ကောန်ဒပ်ကံၚ်ဇြဳပၞာန် နူရးတၞၚ်သဳ ၂ တၠ လုပ်ဖျေံလွဟ် ဇရေၚ် PDF

တၞၚ်သဳ၊ နဝ်ဝေမ်ဗာ (၄)

ကောန်ဒပ်ကံၚ်ဇြဳပၞာန် ၂ တၠ နူကဵုတမ်ဒပ် ခမရ စၟတ် (၅၆၁) ကံၚ်ဇြဳပၞာန် ဖျေံသ္ဇိုၚ်ညံၚ်ပေန်ကွေန်၊ ပွိုၚ်ဍုၚ်တၞၚ်သဳ၊ ရးတၞၚ်သဳဂှ်ဝွံ ကၠုၚ်ဖျေံလွဟ် ဇရေၚ်ဂကောံဒပ်စဵုဒၞါညးဍုၚ်ကွာန် PDF တံဂှ် ဂွံတီကေတ် နူကဵုညးတာလျိုၚ် ပကဖ ရးရ။

ကောန်ဒပ်ကံၚ်ဇြဳပၞာန် ၂ တၠ ကောန်ဒပ်ထောန်လေန်တူကဵု ထက်မျာတ်တူတံဝွံ ပ္ဍဲဂိတုနဝ်ဝေမ်ဗာ ၁ ဂှ် ဆက်စၠောံကဵု ဒပ်စဵုဒၞါညးဍုၚ်ကွာန်ပွိုၚ်ဍုၚ်တၞၚ်သဳတုဲ လုပ်စိုပ်ကၠုၚ်ဖျေံလွဟ် နကဵုမသက္ကုလွဟ်ရ။

ကောန်ဒပ်ကံၚ်ဇြဳပၞာန် ၂ တၠ မလုပ်စိုပ်ဖျေံကၠုၚ်လွဟ်ဂှ် ဒုၚ်တၠုၚ်ဒုၚ်လဝ်တဲ ဗွဲမဂီုကၠီုတုဲ ပလံၚ်ကဵုလဝ် ဒၞါဲဂီုကၠီုတံရောၚ်ဂှ် ညးဒုၚ်တာလျိုၚ် ပကဖ ရးတၞၚ်သဳ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အပ္ဍဲကာလဒပ်ပၞာန်သီအဝဵုဏံ ကောန်ဒပ်ကံၚ်ဇြဳပၞာန် မဂြိပ်တိတ်ကၠုၚ် နူကဵုတမ်ဒပ်ကံၚ်ဇြဳပၞာန် ခမရ စၟတ် (၅၆၁) ၄ တၠ နွံတုဲ ပလံၚ်ဗစိုပ်လဝ် တိဍာ်ဗၠးၜးသီုဖအိုတ်ယျဂှ် ဂွံတီကေတ်ရ။

တုဲကၠုၚ် ပ္ဍဲဂိတုသေပ်တေမ်ဗာဂှ်လေဝ် ကောန်ဒပ်မွဲတၠ နူကဵုတမ်ဒပ်ခမရဂှ်ဝွံ လုပ်စိုပ်ကၠုၚ် နကဵု MA 31 သေနာတ်မွဲဇကိုအ်၊ မကမ် ၁၀၀ ပြၚ်တုဲ လ္ပာ် PDF တံ ကလေၚ်ထံက်ပၚ်ကဵုလဝ် သြန်ထံက်ပၚ် ၄၀ ကိုဋ်ပြၚ်ရ။

ပ္ဍဲရးတၞၚ်သဳဂှ် ကြဴနူဒပ်ပၞာန်သီအဝဵုတုဲ ကောန်ပၞာန် ကေုာံ ဗၠာဲသၟိၚ် ကၠုၚ်သ္ပ CDM ပ္ဍဲခရိုၚ်ထဝါဲဂှ် ၉၈ တၠ၊ ပ္ဍဲခရိုၚ်ဗိက်ဂှ် ၁၁၀ တၠ၊ ပ္ဍဲခရိုၚ်ကအ်သံၚ်ဂှ် ၂၉ တၠ အပံၚ်ဖအိုတ် ၂၃၇ တၠ နွံကၠုၚ်ယျဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−PDF