ကလေၚ်ဗ္တိုက်ပလန်အာ ချဳဒရာၚ်ပၞာန် ၁၀၂၇ ဂှ်ဏောၚ်ဂှ် က္ဍိုပ်သ္ကိုပ်ပၞာန် ဟီုကမြဴ

နေဗျဳဒဝ်၊ နဝ်ဝေမ်ဗာ (၄)

ကုဂကောံဒပ်မဟာမိတ် မပါလုပ်ဒၟံၚ် အပ္ဍဲချဳဒရာၚ်ပၞာန် ၁၀၂၇ ဗ္ဒိုပ်ဒပ်ကံၚ်ဇြဳပၞာန်တံ မဒးဒုၚ်သီဒၟံၚ်အဆက်က်ဂှ် ကလေၚ်ဗ္တိုက်သၠေက်အာဏောၚ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် ဟီုကမြဴလဝ်ရ။

ပ္ဍဲကဵုမွဲၜါတ္ၚဲ ချဳဒရာၚ်ပၞာန် ၁၀၂၇ ​စလဝ်ဂှ် လ္ဂောံကဵုတၚ်ထ္မံက်ထ္ၜး လိက်ပရိုၚ်တြးဝါဒတံဂှ်မ္ဂး က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မတိုန်စိုပ်ဒၟံၚ် ပေါဲသ္ဘၚ်တံဂှ်ဝွံ အပ္ဍဲပေါဲဗ္တိုက်ပွိုၚ်မွဲသတ္တာဟဂှ် ကြဴနူဒးဒုၚ်ဗလးထောံတဲ ဍုၚ်ဇၞော် နူကဵုရးသေံသၟဝ်ကျာ ၄ ဍုၚ်တုဲဂှ် ဟီုပ္တိတ်ကၠုၚ် သာ်ဏံရ။

ပ္ဍဲကဵုကောံဓရီု ဂကောံအလဵုအသဳကၟိန်ဍုၚ် ကံၚ်ဇြဳပၞာန် မကၠောန်ဗဒှ်လဝ် ပ္ဍဲဂိတုနဝ်ဝေမ်ဗာ ၂ တေံဂှ် က္ဍိုပ်သ္ကိုပ်ပၞာန်ဂှ် ဟီုဂးလဝ်ကဵု သ္ကိုပ်ဝန်ဇၞော်ဂမၠိုၚ် နူကဵုရးဒေသ ကေုာံ တွဵုရးနာနာ နူကဵုညးမခါန်ကၞက်လဝ်တံ နူကဵု Video Conference မွဲကဆံၚ်ရ။

က္ဍိုပ်သ္ကိုပ်ပၞာန်ဂှ် ဂကောံပံၚ်ကောံ MNDAA ကေုာံ TNLA တံ ဗ္တိုက်ကၠုၚ် ရုၚ်ဌာနမဆေၚ်စပ်ဂမၠိုၚ်၊ ဗ္ဒိုပ်ဂီုကၠီုတိဍာ် အပ္ဍဲဒေသကဝ်ကတံဂှ်ကဵု ပ္ဍဲတွဵုရးကချေၚ်ဂှ်လေဝ် ဒဒှ်ရ KIA ဗ္တိုက်လဝ်ဗ္ဒိုပ်ဂီုကၠီုတိဍာ်၊ ပရေၚ်ဆက်စၠောံဂၠံၚ်ဍာန်တံဂှ် ဟီုလဝ်ရ။

နကဵုညးတံ ကၠောန်ဒၟံၚ် ဒစးဒုၚ်ပလေဝ်ပလေတ် သွက်ပရေၚ်ဗ္တိုက်တံဂှ်တုဲ ပရေၚ်ကလေၚ်ဗ္တိုက်သၠေက်အာဂှ်လေဝ် ဆက်ရေၚ်တၠုၚ်အာဏောၚ်ဂှ် က္ဍိုပ်သ္ကိုပ်ပၞာန် ဟီုထ္မံက်ပ္တိတ်ကၠုၚ်ဗွဲမလုပ်သၞောဝ်ရ။

