ပ္ဍဲပေါဲဗတိုက်လှာဒကှ် သ္ဂံၚ် PDF (၂) တၠ ပါလုပ် သီုဒုသ္ကိုပ်ချဳဒရာၚ်ပၞာန် ဒးပြဟ်လလုဲလဝ်

လှာဒကှ်၊ နဝ်ဝေမ်ဗာ (၄)

ပ္ဍဲကဵုပေါဲဗတိုက် လုပ်က္ဍိုပ်ဗတိုက်လဝ် ပ္ဍဲဍုၚ်လှာဒကှ် တွဵုရးကရေၚ်ဂှ် လ္ပာ်ဂကောံဇြဟတ်ပၠန်ဂတးတအ် ပါလုပ်သီု ဒုသ္ကိုပ်ချဳဒရာၚ်ပၞာန် သ္ဂံၚ် PDF (၂) တၠ ဒးပြဟ်လလုဲလဝ်ရဂှ် ဒပ်သဝ်နဂါ SDDF လလောၚ်တြးလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၃) ဂှ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၂) တ္ၚဲတုဲကၠုၚ်တေံဂှ် ပ္ဍဲကဵုဒၞာဲတံဒပ်ကံၚ်ဇြဳပၞာန်ကဵု ဒၞာဲဒပ်ပၞာန်ဖျေံလဝ်ဗဒိုပ် မၞုံလ္တူဍုၚ်လှာဒကှ်တအ်ဂှ် ကရောၚ်ပၞာန်ကောန်မာန်ဒိုဝ် Lion Battalion၊ ကရောၚ်ပၞာန်ဂဠုမ် ကေုာံ ဒပ်သဝ်နဂါ SDDF ဂကောံဇြဟတ်ပၠန်ဂတး ပံၚ်ကောံတအ် လုပ်က္ဍိုက်ဗတိုက်လဝ်ရ။

ပ္ဍဲပရေၚ်က္ဍိုက်ဗတိုက်လဝ်ဏံ နူလ္ပာ်ကံၚ်ဇြဳပၞာန် ဟိုတ်နူကလေၚ်ဗတိုက်ပန်လဝ်ကဵု လွဟ်ဇၞော်၊ က္ၜၚ်ကျာ MI – 35 တအ်တုဲ ပါလုပ် သီုဒုသ္ကိုပ်ကရောၚ်ပၞာန် ကရောၚ်ပၞာန်ကောန်မာန်ဒိုဝ် Lion Battalion ဒးပြဟ်လလုဲလဝ် (၂) တၠတုဲ ညးဇီုကပိုက် ဒးလဝ်ဘဲဝပ်တအ်လေဝ် နွံရဂှ် ဓမံက်လဝ် ပ္ဍဲတၚ်လလောၚ်တြးရ။

ဃောလ္ၚတ်ဂၠိုက်ဂၠာဲဒၟံၚ် စရၚ်ဒပ်ကံၚ်ဇြဳပၞာန် ဇီုကပိုက်ဒးချိုတ်လဝ် ပ္ဍဲပေါဲဗတိုက်ၜါလ္ပာ်ဂှ်တုဲ ခြာဟွံလအ်ဏံ လလောၚ်တြး ပ္တိတ်အာရောၚ်ဂှ် ဟီုလဝ်ရ။

ပ္ဍဲပရေၚ်က္ဍိုက်ဗတိုက်လဝ် ဍုၚ်လှာဒကှ်ဂှ် နူလ္ပာ်ဒပ်ကံၚ်ဇြဳပၞာန် သုၚ်စောဲက္ၜၚ်ကျာ သီုပန်ရီုလဝ်ကဵုလွဟ်ဇၞော် ဗတိုက်လဝ်တုဲ ပ္ဍဲပေါဲဗတိုက်ဏံ ကောန်အရာပ်တအ် ဇီုကပိုက်ဒးလဝ်ဘဲဝပ်တအ်လေဝ် နွံရ။

သ္အာၚ်နူဂှ်ပၠန် ပ္ဍဲကဵုတ္ၚဲဂှ်လေဝ် ဂကောံဇြဟတ်ပၠန်ဂတးပံၚ်ကောံတအ် လုပ်စိုပ်က္ဍိုက်ဗတိုက်လဝ် ပ္ဍဲဗဒိုပ်ကွဳလုမ်တိုၚ် မဒှ်ဗဒိုပ်ကံၚ်ဇြဳပၞာန် ဗ္ဒာဲပယျဵု သေံ-ဗၟာ ပွိုၚ်ဍုၚ်ကြုၚ်ဒဵု တိဍာ်ဒပ်မဟာ ၆ KNU ရ။

ပ္ဍဲကဵုပေါဲဗတိုက်ဂှ် သ္ဂံၚ်နူဒပ်ကောံသနိုက်ဗာ ဒပ်လ္ပာ် (၃) ဒပ်ချဳဒရာၚ်ပၞာန်တၟေၚ် SOG မွဲတၠ ဒးပြဟ်လလုဲလဝ် ဗွဲမသၠုၚ်ပြဲရဂှ် SOG ကဵုလဝ်သမ္တီ လလောၚ်တြးလဝ်ရ။

ပါလုပ်သီုဍုၚ်လှာဒကှ် ဗဒိုပ်ကွဳတိုၚ်လုမ် ပယျဵုသေံ-ဗၟာ ကေုာံ ဗဒိုပ်ကနေဝ်လေဝ် မၞုံပွိုၚ်ဍုၚ်ဝဝ်လေဝ်ပါ်တအ်ဂှ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂) ဂှ် ဒပ်ပံၚ်ကောံ KNU တအ် လုပ်စိုပ်ဗတိုက်လဝ်ရ။

ပရိုၚ် – သြၚ်လောန်တိုၚ်မ်

ဗီု -Social Media