တၚ်ဒတူလိုၚ်အကြာ “ဝ” ကေုာံ မာၚ်လာဂှ် ထံက်ဒၟံၚ်ဂလာန် ကုချဳဒရာၚ်ပၞာန် ၁၀၂၇ နကဵုနဲကဲတိုက်ရိုက်ဟွံသေၚ်ဂှ် ရဲခါတ်အကာဲဂမၠိုၚ် ဟီု

ပါန်သာန်၊ နဝ်ဝေမ်ဗာ (၃)

လ္တူချဳဒရာၚ်ပၞာန် ၁၀၂၇ ဒပ်မဟာမိတ်တံ မသရိုဟ်ကၠေံ ဒပ်ကံၚ်ဇြဳပၞာန်တံမာန်ဂှ် တၚ်ဒတူလိုၚ်ဟွံဗက်လ္ပာ် ဂကောံ “ဝ” ကဵု “မာၚ်လာ” တံဂှ်ဝွံ ထံက်ဒၟံၚ်ဂလာန် ကုချဳဒရာၚ်ပၞာန် နကဵုနဲကဲတိုက်ရိုက်ဟွံသေၚ်ဏောၚ်ဂှ် ညးခါတ်အကာဲပရေၚ်ဍုၚ်ကွာန်တံ ဟီုရ။

စပ်ကဵုပေါဲဗ္တိုက်ရးသေံသၟဝ်ကျာဂှ်တုဲ ဂကောံ “ဝ” UWSA ကဵု ဂကောံမာၚ်လာ NDAA တံ ဒ္ဂေတ်ဗက် အတိုၚ်တၚ်ဒတူလိုၚ်ပရေၚ်ဍုၚ်ကွာန် ဟွံဗက်လ္ပာ်တံဂှ်တုဲ လ္ပာ်ဂကောံလဵုမှ ပါလုပ်ပလာပ်ပထုဲအာဟွံသေၚ်ပုဟ်ဂှ် ပ္ဍဲဂိတုနဝ်ဝေမ်ဗာ (၁) တေံ လလောၚ်ပ္တိတ်လဝ် လစွံစိုတ်ရ။

ပရေၚ်ဂီုကၠီုတိဍာ် အပ္ဍဲတွဵုရး “ဝ” ၊ ဒြပ်ရတ်သ္ၚိသွဝ်ညးဍုၚ်ကွာန်တံ ကေုာံ ပရေၚ်ဂီုကၠီုတံဂှ် နကဵု UWSA သာ်လဵုဒှ်ဒှ် စဵုဒၞါကဵုအာဏောၚ်တုဲ ညးဍုၚ်ကွာန် ပါဲဒဴကၠုၚ်ဘဲပၞာန် လ္ပာ်ဒေသ “ဝ” တံဂှ်လေဝ် အတိုၚ်ပရေၚ်ဗ္စာရဏာမၞိဟ်ဂှ် ကၠောန်ကဵုအာ ပရေၚ်မၚ်မွဲရံၚ်စံၚ်ရီုဗၚ် ကေုာံ ပရေၚ်ဖျေံကဵုဒၞါဲ မသက္ကုၚုဟ်တံဏောၚ်ဂှ် သ္ဂးလဝ်ရ။

“ညးတံဂှ် စပ်ကဵုပေါဲဗ္တိုက်တုဲ လ္ပာ်လဵုမှဟွံပါပုဟ် ဂးလဝ်ကဵု ကံၚ်ဇြဳပၞာန်ကီုလေဝ် မွဲနဲမွဲဗီု ချဳဒရာၚ်ဂကောံဇြဟတ်တံဏံ ပေါဲဗ္တိုက်တံဏံဂှ် နကဵုညး ကဵုဒၟံၚ်အရီုဗၚ်ဏောၚ်။ ဒတူလိုၚ် လ္ပာ်ညးတံဏောၚ်ဟီုဂှ် ထ္မံက်ထ္ၜးလဝ်ရ။ မွဲအခိၚ်ဓဝ် ညးဒဒိုက်ဘဲပၞာန် က္တဵုဒှ်ကၠုၚ်ဒၟါနူပေါဲပၞာန်တံဂှ်လေဝ် ဒုၚ်တၠုၚ်ရီုဗၚ်ဏောၚ်၊ မၚ်မွဲကဵုဏောၚ် ဟီုဂှ်ဝွံ ဍာံဍာံတေံ ပါလုပ်ရီုဗၚ်ဒၟံၚ် ပ္ဍဲပေါဲဗ္တိုက်ဏံ မွဲနဲမွဲဗီုကီုဏောၚ်ဟီုဂှ် ဒှ်သဘဴကဵုလဝ်ကတိရ“ သာ်ဝွံ ညးသ္ဂးရ။

