ထဝါဲ၊ နဝ်ဝေမ်ဗာ (၅)
ရးဒေသတၞၚ်သြဳ၊ ပ္ဍဲထံၚ်စာတ်ထဝါဲဂှ် ဟိုတ်နူညးယိုက်ဝန်ထံၚ်မွဲတၠ ထဗးဒးကောန်ထံၚ်ပရေၚ်ဍုၚ်ကွာန်မွဲတၠတုဲ ပရေၚ်ကလိုက်ကၟဵုပ္ဍဲထံၚ် ဒှ်လဝ်ရဂှ် လ္ၚတ်ဂၠိုက်ဂၠာဲဂွံတီကေတ် နူညးစုက်လုက်ကဵုထံၚ်စာတ်တအ်ရ။
ပရေၚ်ကလိုက်ကၟဵုပ္ဍဲထံၚ်ဂှ် တ္ၚဲဏံ ဂိတုနဝ်ဝေမ်ဗာစၟတ်တ္ၚဲ (၇) အခိၚ်စစၞ ပ္ဍဲအခိၚ်နူဂယး (၇) နာဍဳဂှ် နူကဵုကောန်ထံၚ်မွဲတၠ ထပ်အာတ်ကေတ်ပုၚ်ဂှ် ညးယိုက်ဝန်ထံၚ် ထဗးကဵုလဝ်တုဲ က္တဵုဒှ်လဝ်ရ။
ပရေၚ်ညးယိုက်ဝန်ထံၚ် ထဗးလဝ်ဂှ် ဟိုတ်နူညးပိုၚ်ပြဳအဝဵုထံၚ်တအ် ဟွံသောၚ်ကလးကဵုတုဲ ပရေၚ်ကလိုက်ကၟဵုပ္ဍဲထံၚ် ဒှ်လဝ်တုဲ ရမျာၚ်ကညာၚ်ကရေဲအာတ်မိက်တအ်ဂှ် ဂွံမိၚ်ဒၟံၚ် စဵုကဵုမ္ၚးထံၚ်ရဂှ် ဟီုလဝ်ရ။
ပရေၚ်ထံၚ်ကလိုက်ကၟဵုဂှ် ဒှ်လဝ် လအ်ပွိုၚ်ဗ္ဒာဲကဝက်နာဍဳတုဲဂှ် ကလေၚ်ညိၚ်ဝတ်အာတုဲ နကဵုတၚ်စောတ်စောဲ ပါလုပ်ဒၟံၚ်ပ္ဍဲပရေၚ်ထံၚ်ကလိုက်ကၟဵုဂှ် ကံၚ်ဇြဳပၞာန် ရပ်စပ်ထိၚ်ဒက်လဝ် ကောန်ထံၚ်ပရေၚ်ဍုၚ်ကွာန် (၅) တၠရဂှ် ဂွံတီကေတ်ရ။
စပ်ကဵုပရေၚ်ကလိုက်ကၟဵု ဒှ်လဝ်ပ္ဍဲထံၚ်တုဲ ၜိုန်ရသြၚ်လောန်တိုၚ်မ် ဆက်စၠောံသၟာန်လဝ်ကဵု ညးပိုၚ်ပြဳအဝဵုထံၚ်တအ်ကီုလေဝ် ဒုၚ်တဲဟီုသှ်ကဵုလဝ်ဂှ် ဟၟဲရ။
ပ္ဍဲထံၚ်ထဝါဲဂှ် ပ္ဍဲမွဲကာလသီအဝဵုဏံ ကောန်ထံၚ်ပရေၚ်ဍုၚ်ကွာန် ဒပ်ကံၚ်ဇြဳပၞာန် ရပ်ကေတ်လဝ်တအ်ဂှ် ပါဲနူၜုၚ်တက်ပျဲပျာံတုဲ သုၚ်စောဲနဲကဲနာနာသာ် ကၠောန်သ္ပဒၟံၚ် ပရေၚ်ဍဵုဍိုက်ရ။
ပ္ဍဲမွဲကာလသီအဝဵုဏံ ပ္ဍဲကဵုထံၚ်ထဝါဲဂှ် ကောန်ထံၚ်ပရေၚ်ဍုၚ်ကွာန် ၄၀၀ ပြၚ် ဒးဒုၚ်ရပ်ဖျေံလဝ်ထံၚ်တုဲ ညးဒးဒုၚ်ဖျေံလဝ် ဒုဟ်ဒဏ်ထံၚ် စဵုကဵု ၄၀ သၞာံလေဝ် နွံဒၟံၚ်ရ။
အတိုၚ်တၚ်လလောၚ်တြး ဂကောံရီုဗၚ်မၚ်မွဲကောန်ထံၚ်ပရေၚ်ဍုၚ်ကွာန် (AAPP) မ္ဂး အလုံကၟိန်ဍုၚ်မွဲ ပ္ဍဲမွဲကာလသီအဝဵုဏံ ညးဒးဒုၚ်ရပ်လဝ် ၂၅၀၀၀ ပြၚ် နွံတုဲ ပ္ဍဲကဵုဂှ် မၞိဟ် ၁၉၀၀၀ ပြၚ် ဒးဆက်ဒုၚ်ရပ်လဝ်ရဂှ် လလောၚ်တြးလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၃) ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai