ပ္ဍဲမတ်မလီု အ္စာၝောံသၠးပဋိသန္ဓိ(သားဖွားဆရာမ) CDM မွဲတၠ ဒးဒုၚ်ရပ်စပ်ပံက်လဝ်ဂဗုတ်

မတ်မလီု၊ နဝ်ဝေမ်ဗာ (၅)

တွဵုရးဍုၚ်မန်။ အ္စာၝောံသၠးပဋိသန္ဓိ CDM မံၚ်တန်တဴဒၟံၚ် ပ္ဍဲဍုၚ်မတ်မလီုမွဲတၠ နကဵုတၚ်စောတ်စောဲထံက်လဝ်ဂလာန် ကဵုလဝ်ဇြဟတ် ပွပ္ကီုပရာပ် ပ္ဍဲဇာနှိက်ပရေၚ်မၞိဟ်တုဲ ကံၚ်ဇြဳပၞာန်ရပ်စပ် ပံက်လဝ်ဂဗုတ်ရဂှ် ဂွံတီကေတ် နူညးစုက်လုက်ကဵု ဒပ်ဗၠာဲသၟိၚ် ကံၚ်ဇြဳပၞာန်တအ်ရ။

အ္စာၝောံသၠးပဋိသန္ဓိ CDM ဒဝ်ခေန်န်ဝေဂှ် ပ္ဍဲလ္တူပရေၚ်ပရော ဥူနိုၚ်ဇြဝ်လေန် သ္ကိုပ်က္ဍိုက်က္ဍိုပ်ကမၠောန်ကၚုဲ ပွိုၚ်ဍုၚ်ရေဝ် ဒးဒုၚ်ပန်ဂစိုတ်လဝ်ဂှ် နကဵုတၚ်ထ္ၜးဟိုတ် ကလေၚ်တြးပ္တိုန်လဝ် ပ္ဍဲဇာနှိက်ပရေၚ်မၞိဟ်ညးတုဲ ကံၚ်ဇြဳပၞာန် ကၠုၚ်ရပ်ကေတ်ဏာလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂) ဂှ်ရ။

ကြဴဴနူဂှ် ကံၚ်ဇြဳပၞာန် ပံက်လဝ်ဂဗုတ်ကေတ်လဝ်အရေဝ် အ္စာၝောံသၠးပဋိသန္ဓိ CDM ဒဝ်ခေန်ခေန်ဝေ နကဵုသၞောဝ်ဥပဒေ ရာဇသာတ်ဇၞော် ၝောံပိုဒ် ၅၀၄ (က)ရဂှ် ညးစုက်လုက် ဒပ်ဗၠာဲသၟိၚ်ကံၚ်ဇြဳပၞာန်မွဲတၠဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

အ္စာၝောံသၠးပဋိသန္ဓိ ဒဝ်ခေန်ခေန်ဝေဂှ် ယိုက်ဂၠေၚ်လဝ်တာလျိုၚ် ပ္ဍဲဌာနပရေၚ်ထတ်ယိုတ်ကွာန်ရး ကွာန်ဗာဗူကုမ် ပွိုၚ်ဍုၚ်မြဟ် ဟိုတ်နူဒပ်ပၞာန်သီအဝဵုတုဲ ပါလုပ်ကၠုၚ် ပ္ဍဲပရေၚ်ချဳဒရာၚ်ဒစဵုဒစးအဝဵု CDM ရ။

ဥူဇြဝ်နိုၚ်လေန် သ္ကိုပ်က္ဍိုက်က္ဍိုက်ကမၠောန်ကၚုဲ ပွိုၚ်ဍုၚ်ရေဝ်ဂှ် ပ္ဍဲကဵုဂိတုအံက်တဝ်ဗာ စၟတ်တ္ၚဲ (၁၈) တုဲကၠုၚ်တေံ ဂကောံလကိုဟ်ဍုၚ်ရေဝ် ပန်ဂစိုတ်လဝ်ကဵုလွဟ် ပ္ဍဲဆေၚ်ဍာ်လက်ဖက်မၞုံအရာပ်ယာန်ဂျဳအောၚ် ဍုၚ်ရေဝ်ရ။

ပ္ဍဲကဵုတွဵုရးဍုၚ်မန် ပ္ဍဲမွဲကာလသီအဝဵုဏံ ဟိုတ်နူကံၚ်ဇြဳပၞာန် ဗ္ဂပ်စုတ်ၝောံပိုဒ်နာနာသာ် ရပ်ကေတ်လဝ်တုဲ ကောန်အရာပ်ဗ္ဒာဲ ၈၀၀ ဒးဒုၚ်ရပ်လဝ်ရဂှ် ဂကောံရီုဗၚ်မၚ်မွဲကောန်ထံၚ်ပရေၚ်ဍုၚ်ကွာန် (AAPP) လလောၚ်တြးလဝ်ရ။

ပရိုၚ် – သြၚ်လောန်တိုၚ်မ်

ဗီု -Getty Image

လိက်စၞောန်ဗီု – ဃောညးယိုက်ဝန်ပရေၚ်ထတ်ယိုတ်တအ် ထ္ၜးဒၟံၚ်ဆန္ဒ ဒဒှ်ရဒစဵုဒစးကဵုသၞောတ်တၠအဝဵုပၞာန်