လဳကျာဝေန် ညးမၞုံအခေါၚ်ဟီုဂး ဂကောံကဝ်က MNDAA ဂှ် လ္တူကံၚ်ဇြဳပၞာန် မခၠေဝ်ပၠန်ကၠုၚ်ဂှ် ကၠောန်သ္ပလဝ် ပရေၚ်ပလေဝ်ပလေတ်တံ ပေၚ်ၚ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“နူကဵုလ္ပာ်ကံၚ်ဇြဳပၞာန် ကလေၚ်ကၠောန်ကၠုၚ်မွဲမွဲဏောၚ်ဟီုဂှ် ပိုယ်တံလေဝ် စွံဒၟံၚ်သတိလၟိုန်ရ။ ဍေံတံလေဝ် ဟီုလဴထ္ၜးဒၟံၚ်တွဵုရဏောၚ်။ လ္ပာ်ပိုယ်တံလေဝ် ကၠောန်လဝ် ပရေၚ်ပလေဝ်ပလေတ်တံ ပေၚ်ၚ်ရ” သာ်ဝွံ ညးသ္ဂးရ။

ပြဟ်ဟ်ဏံ ကလေၚ်ဗ္တိုက်ဒၟံၚ် ကုပရေၚ်ပန်ပှော်လွဟ်ဇော် ကေုာံ ပရေၚ်ဗ္တိုက်ထောံမခတိုဟ်က္ၜၚ်ကျာ လ္ပာ်ကံၚ်ဇြဳပၞာန်တံဂှ် လဳကျာဝေန် ဆက်ဟီုရ။

မွဲလ္ပာ်ပၠန်ဂှ် စပ်ကဵုချဳဒရာၚ်ပၞာန် ၁၀၂၇ ဂှ်တုဲ အလဵုအသဳကြုက် သြဇာနွံ လ္တူဂကောံမဟာမိတ်ကောဒေံပိဂကောံ ကေုာံ လ္တူကံၚ်ဇြဳပၞာန်ဂှ် သွက်ဂွံဒေါအ်ပန်ပှော်ဂှ်ကီု၊ ဂကောံမဆေၚ်စပ်ဂမၠိုၚ် သွက်ဂွံသောၚ်ကလး နကဵုပေါဲသဳကၠဳတံဂှ် ဖ္တိုက်ဖ္အောဝ်လဝ်ရ။

ချဳဒရာၚ်ပၞာန် ၁၀၂၇ ဂှ်ဝွံ ဂကောံကဝ်က MNDAA ၊ ဂကောံတအာၚ် TNLA ကေုာံ ဒပ်ပၞာန်ရခေၚ် AA မဟာမိတ်ကောဒေံပိဂကောံတံ ပါလုပ်လဝ်တုဲ ပ္ဍဲကဵုကလေၚ်ခၠေဝ်ပၠန် က္ဍိုပ်သ္ကိုပ်ပၞာန်ဂှ် လၞုက်ထောံလဝ် AA ရ။

နကဵုဒပ်ပၞာန်ရခေၚ် AA အပ္ဍဲချဳဒရာၚ်ပၞာန် ၁၀၂၇ ဂှ် သ္ကိုပ်သ္ကတုဲ ဗ္တိုက်ဒၟံၚ်ကံၚ်ဇြဳပၞာန် ကရောံဒပ်ပံၚ်ကောံတံ ပ္ဍဲကဵုပွိုၚ်ဍုၚ်ထဳချိုၚ်၊ ရးသက်ကိုၚ်ဂှ်တုဲ ပ္ဍဲကဵုတွဵုရးကချေၚ်ဂှ်လေဝ် ကရောံ KIA ဂှ် ပါလုပ်လဝ် ပ္ဍဲကဵုပေါဲဗ္တိုက်သီဗ္ဒိုပ်ဂါန်ဒံၚ်ယာန်ဂှ် လလောၚ်ပ္တိတ်လဝ်ရ။

သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် ၜိုန်ရဟွံစုတ်လဝ်ယၟု AA ကီုလေဝ် ဂလာန်မဟီုဂး ကလေၚ်ခၠေဝ်ပၠန်ဗ္တိုက်သၠေက်အာဏောၚ်ဂှ်ဝွံ ဒှ်သဘဴညှာတာ ကု AA ဟွံသေၚ်ပုဟ်ဂှ် သ္ၚဳဂၠိပ်လဝ်ရ။

