ဂဂဝ်၊ နဝ်ဝေမ်ဗာ (၅)
ကြဴနူဗ္ဒိုပ်သၟိၚ်မေန်ယဲ ပွိုၚ်ဍုၚ်ဂဂဝ် ရးမဂွဵု ဒးဒုၚ်သီတုဲဂှ် ဒပ်သၟဝ်တဲကံၚ်ဇြဳပၞာန်ဂမၠိုၚ် နူကဵုဗ္ဒိုပ်ဗၠာဲသၟိၚ်တိဍာ် ခေန်ယာန်သၠုၚ်ကျာတံဂှ်ဝွံ ထောံလသာဗ္ဒိုပ် ဂြိပ်ဒဴအာလဝ်ရောၚ် ကောန်သ္ဂံၚ်ဂကောံစဵုဒၞါညးဍုၚ်ကွာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုနဝ်ဝေမ်ဗာ ၃ အခိၚ်ဇိုၚ်သဝ်တ္ၚဲဂှ် ထောံလသာဗ္ဒိုပ်ဂြိပ်တိတ်အာလဝ်တုဲ အာစိုပ်ပံၚ်တောဲကဵု ကွာန်ပျူသဝ်ထဳ ခေန်ယာန်သၟဝ်ကျာဂှ် ဒှ်မာန်ရောၚ်ဂှ်လေဝ် ဂကောံစဵုဒၞါဂမၠိုၚ် ချိၚ်ခယျကေတ်လဝ်တံ နွံဒၟံၚ်ရ။
“နူဏေံတေံ နူကဵုၜိုတ် ၇ နာဍဳရ တိတ်အာလဝ်။ ပြဟ်ဟ်ဏံ ကၠောန်ဒၟံၚ် ပရေၚ်ၚးတးတိဍာ်ရ။ ဗက်ရပ်ဒၟံၚ် မၞိဟ်ဂြိပ်အာတံဖိုဟ်ရ” သာ်ဝွံ ကောန်သ္ဂံၚ်ဒပ်စဵုဒၞါဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်ဗၠာဲသၟိၚ်ခေန်ယာန်သၠုၚ်ကျာ ထောံလသာဗ္ဒိုပ်တုဲ မဒးဒုၚ်ဂြိပ်ဒဴအာဂှ်ဝွံ ၜိုန်ရသ္ၚောဲကဵု ဗ္ဒိုပ်ဗၠာဲသၟိၚ်မေန်ယဲ ကောန်ဂကောံဒပ်စဵုဒၞါတံ မသီဂိုၚ်လဝ်ဂှ်ကီုလေဝ် ဟိုတ်နူကြပ်ဒၟံၚ်ကဵု ဍုၚ်ကလေဝ်ဂှ်ရ ဂြိပ်တိတ်အာလဝ် ဒှ်မာန်ရောၚ်ဂှ်လေဝ် အရာမသ္ၚဳဂၠိပ်ဒၟံၚ်တံ နွံဒၟံၚ်ရ။
ပ္ဍဲကဵုဗ္ဒိုပ်တိဍာ်ခေန်ယာန်သၠုၚ်ကျာဂှ် ကောန်ဂကောံဒပ်ကံၚ်ဇြဳပၞာန် ၜိုတ် ၄၀ ဖျေံဒပ်မံၚ်တန်တဴဒၟံၚ်ရောၚ် ညးဒေသတံ သ္ဂးလဝ်ရ။
ပ္ဍဲကဵုတိဍာ်ပယျဵု ဂဂဝ်ကဵု ကလေဝ်ဂှ် ဟိုတ်နူဗ္ဒိုပ်ကံၚ်ဇြဳပၞာန်တံ ဒးဒုၚ်ဗ္တိုက်သီလဝ်ဂှ်ရ တ္ၚဲဏံ ဒပ်ကံၚ်ဇြဳပၞာန်တံ ကၠောန်သ္ပဗ္တိုက်ဒၟံၚ် နကဵုတရဴကျာ ကုမွဲဒမြိပ်ဗ္ဒိုပ်ဗၠာဲသၟိၚ် (ကံရွာ) ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
လိက်ဗီု−အခိၚ်ဗ္ဒိုပ်ဗၠာဲသၟိၚ်မေန်ယဲ ဒးဒုၚ်စံၚ်သီ
sanlontai