ဗဒိုပ်ကံၚ်ဇြဳပၞာန် မၞုံဒဒန်ဇုက် ယှိုဲလဳဂှ် TNLA သီဂွံလဝ်

ဏာမ်ခါမ်၊ နဝ်ဝေမ်ဗာ (၄)

ဗဒိုပ်ကံၚ်ဇြဳပၞာန် မၞုံဒဒန်ဇုက်ယှိုဲလဳ ဆက်စၠောံလဝ် ဍုၚ်ဏာမ်ခါမ် ကဵုမာန်ဝုၚ်ကျဳ တွဵုရးသေံသၟဝ်ကျာဂှ် တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၃) အခိၚ်နူဂယး ၜိုတ် (၇) နာဍဳ ဗတိုက်သီကေတ်လဝ်ရဂှ် ဒပ်ပၞာန်တအာၚ် (TNLA) လလောၚ်တြးလဝ် ပရိုၚ်ရ။

ဗဒိုပ်တံဒပ်ပၞာန်တိုက်ကံၚ်ဇြဳပၞာန် စၟတ် (၄၂၃) ဖျေံလဝ်ဗဒိုပ် ပ္ဍဲဒဒန်ဇုက်ယှိုဲလဳဂှ် ဒပ်ပၞာန်တအာၚ် (TNLA) ဗတိုက်သီကေတ်လဝ် နဒဒှ်ပရေၚ်ချဳဒရာၚ်ပၞာန် ၁၀၂၇ ရ။

ပ္ဍဲပေါဲဗတိုက်သီဗဒိုပ်ဂှ် သီဂွံလဝ် နူကံၚ်ဇြဳပၞာန် လွဟ်ဍောတ် ၄ ဒကိုအ်၊ မကမ် 60MM ၃၀ မ၊ မကမ် RPG ၈ မ၊ ဗုမ်ကၠဟ် ၅၀ မ၊ မကမ် ကေုာံကပေါတ်အရပ်အစပ်ပၞာန်တအ်ရဂှ် ဓမံက်လဝ် ပ္ဍဲတၚ်လလောၚ်တြးရ။

အခိၚ်ဗတိုက်သီကေတ်လဝ် ဗဒိုပ်ကံၚ်ဇြဳပၞာန်ဂှ် နူကဵုကံၚ်ဇြဳပၞာန် ကၠုၚ်ပန်ရီုလဝ်ကဵု က္ၜၚ်ကျာဂျေတ်ဖိုက်တာ (၃) ဝါပေၚ်ၚ်ရဂှ် ဂွံတီကေတ် အတိုၚ်တၚ်လလောၚ်တြး ဌာနလလောၚ်ပရိုၚ် TNLA ရ။

ဆ္ဂးပ္ဍဲပေါဲဗတိုက်သီဗဒိုပ်ဂှ် ပရေၚ်ကောန်ဒပ်ကံၚ်ဇြဳပၞာန် ဇီုကပိုက်ဒးချိုတ်လဝ်ဂှ်မ္ဂး လ္ပာ် TNLA လလောၚ်တြးလဝ်မမိက်ကဵုမွဲမွဲဟၟဲရ။

ပရိုၚ် – သြၚ်လောန်တိုၚ်မ်

ဗီု – TNLA