ဂကောံ “ဝ” UWSA ဂှ် နကဵုဂကောံမဆေၚ်စပ်ဂမၠိုၚ် သွက်ဂွံသဳကၠဳ ပရေၚ်ဒေါအ်ပန်ပှော်တံဂှ်ဟေၚ် ဖ္တိုက်ဖ္အောဝ်လဝ်တုဲယျဂှ်ကီု၊ တရဴကျာတံဂှ် ယဝ်ရၜက်ၜေတ်ကၠုၚ်တိဍာ် စပ်ကဵုပရေၚ်ပၞာန်တံ နွံကၠုၚ်မ္ဂး ခၠေဝ်ပၠန်ဗ္တိုက်အာဏောၚ်ဂှ် ကဵုလဝ်သတိရ။

ဣဏံဝွံ ကံၚ်ဇြဳပၞာန် ယဝ်ရဗ္တိုက်ကၠုၚ်တရဴကျာ ကုဒေသ “ဝ”တံဂှ်မ္ဂး နကဵု UWSA ကလေၚ်ဗ္တိုက်တုဲ ပါလုပ်ကၠုၚ် ပ္ဍဲချဳဒရာၚ်ပၞာန်ဏောၚ် လစွံစိုတ်သာ်ဏံဂှ် ဒစးဒုၚ်ကဵုလဝ်သမ္တီရောၚ် ညးခါတ်အကာဲပရေၚ်ဍုၚ်ကွာန်၊ ပရေၚ်ပၞာန်တံ သ္ၚဳဂၠိပ်လဝ်အိုတ်ရ။

ဂကောံမာၚ်လာဂှ်လေဝ် သွက်ဂကူမၞိဟ်ကောန်ဍုၚ်အရၚ် မၞုံဒေသပယျဵုတံဂှ် ဒက်ပ္တန်ခၞံဗဒှ် ပွဳပွူပရေၚ်မၞိဟ် မသိုက်လောဲ မဒှ်သဟဇာတတံဂှ်တုဲ သွက်ဒေသပယျဵု ဂွံညိၚ်ဝတ်ၜိုဟ်သြိုဟ်ဂှ် ဆက်ထိၚ်ဒဝ်မၚ်မွဲအာရောၚ် လလောၚ်ပ္တိတ်လဝ်ရ။

ဂကောံ “ဝ” ကဵု မာၚ်လာတံဝွံ ဒှ်ဂကောံရပ်လွဟ်ကောန်ဍုၚ်အရၚ် ဇြဟတ်ဇၞော်တံတုဲ ပေါဲသဳကၠဳပရေၚ်ၜိုဟ်လလမ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မကော်ဘိက်လဝ်ဂှ် မွဲဂကောံတုဲမွဲဂကောံကဵုဒှ် ကဵုက္ဍိုပ်ကဵုဒှ် သဳကၠဳလဝ် ဟွံအောန်နူကဵု ၅ ဝါရ။

မွဲလ္ပာ်ဂှ်ပၠန် ပ္ဍဲကဵုကမ္မတဳပ္ညဳပ္ညပ်သဳကၠဳ ပရေၚ်ဍုၚ်ကွာန်ကၟိန်ဍုၚ် (FPNCC) သၟဝ်သ္ကိုပ်သ္က “ဝ” ဂှ် ပါလုပ်သီုကဵုဂကောံမဟာမိတ်ကောဒေံ ပိဂကောံတံကီု ဂကောံရပ်လွဟ်ကောန်ဍုၚ်အရၚ်သ္ကုတ်သၟဝ်ကျာ ၇ ဂကောံပါလုပ်တုဲ ပရေၚ်ဆက်ဆောံမခိုဟ်ဂေါဝ် ကုဍုၚ်ကြုက် ဍုၚ်ဇိုၚ်ဝုတ်ဒိုဟ်ဂှ်လေဝ် နွံဒၟံၚ်ရ။

ညးလ္ၚတ်သ္ၚဳဂၠိပ်ကေၚ်ကာ ကြုက်−ဗၟာ ဒံက်တာလှကျဝ်ဇြဝ်ဂှ် ဂကောံသ္ကုတ်သၟဝ်ကျာတံဝွံ ဟိုတ်နူပရေၚ်ဆက်ဆောံ ကုကြုက်နွံဒၟံၚ်ဂှ်ရ အရာညးတံနွံပၟိက်တံဂှ် နူကဵုကြုက်မွဲကဆံၚ် ဟီုကဵု ကံၚ်ဇြဳပၞာန်မာန်တုဲ ညံၚ်အကာဲအရာဂွံညိၚ်ဝတ် သဳကၠဳအာဏောၚ်ဂှ် သ္ၚဳဂၠိပ်လဝ်အိုတ်ရ။