“နကဵု AA ပါလုပ်ဒၟံၚ် ပ္ဍဲပေါဲဗ္တိုက်ဏောၚ်ဟီုဂှ် ဒှ်ကိစ္စဇၟာပ်ပ်မၞိဟ်တံ တီဒၟံၚ်ဏောၚ်။ AA လေဝ် ထ္မံက်ပ္တိတ်ဟီုဂးလဝ်ရ။ ဟီုမ္ဂး ဖာဲထောံတုဲ AA ဟွံပါပုဟ် ဟွံစုတ်ယၟု AA ကီုလေဝ် အခိၚ်ဒှ်ပေါဲဗ္တိုက်ဂှ် AA လေဝ် ပါဒၟံၚ်ရဏောၚ်လေဝ်။ ဟီုသာ်ဏံဂှ် ညှာတာကဵု AA ဟွံသေၚ်မ္ဂး ဟွံမိက်ကဵု AA ပါလုပ် နကဵုအဓိပ္ပာယ်သာ်ဏံလေဝ် ဟွံသေၚ်ပုဟ်ဂှ် ထေၚ်ကေတ်ရ” သာ်ဝွံ ညးသ္ဂးရ။

ဂလာန်က္ဍိုပ်သ္ကိုပ်ပၞာန် ဟီုဂးလဝ်ဂှ်ဝွံ ဟီုဂးလဝ် တိုက်ရိုက်ဟွံသေၚ်တုဲ ဂလာန်မဟီုဂးလဝ် နူကဵုကောံဓရီုဂှ် ဟိုတ်နူထ္မံက်ထ္ၜးလဝ် ပ္ဍဲကဵုလိက်ပရိုၚ်ကၟိန်ဍုၚ်ပိုၚ်တံဂှ်ရ ပသှ်ေထောံလဝ် AA ဟာဟီုဂှ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ရ။

အခိၚ်လၟုဟ် နကဵုဒပ်ကံၚ်ဇြဳပၞာန် အပ္ဍဲကာလသီအဝဵုဗ္ဒါဲပွိုၚ် ၃ သၞာံဏံ ကြပ်အလုံမွဲဍုၚ်ပြးဇး ဒးပံက်လဝ်မုက်ပၞာန် ဗွဲမဂၠိုၚ်တုဲ ပ္ဍဲကဵုရးသေံသၟဝ်ကျာဂှ် ပေါဲဗ္တိုက်တံ သ္ကာတ်မြဟ်ဒၟံၚ် အရိုဟ်တ္ၚဲတုဲ လ္ပာ်ကချေၚ်၊ သက်ကိုၚ် ၊ မဂွဵု ကေုာံ ကရေၚ်ဂှ်လေဝ် အပ္ဍဲအကြာတ္ၚဲတံဏံ ပေါဲဗ္တိုက်တံ ဆက်က္တဵုဒှ်ဒၟံၚ်ရ။

ပ္ဍဲဂိတုနဝ်ဝေမ်ဗာ (၃) ဂှ်လေဝ် မ္ၚးနူကဵုဗ္ဒိုပ်ကၚ်ကွာန်မေန်ယဲ ခရိုၚ်ဂဂဝ် မၞုံရးမဂွဵုဂှ် ဗ္ဒိုပ်ဗၠာဲသၟိၚ်ၝောံဍုၚ် ပ္ဍဲကဝ်လေန်၊ ကလေဝ် ကေုာံ တမူ မၞုံရးသက်ကိုၚ်တံဂှ် ဂကောံပၠန်ဂတးရပ်လွဟ်တံ ဗ္တိုက်သီဂွံလဝ်ရ။

မွဲတ္ၚဲဓဝ် ဒပ်ပၞာန်တအာၚ် (TNAL) တံ ဗ္တိုက်သီဂွံလဝ် ဗ္ဒိုပ်ဒပ်ကံၚ်ဇြဳပၞာန် မၞုံဒဒန်ဇုက်ယှိုဲလဳ မဆက်စၠောံလဝ် သ္ကုတ်ဂၠံၚ်မာန်ဝုက်ကျဳ ကေုာံ ဍုၚ်နခါမ် ရးသေံသၟဝ်ကျာဂှ် ကရောံလွဟ်လက်နက်မကမ်ဂမၠိုၚ်ရောၚ်ဂှ် လလောၚ်ပ္တိတ်လဝ်ရ။

