျရောၚ် မဒှ်ရ။
လ္ဂောံကဵုတၚ်လလောၚ်တြး ဌာနက္ဍိုက်ပ်ပရေၚ်ကူသာန်သွံရာန် သၟဝ်တဲကံၚ်ဇြဳပၞာန်ဂှ်မ္ဂး သၞာံဘဏ္ဍာသၞာံဏံ နူကဵုဂိတုဨပရဴ စဵုကဵုဂိတုသေပ်တေမ်ဗာ ပွိုၚ် ၅ ဂိတုဂှ် ၚုဟ်မးသွံရာန်ဗၞိက် ကြုက်−ဗၟာ ၜါဍုၚ်ဂှ် နွံလဝ် စဵုကဵု ဒဝ်ဠာအမေရိကာန် ၄၄၀၀ ပြကောဋိကိုဋ်ရောၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai