သွက်ဂွံကေတ်အရေဝ်ကဵုကံၚ်ဇြဳပၞာန် က္လိလောန်ဒၟံၚ် ဒုဟ်ရာဇဝတ် လ္တူသၟာပရိုၚ်တအ်ဂှ် BNI အာတ်မိက်

မတ်မလီု – နဝ်ဝေမ်ဗာ (၄)

သွက်ဂွံရေၚ်တၠုၚ်ကေတ်ကဵုအရေဝ် ဒုဟ်ရာဇဝတ်ကံၚ်ဇြဳပၞာန်သီအဝဵု က္လိလောန်ဒၟံၚ် လ္တူသၟာပရိုၚ်ကၟိန်ဍုၚ်ဗၟာတအ်ဂှ် ၜိုတ်သၟဟ်အစောံ ညံၚ်ဂွံပံၚ်တောဲရေၚ်တၠုၚ် ကဵုအာဇြဟတ်ဓရိုဟ်ဂှ် ပရိုၚ်ကၟိန်ဍုၚ်နာနာကၟိန်ဍုၚ်ဗၟာ (BNI) အာတ်မိက်လဝ် ဂကောံပရိုၚ်မဳဒဳယာ ပ္ဍဲဍုၚ် မ္ၚးဍုၚ်တအ်ရ။

ပ္ဍဲတၚ်လလောၚ်တြး တ္ၚဲဖအိုတ်ကၠေံ ပရေၚ်ဗၠးတိတ်ဒၟံၚ်နူဒုဟ်ဒဏ် နူကဵုပရေၚ်ကေတ်အရေဝ်ကဵုဒုဟ် သွက်ဒုဟ်ရာဇဝတ် က္လိလောန်လဝ် လ္တူသၟာပရိုၚ် ကၠုၚ်စိုပ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂) တ္ၚဲဏံဂှ် အာတ်မိက်လဝ်ရ။

“ပရေၚ်ကၠောန်သ္ပရပ်ဒက်ပြိုက်ဂစိုတ်ဒၟံၚ် သၟာပရိုၚ်တအ်ဂှ် တုဲဒှ်အာ အတိုၚ်ဏံဟွံသေၚ်။ ပါလုပ်သီုက္ဍိုပ်သ္ကိုပ်ကံၚ်ဇြဳပၞာန်တအ် ကမၠောန်ဍဵုဍိုက် ကၠောန်ဒၟံၚ်နတဲတအ်ဂှ်တှ်ေ ဒးကေတ်အရေဝ် ကဵုအာဒုဟ်ဒဏ် နကဵုသၞောဝ်ဥပဒေကၟိန်ဍုၚ်နာနာဏောၚ်” ဂှ် ဥက္ကဋ္ဌကဝ်မတဳဖောအ်ဗြေဝ်တဴတက်မဳဒဳယာ BNI ဥူသိုဝ်မျေအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

သ္အာၚ်နူဂှ်ပၠန် နကဵုတွဳဗွိုၚ်ကၟိန်ဍုၚ်နာနာတအ်လေဝ် ပရေၚ်ပရောဂမၠိုၚ်ဏံဂှ် သွက်ဂွံပ္တိုန်လဝ်စၟတ်သမ္တီ ကၠောန်လဝ်ဂှ်လေဝ် နွံဒၟံၚ်ပၟိက်ရဂှ် ညးဟီုလဝ်ဏီရ။

ဒပ်ကံၚ်ဇြဳပၞာန်တအ်ဂှ် ပ္ဍဲကဵုဂိတုအံက်တဝ်ဗာ စၟတ်တ္ၚဲ (၂၉) ဂှ်လေဝ် လုပ်ဂၠိုက်ဂၠာဲလဝ် ရုၚ်မဳဒဳယာ DMG မဒှ်ဂကောံ လုပ်လဝ်ဂကောံ BNI ဖျေံသ္ဇိုၚ်သေတ်တွေတုဲ ရပ်ကေတ်ဏာလဝ် ညးမၚ်ရုၚ်မွဲတၠ၊ သၟာပရိုၚ်မွဲတၠကီု သီုသီကေတ်ဏာလဝ် ကပေါတ်ရုၚ်တအ်တုဲ ဗဒမ်ဌာန်ပရိုၚ်ဂှ်လေဝ် ကၟာတ်ဒၞာဏာလဝ်ရ။

