ဂျဳနဳဗာ၊ နဝ်ဝေမ်ဗာ ၃
ပရေၚ်အေဿရေဗတိုတ်ပန်လဝ် ဗဒိုပ်ညးဒှ်ဒဒိုက်ဇၞော်အိုတ် ဂျာဘာလဳယာ မၞုံဒေသသြၚ်ဂၚ်ဇမၠိၚ်ဂါဇြာဂှ် ဒှ်ဒုဟ်ရာဇဝတ်ပၞာန်ရောၚ် ရုၚ်အခေါၚ်အရာမၞိဟ်ကုလသမဂ္ဂ ဟီုသ္ဂးလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁) ဂှ်ရ။
ဗဒိုပ်ညးဒှ်ဒဒိုက် ဂျာဘာလဳယာဂှ် ဟိုတ်နူအေဿရေဗတိုက်လဝ်ကဵုပၞာန်ကျာ စဵုကဵုၜါဝါပေၚ်ၚ်တုဲ မၞိဟ်ဒးချိုတ်လဝ် ကေုာံ မၞိဟ်ဇီုကပိုက်ဒးလဝ်ဘဲဝပ် နွံဗွဲမဂၠိုၚ်ရဂှ် ဌာနဝန်ဇၞော်ပရေၚ်ထတ်ယိုတ်ဂါဇြာ ဟီုလဝ်ရ။
အတိုၚ်တၚ်ဓမံက်ထ္ၜး မဳဒဳယာအလဵုအသဳဟာမေဿ် မၞုံဂါဇြာ ပ္ဍဲဂိတုနဝ်ဝေမ်ဗာ စၟတ်တ္ၚဲ (၂) ဂှ်မ္ဂး ပ္ဍဲကဵုပရေၚ်ပရော ဗဒိုပ်ညးဒှ်ဒဒိုက် ဒးဒုၚ်ဗတိုက်လဝ်ဂှ် ကောန်ပါကေဿတိုၚ် ဟွံအောန်နူ ၁၉၅ တၠ ဒးချိုတ်လဝ်တုဲ မၞိဟ်ကၠေံဒၟံၚ် ပ္ဍဲသၟဝ်ပရေၚ်လီုလာ် ၁၂၀ ပြၚ်နွံတုဲ မၞိဟ်ဒးလဝ်ဘဲဝပ် ၇၇၇ တၠ နွံရဂှ် ဓမံက်ထ္ၜးလဝ်ရ။
အတိုၚ်အကာဲအရာ လၟိဟ်ကောန်အရာပ်ဒးချိုတ်လဝ်ကဵု အကာဲအရာပရေၚ်ဇီုကပိုက်လီုလာ်လဝ်ဂှ် ပရေၚ်အေဿရေ ဗတိုက်လဝ်ဏံ ဒှ်ဒုဟ်ရာဇဝတ်ပၞာန်မာန်ဒၟံၚ်ရဂှ် ဓမံက်ထ္ၜးလဝ် ပ္ဍဲတွောတ်တာ ရုၚ်အခေါၚ်အရာမၞိဟ် ကုလသမဂ္ဂရ။
အေဿရေဂှ် ပ္ဍဲရာဇာဝၚ်ကၟိန်ဍုၚ်ညးတအ် ပရေၚ်ဒးဒုၚ်ဗတိုက်လဝ် အကာဲအရာပရေံအိုတ်ဂှ် ဒးဆဵုဂဗလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၇) ဂှ်တုဲ လကြဴဏံ နဒဒှ်ကလေၚ်ပလန်တဲ ပါဲနူဗတိုက်လဝ်ဒေသသြၚ်ဂၚ်ဇမၠိၚ်ဂါဇြာ ကဵုပၞာန်ကျာတုဲ ကၠောန်ရေၚ်တၠုၚ်ဒၟံၚ် ပၞာန်ထ္ပက်ဗလးမုက်တိ ဆက်ဆက်ရ။
ဟိုတ်နူပရေၚ်ဗတိုက်ပန်ဏံတုဲ ပ္ဍဲကဵုဂါဇြာ မၞိဟ်ဒးချိုတ်လဝ် ဗ္ဒာဲ ၉၀၀၀ နွံကၠုၚ်တုဲ ဗွဲမဂၠိုၚ်ဂှ် ဒှ်ညးဗြဴ ကေုာံကောန်ၚာ်တအ်ရဂှ် ဌာနဝန်ဇၞော်ပရေၚ်ထတ်ယိုတ်ဂါဇြာ လလောၚ်တြးလဝ်ရ။
နကဵုဂကောံပံက်ဒၟံၚ်မုက်ပၞာန်တအ်ဂှ် ၜိုန်ရပ္တဝ်လဝ်ကဵု ဌာန်ပ္တဝ်ပၞာန် ဗတိုက်ဒၟံၚ်ကီုလေဝ် ထေက်ကဵုဒးဝေၚ်ပါဲအာ ဌာန်ပ္တဝ်ကောန်ညးအရာပ်တအ် ဗွဲတၟေၚ်ရဂှ် ဂကောံညးအရာပ်တအ် ဗတိုက်ဖ္အောဝ်လဝ်ရ။
သ္အာၚ်နူဂှ်ပၠန် ဗတိုက်ပန်ဒၟံၚ် စမြိုၚ်ညးအရာပ် ကၠောန်သ္ပကေတ်ဒၟံၚ်ကီု၊ သ္ပကဵုကောန်အရာပ်တအ် ဂွံဒးချိုတ်ဒၟံၚ် ဗွဝ်ကဵုဗွဝ်ဂှ် ဒှ်ဒုဟ်ရာဇဝတ်ပၞာန်ရဂှ် စၟတ်သမ္တီလဝ်ရ။
Ref: CAN
sanlontai