အကာဲအရာသာ်ဏံဂှ် က္ဍိုပ်သ္ကိုပ်ပၞာန် ကလေၚ်ခၠေဝ်ပၠန်ဗ္တိုက်သၠေက် ကု MNDAA, TNLA ကေုာံ KIA တံဂှ်ဝွံ ဗ္တိုက်အာဗွဲစၟတ်ဏောၚ်တုဲ ဗွိုၚ်ပၞာန် သာသၠဲလးကၠုၚ်ဏောၚ်ဂှ် ဗိုလ်ဇၞော်ဒပ်ကျာ CDM ဇြေသူအံၚ် သ္ၚဳဂၠိပ်လဝ်ရ။

“ဗ္တိုက်ဗွဲစၟတ်ဏောၚ်ဂှ် ပိုယ်တံ ထေၚ်ကေတ်ရ။ မူဟိုတ်ရောဟီုတှ်ေ နကဵုညးတံ ညအ်မှဟွံဗ္တိုက်ပုဟ်ဟီုမ္ဂး ထပ်တုဲဒးဒုၚ်စသိုၚ် ပရေၚ်ပ္တိုန်ဒုဟ် ကုညးထံက်ဂလာန်ဂမၠိုၚ်တံဏောၚ်။ ဟိုတ်ဂှ်ရ ဍေံတံ ဗ္တိုက်ဂှ် ဗ္တိုက်တွဵုဏောၚ်။ ဗွိုၚ်ပၞာန်ဂှ် သာတုဲသၠဲလးကၠုၚ်ဏောၚ်။ ဟိုတ်ဂှ်ရ စွံအဓိကကဵု KIO တုဲ ပ္ဍဲတွဵုရးကချေၚ် အသိၚ်ပၞာန် သာတုဲသၠုၚ်ကၠုၚ်ဏောၚ်ဂှ် ချိၚ်ခယျလဝ်ရ” သာ်ဝွံ ညးသ္ဂးရ။

သ္အာၚ်နူဂှ်ပၠန် နကဵုကံၚ်ဇြဳပၞာန် သွက်ဂွံကလေၚ်ဗ္တိုက် ရးသေံသ္ကုတ်သၟဝ်ကျာဂှ် ကေတ်အခိၚ်ဗၞတ်မွဲမွဲတုဲ ရေၚ်ကွဳစက်ပၞာန်တံလေဝ် သ္ဇက်ဂွံဆက်ဗက်တံ နွံဒၟံၚ်ဂှ်ရ စနူကဵုနံၚ်ချဵု−လာယှိုဝ်ၜက်တုဲ ပေါဲဗ္တိုက်တံ ဆက်သ္ကာတ်မြဟ်ကၠုၚ်ဏောၚ်ဂှ် ညးဆက်ဟီုရ။

ဂကောံကဝ်ကဂှ်တှ်ေ ချဳဒရာၚ်ပၞာန် ၁၀၂၇ ဂှ်ဝွံ တုဲဒှ်အာ ပ္ဍဲကဵုရးသေံသၟဝ်ကျာဂှ်သၟးဟွံသေၚ်တုဲ စဵုကဵုတၚ်ရန်တၟံတိုၚ်ပ္ကဴ ညးဍုၚ်ကွာန်တံစိုပ် ဆက်ထ္မံက်အာရုပ်ရဴရောၚ်ဂှ် ညးမၞုံအခေါၚ်ဟီုဂး MNDAA လဳကျာဝေန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အပ္ဍဲချဳဒရာၚ်ပၞာန် ၁၀၂၇ စဂွံမွဲသတ္တာဟဂှ် ဗ္ဒိုပ်ဒပ်ကံၚ်ဇြဳပၞာန် မၞုံရးသေံသၟဝ်ကျာတံ ဒးဒုၚ်သီလဝ် ဟွံအောန်နူကဵု ၉၅ ဗ္ဒိုပ်တုဲ ထိၚ်ဒက်လဝ် ဍုၚ်ဇၞော် ပန်ဍုၚ်ဂှ် ဂွံတီကေတ် အတိုၚ်တၚ်လလောၚ်တြး ဂကောံမဟာမိတ်ကောဒေံ ၃ ဂကောံတံရ။

ပရိုၚ်−သြၚ်လောန်တိုၚ်(မ်)

ဗီု−MOI