အတိုၚ်စရၚ်ကဝ်မတဳစဵုဒၞာသၟာပရိုၚ်ဂမၠိုၚ် (CPJ) မ္ဂး ကၟိန်ဍုၚ်ဗၟာဂှ် ပ္ဍဲလ္တူဂၠးကဝ်ဏံ ပ္ဍဲအရာဖျေံထံၚ်သၟာပရိုၚ်ဂှ် ဒှ်ကၟိန်ဍုၚ်ဂၠိုၚ်အိုတ် မရနုက်ကဵုဒုတိယရဂှ် ဓမံက်ထ္ၜးလဝ်ရ။

“ပရောဒဒှ်တအ်ဏံဂှ် ကံၚ်ဇြဳပၞာန် သ္ပလဝ်မဇ္ဇျဟ် သၞောဝ်ဥပဒေကဵုဒှ် ဂတးဒၟံၚ်သၞောဝ်ဥပဒေကဵုဒှ် ဒှ်ကလိလောန်ဒၟံၚ် လ္တူသၟာပရိုၚ်ကၟိန်ဍုၚ်ဗၟာတအ်ရ။ သွက်ပရေၚ်က္လိလောန်တအ်ဂှ်လေဝ် မုလေဝ် ဍေံတအ် ဒးဒုၚ်ကေတ်လဝ်အရေဝ် ကဵုဒုဟ်ဒဏ် မုဟၟဲဏီရ” ဂှ် ဓမံလဝ် ပ္ဍဲတၚ်လလောၚ်တြးရ။

ပ္ဍဲကဵုကၟိန်ဍုၚ်ဗၟာဂှ် ပ္ဍဲကဵုဒုဟ်ရာဇဝတ်ကံၚ်ဇြဳပၞာန် က္လိလောန်ဒၟံၚ် လ္တူသၟာပရိုၚ်တအ်ဂှ် ပွမဍဵုဍိုက်ပ္ကီုပရာပ်ကီု၊ သုၚ်စောဲသၞောဝ်ဥပဒေတုဲ ပလာပ်ပထုဲက္ဍိုက်ဓရိုက်ဒၟံၚ် ပါလုပ်ဒၟံၚ်တုဲ အခေါၚ်ဗၠးၜးပရိုၚ်တအ်ဂှ်လေဝ် ထိၚ်ဒဝ်ပိုၚ်ခြာလဝ် နကဵုသၞောဝ်ဥပဒေ၊ ပရေၚ်ဘပဠတအ်ရဂှ် ဂွံတီကေတ်ရ။

ကြဴနူကံၚ်ဇြဳပၞာန် သီအဝဵုတုဲလကြဴဏံ ပ္ဍဲကဵုကၟိန်ဍုၚ်ဗၟာ သၟာပရိုၚ် ၁၅၀ ပြၚ် ဒးဒုၚ်ရပ်လဝ်တုဲ ၇၀ ဒးဒုၚ်ထိၚ်ဒဝ်လဝ်တုဲ ဌာန်ပရိုၚ်တအ်လေဝ် ဒးဒုၚ်ကၟာတ်ကၠုၚ်လဝ်လိုၚ်ဇြေန်ရ။

ပရိုၚ်ဗၟာကၟိန်ဍုၚ်နာနာ (BNI) ဂှ် ဒှ်ဌာန်ပရိုၚ် ဒက်ပ္တန်လဝ် နကဵုဌာန်ပရိုၚ် ဖျေံသ္ဇိုၚ်ကောန်ဍုၚ်အရၚ်ကေုာံ ဖျေံသ္ဇိုၚ်တိဍာ် ၁၅ ဌာနရ။

ပရိုၚ် – သြၚ်လောန်တိုၚ်မ်

ဗီု – Getty Image

လိက်စၞောန်ပ္ညုၚ်ဗီု – ဗီုရုပ်သၟာပရိုၚ် ဌာန်ပရိုၚ် Myanmar Now မွဲတၠ ဃောကေတ်ဒၟံၚ်ပရိုၚ် ပေါဲထ္ၜးဆန္ဒဒစဵုဒစးတၠအဝဵုပၞာန်ဂှ် ဒးဒုၚ်ရပ်လဝ်။