ပ္ဍဲခရိုၚ်ဘာပန် KNU ပ္ဍဲကဵုပေါဲဗ္တိုက်ပွိုၚ်မွဲဂိတုဂှ် လ္ပာ်ကံၚ်ဇြဳပၞာန် ချိုတ်အာ ၃၀ ပြၚ်

ဘာပန်၊ နဝ်ဝေမ်ဗာ (၇)

ပ္ဍဲကဵုတိဍာ်ဒပ်မဟာ ၅ ခရိုၚ်ဘာပန် ဗော်သွးကောန်ဂကူကရေၚ် KNU ဂှ် ပ္ဍဲကဵုပေါဲဗ္တိုက်ၜါလ္ပာ် မက္တဵုဒှ်လဝ် အပ္ဍဲဂိတုအံက်တဝ်ဗာတုဲကၠုၚ်တေံဂှ် ကောန်ဒပ်ကံၚ်ဇြဳပၞာန် ၃၀ ပြၚ် ချိုတ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ဒပ်မဟာ ၅ ရ။

အပ္ဍဲဂိတုအံက်တဝ်ဗာ ပွိုၚ် ၁ ဂိတုဂှ် ပ္ဍဲဒေသတိဍာ်ထိၚ်ဒဝ် ဒပ်မဟာ ၅ KNU ဂှ် အကြာဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ကံၚ်ဇြဳပၞာန်၊ ဒပ်မၚ်ပယျဵု BGF တံဂှ် ပေါဲဗ္တိုက် ၈၇ ဝါ က္တဵုဒှ်လဝ်ရ။

အပ္ဍဲပေါဲဗ္တိုက်ၜါလ္ပာ်ဂှ် လ္ပာ်ကံၚ်ဇြဳပၞာန် ၃၁ တၠ ချိုတ်တုဲ ၅၁ တၠ ကလိဂွံလဝ်ဝပ်တုဲ လ္ပာ်ဒပ်ပၞာန်ဗၠးၜးကောန်ဂကူကရေၚ် KNLA တံဂှ် ကောန်သ္ဂံၚ် ၄ တၠ ပြဟ်လလုဲလဝ်တုဲ ၆ တၠ ကလိဂွံလဝ်ဝပ်ဂှ် ပါလုပ် ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် အပ္ဍဲဂိတုအံက်တဝ်ဗာဂှ် ဒပ်ကံၚ်ဇြဳပၞာန် ကၠုၚ်စိုပ်ပန်ပှော်လဝ် နကဵုက္ၜၚ်ကျာဂျက် အရပ်စပ်ပၞာန် နဒဒှ်ပရေၚ်ဗ္တိုက်တရဴကျာဂှ် ၂ ဝါတုဲ မ္ၚးနူပန်ပှော်လဝ် ဗုမ်ကလက်သတာ ၅၀၀ ပံၚ်ပြၚ်ဂှ် သီုကဵုပန်ပှော်လဝ် နကဵုသေနာတ်စက်တံရောၚ်ဂှ်လေဝ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ဒပ်ကံၚ်ဇြဳပၞာန်ဂှ် နဒဒှ်ပရေၚ်ပြုပြေၚ်ပၞာန်ဗလးတိတုဲ မကမ်လွဟ်လက်နက်ဇၞော် မပ္တံကဵု ၁၂၀ မမ၊ ၆၀ မမ အပံၚ်ဖအိုတ် ၂၀ မ ပန်ပှော်လဝ်တုဲ ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ကောန်ကွာန် ၁ တၠ ဇီုကပိုက်ကလိဂွံလဝ်ဝပ်ဂှ် ဒပ်မဟာ ၅ လလောၚ်ပ္တိတ်လဝ်ရ။

အပ္ဍဲဒေသ ဒပ်မဟာ ၅ ခရိုၚ်ဘာပန် KNU ဂှ် ဟိုတ်နူပရေၚ်ပန်ပှော်ဗ္တိုက် ကေုာံ ပရေၚ်ဝးပ္ကဝ်အခေါၚ်အရာမၞိဟ် ဒပ်ကံၚ်ဇြဳပၞာန်တံဂှ်တုဲ ညးဍုၚ်ကွာန်ဒေသ မဒးဂြိပ်ဒဴပါဲဒလေတ်ဒၟံၚ်တံ ၉၁၀၀၀ ပြၚ် နွံဒၟံၚ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဂွံတီကေတ် အတိုၚ်တၚ်လလောၚ်တြး KNU ဗဟဵုရ။

ပရိုၚ်−သြၚ်လောန်တိုၚ်(မ်)ဗီု−KNU