ကာဘူလ်၊ နဝ်ဝေမ်ဗာ (၇)
ကြဴနူတာလဳဘာန် သီကေတ်လဝ် အာဖဂါန်နေဿတာန်တုဲ ပရေၚ်တဵုလွဳဘိၚ် အောန်စှ်ေကၠုၚ် စဵုကဵု ၉၅ တၟံကၠံရဂှ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ် ကုလသမဂ္ဂရ။
ကြဴနူထိၚ်ဒဝ်လဝ် အာဖဂါန်တုဲ သ္ကုတ်လကြဴဏံ တာလဳဘာန်တအ်ဂှ် ဖ္အိုတ်သ္အးအာ ပရေၚ်ကၠောန်ပ္တိတ်ဂဥုဲၜူမာဲရောၚ်ဂှ် ကြဵုဇာလဝ်ရ။
အတိုၚ်လိက်ဒုၚ်စဳရေၚ် ရုၚ်ဂဗုတ်ရာဇဝတ် ဂဥုဲၜူမာဲ ကုလသမဂ္ဂ UNDOC မ္ဂး ပရေၚ်တဵုလွဳဘိၚ် ပ္ဍဲကၟိန်ဍုၚ်အာဖဂါန်ဂှ် သၞာံတုဲကၠုၚ်တေံ နူနွံဒၟံၚ် ၜါကိုတ်ပိဠက်ဂှ် ပ္ဍဲကဵုသၞာံဏံ သှ်ေဒၟံၚ် မွဲဠက်ဓဝ်ဟေၚ်ရဂှ် ဓမံက်ထ္ၜးလဝ်တုဲ ပရေၚ်ကၠောန်ပ္တိတ်ဘိၚ်ဂှ်လေဝ် နူကဵုနွံဒၟံၚ်လျိုၚ် ၆၂၀၀ တာန်ဂှ် စှ်ေအာ စဵုကဵုလျိုၚ် ၃၃၃ တာန်ရဂှ် ဂွံတီကေတ်ရ။
သ္အာၚ်နူဂှ်ပၠန် ဗၞတ်ဗ္ၜတ်ရတ်သီဘိၚ်ဗုချိၚ်ခယျဂှ်လေဝ် ပ္ဍဲကဵုသၞာံကၠာတေံ နူကဵုလျိုၚ် ၃၈၀ တာန် စဵုကဵုလျိုၚ် ၅၈၀ နွံလဝ်တုဲ ပ္ဍဲသၞာံဏံမ္ဂး အောန်စှ်ေအာ နူကဵု ၂၄ တာန် စဵုကဵု ၃၈ တာန်ရဂှ် ဟီုလဝ်ရ။
ပရေၚ်တဵုလွဳဘိၚ် ကၟိန်ဍုၚ်အာဖဂါန်နေဿတာန်ဂှ် အောန်ယအ်စှ်ေအာ မွဲလစုတ်ဓဝ်တုဲ ဟိုတ်နူပြံၚ်သၠာဲတဵုလွဳကၠုၚ် သတ်ဒကောၚ်တၞဟ်သ္အာၚ်တုဲ ဖိုလ်အဆက်ပရေၚ်ထံက်ရံၚ်ဗ္စာရဏာပရေၚ်မၞိဟ် ညးဍုၚ်ကွာန် မံၚ်ကွာန်ရးတအ် ဒးဂဗဆဵုတအ်ဂှ်လေဝ် UNDOC ကဵုလဝ်သတိရ။
ဟိုတ်နူပရေၚ်တဵုလွဳဘိၚ်တုဲ ပ္ဍဲသၞာံ ၂၀၂၂ ဏံ သြန်လုပ်သၟာတဵုလွဳ မၞုံအာဖဂါန်တအ် စဵုကဵုဒဝ်ဠာအမေရိကာန် ၁ ဒသမ ၃၆ မဳလျာန် နွံလဝ်ကီုလေဝ် ပ္ဍဲကဵုသၞာံ ၂၀၂၃ ဏံ ဒဝ်ဠာအမေရိကာန် အောန်စှ်ေအာ စဵု ၁၁၀ ပြကောဋိကိုတ်ရဂှ် UNDOC ဟီုလဝ်တုဲ ပရေၚ်အောန်ယအ်စှ်ေဏံ အကာဲအရာပရေံတုဲ သာတုဲသ္ပကဵု ပရေၚ်ပိုန်ဒြပ်ပ္ဍဲဍုၚ် ဒးရုန်ဂစာန်ရဂှ် ဟီုလဝ်ရ။
ပ္ဍဲသၞာံ ၂၀၂၂ ဂှ် ပရေၚ်တဵုလွဳဘိၚ် ပ္ဍဲကၟိန်ဍုၚ်အာဖဂါန်နေဿတာန် မဒှ်ညးကၠောန်ပ္တိတ်ဘိၚ်ဂၠးကဝ်ဇၞော်အိုတ်ဂှ် ဒှ်ဗၞိက်တိတ် ကဵုဒၟံၚ်ၚုဟ်မးကဆံၚ်သၠုၚ်အိုတ် မရနုက်ကဵုတတိယ အလုံပရေၚ်တဵုလွဳ ပ္ဍဲဍုၚ်မွဲမာန်ရဂှ် ဂွံတီကေတ်ရ။
Ref – AFP
sanlontai