ညးဒှ်ဒဒိုက်ဂါဇြာတအ် မွဲတ္ၚဲကွာၚ်ဂျုၚ် ၜါကရေက် ဒးဂယိုၚ်ဒၟံၚ်လမျီု ကုလဟီု

ဝါယှေန်တာန်၊ နဝ်ဝေမ်ဗာ(၅)

ဟိုတ်နူပရေၚ်အေဿရေ ဗတိုက်ပန်လဝ်တုဲ ညးဒဒှ်ဒဒိုက်ဂါဇြာ ဒးဆေၚ်ဒၟံၚ်မုက်ကဵု ပရေၚ်ဍာ်ပိုတ်သ္ကုတ် သီုအခက်ခုဲဇွောံမစၞစ သ္ကာတ်မြဟ်ဒၟံၚ်တအ်ဂှ် မွဲတ္ၚဲ ကွာၚ်ဂျုၚ် ၜါကရေက် ဒးဂယိုၚ်ဒၟံၚ်လမျီုရဂှ် ဒါရိုက်တာအေဂျေန်ဇြဳ ကုလသမဂ္ဂ ဆေၚ်ကဵုညးဒှ်ဒဒိုက်ပါလေတ်သတိုၚ် ဟီုလဝ်ရ။

အေဂျေန်ဇြဳညးဒဒှ်ဒဒိုက် ပါလေတ်သတိုၚ် ပြာကတ်ဒၟံၚ် UNRWA ဂှ် ပ္ဍဲအလုံံဂါဇြာမွဲ ထံက်ပၚ်ကဵုလဝ် ဆေၚ်ကွာၚ်ဂျုၚ် ၈၉ ဆေၚ်တုဲ ရန်လဝ်ကဵုညးဒှ်ဒဒိုက် ၁ ဒသမ ၇ ပြကောဋိကိုတ် မွဲမွဲတ္ၚဲ သွက်ဂွံဂွံကွာၚ်ဂျုၚ်ၜါကရေက်ရ။

မၞိဟ် ဗ္ဒာဲ (၆) ကိုတ် ဒးဗ္ဒာဲဒလာဲဒၟံၚ် ပ္ဍဲဒၞာဲ UNRWA ၁၄၉ ဒၞာဲတုဲ ဟိုတ်နူပရေၚ်အေဿရေဗတိုက်လဝ် ပ္ဍဲဗလးတိ ဗလးကျာတုဲ အဆက်စၠောံ ပိုတ်သ္ကုတ်ဒၟံၚ်ကဵုအေဂျေန်သ္ကုတ်သၟဝ်ကျာရဂှ် ဂွံတီကေတ်ရ။

လစှ်ေသ္ကိုပ်ပ္ညဳပ္ညပ် နူကုလသမဂ္ဂ လ္ပာ်ဗၟံက်သ္ကုတ်လဒေါဝ် မဒှ်သ္ကိုပ်ပ္ညဳပ္ညပ်ဆေၚ်စပ်ကဵု အထံက်အရီုဗ္စာရဏာပရေၚ်မၞိဟ် သွက်တိဍာ်ပါလေတ်သတိုၚ် လေန်မ်ဟက်စတေန်ဂှ်လေဝ် နူလိုၚ်ဍာ် တြးကဵုဒၟံၚ်နူအေဿရေပိလိုၚ်ဂှ် မွဲလိုၚ်ဟေၚ်ဒးဗ္ဂေတ်ဒၟံၚ်ရဂှ် ဟီုလဝ်ရ။

ပ္ဍဲဂိတုအံက်တဝ်ဗာ တုဲကၠုၚ်စၟတ်တ္ၚဲ (၇) တေံ အေဿရေဗိုၚ်လဝ် ပယျဵုဒၞက်ပါလေတ်သတိုၚ် သီုဖအိုတ်ရဂှ် ဂွံတီကေတ်ရ။

အခိၚ်လၟုဟ်ဏံမ္ဂး ညးပိုၚ်ပြဳအဝဵု နူကဵုအေဿရေ၊ အဳဂျေတ်၊ အမေရိကာန် ကေုာံကုလသမဂ္ဂတအ်ဂှ် စပ်ကဵုပရေၚ်ကဵုအခေါၚ်ပၠုပ်ကၠေၚ်ဍေန်တုဲ ကၠောန်ဒၟံၚ်ပရေၚ် သဳကၠဳပ္ညဳပ္ညပ်ရဂှ် သ္ကိုပ်သ္က ဆေၚ်ကဵုအထံက်အရီုဗ္စာရဏာပရေၚ်မၞိဟ် ကုလသမဂ္ဂ မာတေန်ဂရာစ်ဖာစ် ဟီုလဝ်ရ။

ကၠေၚ်ဍေန်ဂှ် သွက်ဌာနမဆေၚ်စပ်၊ ရုၚ်ဂဥုဲ ကေုာံပရေၚ်ပါ်တြးဍာ် ကေုာံဇြဟတ်ဓာတ်လလဳတအ်ဂှ် ဒေါံဟွံဂွံနွံဒၟံၚ်ပၟိက်ရဂးတုဲ ကပေါတ်ထံက်ပၚ်တအ်ဏံဂှ် ဒးကဵုအခေါၚ်ထံက်ပၚ် ဒေသသြၚ်ဂၚ်ဇမၠိၚ်ဂါဇြာ ဗွဲစှ်ေစိုတ်ရောၚ်ဂှ် ညးဟီုလဝ်ရ။

ပ္ဍဲစက်ပၟတ်အရန် ဗ္ဂေတ်ဒၟံၚ် ကမၠောန်ဒုၚ်ကာ နွံဒၟံၚ်ပၟိက်ဒေါံဟွံဂွံ ပ္ဍဲကဵုရုၚ်ဂဥုဲ၊ ရုၚ်စက်ဍာ်သ္အးဇ္ၚး ကေုာံ ပ္ဍဲရုၚ်စက်ကၠောန်ပ္တိတ် စၞသုၚ်တအ်ဂှ် ဟိုတ်နူကၠေၚ်ဍေန်ပိုတ်သ္ကုတ်အာတုဲ ဒးဒေါံလဝ်သီုဖအိုတ်ရဂှ် လစှ်ေသ္ကိုပ်စၞောန်ပ္ညုၚ် ဟက်သတေန် ဟီုကဵုလဝ်သတိရ။

ဟိုတ်နူပဋိပက္ခဟာမေဿ်-အေဿရေတုဲ သွက်ဂွံကဵုအရီုဗၚ် သွက်မၞိဟ်ဂၠိုၚ်ကဵုပြကောဋိကိုက်ဂှ်ကီု၊ မၞိဟ်ဒးဒုၚ်သ္ပလဝ်ဒၞန် နူသီုၜါလ္ပာ်တအ်ဂှ် ညံၚ်ဂွံဗလးကဵု ဗွဲမပြဟ်ကီု သွက်ဂွံစဵုဒၞာကဵု ကောန်အရာပ်တအ်ဂှ်လေဝ် ဂကောံကၟိန်ဍုၚ်နာနာတအ် အာတ်မိက်လဝ်ရ။

Ref: The New Arab