“ဂကောံသ္ကုတ်သၟဝ်ကျာတံကဵု ကြုက်တံဂှ် ပရေၚ်ဆက်ဆောံနွံဒၟံၚ်ဏောၚ်။ အခိၚ်ဂှ်တှ်ေ ညးတံ ( ဂကောံသၟဝ်ကျာ) တံ မုနွံပၟိက်ရောဟီုဂှ် ဟီုကဵုကြုက်ဏောၚ် ထေၚ်ရ။ ညအ်ဂှ် ဝန်ဇၞော်ဂှ်လေဝ် ဟီုကဵုကံၚ်ဇြဳပၞာန်ဂွံဒၟံၚ်ရ။ ကံၚ်ဇြဳပၞာန်ဂှ်တှ်ေ မဟွံဍာံတံဂှ်ရ ကၠောန်လဝ်တုဲ ကိစ္စကဝ်ကဏံဂှ်လေဝ် ဍေံတံ (စကစ) ကၠောန်လဝ်ဏောၚ်။ ကဝ်ကဂှ်တှ်ေ ဍေံကလေၚ်ကေတ် ဒၞါဲဍေံရလေဝ်။ အေ ဂှ်တှ်ေ ကလေၚ်ဆုတ်ကဵုအာ ဟွံသေၚ်ပုဟ်။ ညံၚ်ဒေသညးတံ ဂွံညိၚ်ဝတ် ညးတံညးတံ ဒက်ပ္တန်အာ နဒဒှ်ဒေသသ္ဇိုၚ်တံဏောၚ်။ ပ္ဍဲခေတ်နအဖတေံဂှ် ညးတံရေၚ်သ္ကအ်ညံၚ်ဂွံထ္ကးပြးဂှ် ထဍေၚ်ပ္တိတ်လဝ်ဏောၚ်။ ဟိုတ်ဂှ်ရ ဂကောံကဝ်က ကလေၚ်သီလဝ်ရ။ အေ ဂှ်တှ်ေ ကိစ္စတံဏံ ညံၚ်ဂွံညိၚ်ဝတ် ကၠောန်သာ်လဵုရောဟီုဂှ် ဒးသဳကၠဳညးသ္ကအ်ဏောၚ် ထေၚ်ကေတ်ရ“ သာ်ဝွံ ညးသ္ဂးရ။

ချဳဒရာၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံ မကလိဂွံလဝ် ပရေၚ်ထံက်ဂလာန် ဂကောံဇြဟတ်ပၠန်ဂတးတံကဵု ညးဍုၚ်ကွာန် ဒစဵုဒစးသၞောတ်တၠအဝဵုပၞာန်တံဂှ်ဝွံ အပ္ဍဲပွိုၚ် ၆ တ္ၚဲဂှ် သီဂွံလဝ် ဗ္ဒိုပ်ဒပ်ကံၚ်ဇြဳပၞာန် ဗ္ဒါဲ ၉၀ ရ။

ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ဗိုလ်ဇၞော် ဇြဝ်မေန်ထောန်ဂှ် စနူတ္ၚဲ ချဳဒရာၚ်ပၞာန် ၁၀၂၇ စတုဲဂှ် ဒးဗလးလဝ်တဲ ကုဍုၚ်ချေန်ယှိုဲဟဝ်၊ ဖံၚ်သာၚ် ကေုာံ ဍုၚ်ကျူကုက်တံရောၚ်ဂှ် ပ္ဍဲဂိတုနဝ်ဝေမ်ဗာ ၂ တေံ ဒုၚ်လဝ်ဝန်ရ။

ဂကောံမဟာမိတ်ကောဒေံပိဂကောံဂှ်လေဝ် ကရောံချဳဒရာၚ်ပၞာန် ၁၀၂၇ ဂှ် သွက်သၞောတ်တၠအဝဵုပၞာန် ဂွံသရိုဟ်စှ်ေအာဂှ် နကဵုဂကောံဇြဟတ်ပၠန်ဂတးတံ သွက်ဂွံလုပ်စိုပ်ဗ္တိုက် ကုဗ္ဒိုပ်ဒပ်ကံၚ်ဇြဳပၞာန် မွဲအခိၚ်ဓဝ်ဂှ် ဖ္တိုက်ဖ္အောဝ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−The Kokang