ပ္ဍဲသဓီု လိုန်ဒးမာၚ်တိုပ်တိတုဲ ညးသၟတ် ၃ တၠ ချိုတ်အာ

သဓီု၊ နဝ်ဝေမ်ဗာ ၇

တွဵုရးဍုၚ်မန်၊ ပွိုၚ်ဍုၚ်သဓီု၊ ပ္ဍဲကွာန်ကေန်မန်ချုၚ်ဂှ် ညးသၟတ်အာရတ်ချောဲဂၠဴ ၃ တၠ လိုန်ဒးမာၚ်တိုပ်တိတုဲ ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပါလုပ်သီုကဵု မာၚ်ဝေန်တိုက်ထောန် ညးသၟတ် ၃ တၠ အာရတ်ချောဲဂၠဴ ပ္ဍဲကဵုဝါ ဗၟံက်ကွာန်ဂှ် ပ္ဍဲဂိတုနဝ်ဝေမ်ဗာ ၅ ဇိုၚ်သဝ်တ္ၚဲ ၜိုတ် ၃ နာဍဳဂှ် ဟိုတ်နူမာၚ်တိုပ်တိဗ္တိုဟ်ထ္ကးတုဲ ဒးချိုတ်အာလဝ်ရ။

ဟိုတ်နူလိုန်ဒးမာၚ်တိုပ်တိတုဲ ပါလုပ်သီုကဵုမာၚ်ဝေန်တိုက်ထောန်ဂှ် ညးသၟတ် အာယုက် ၁၃ သၞာံ ၃ တၠဝွံ ဒးကဝေက်မာၚ် ကလိဂွံလဝ်ဝပ်တုဲ ဒးချိုတ်အာလဝ် ပ္ဍဲကဵုဒၞါဲဒှ်ပရူဂှ်ရ။

အတိုၚ်ဂလာန်ညးဒေသတံဂှ်မ္ဂး ညးသၟတ် ၃ တၠဏံဝွံ ဒှ်မသကလောကောဒေံရေၚ်သ္ကအ်တုဲ နူကဵုဗက်အာ ညးသၟတ်ဇၞော်အိုတ် မာၚ်ဝေန်တိုက်ထောန် အာရတ်ချောဲဂှ် ဒးဂဗလဝ်ကဵု ပရေၚ်မာၚ်တိုပ်တိဗ္တိုဟ်ထ္ကးတံရောၚ်ဂှ် သ္ဂးရ။

ကုညးသၟတ် မချိုတ်အာ ၃ တၠဂှ် ကၠောန်သ္ပပရေၚ်စၟဳတ် ပ္ဍဲကဵုရုၚ်ဂဥုဲပွိုၚ်တိုက်ဒုၚ်သုက်တုဲ ပ္ဍဲဂိတုနဝ်ဝေမ်ဗာ ၆ အခိၚ်ဇိုၚ်သဝ်တ္ၚဲဂှ် စံၚ်လဝ် အတိုၚ်အခိုက်ကွာန်ဂှ် ဂွံတီကေတ် ဇရေၚ်ညးဒေသတံရ။

မာၚ်တိုပ်တိဏံ ဗ္တိုဟ်ထ္ကးအာဂှ်ဝွံ အပ္ဍဲကာလသီအဝဵုဏံ ဟိုတ်နူမာၚ်တိုပ်တိ ဗ္တိုဟ်ထ္ကး ပ္ဍဲကဵုကွာန်ကေန်မန်ချုၚ် က္တဵုဒှ်အလန်ပထမကၠာအိုတ်ဂှ်ရ အကြာညးဍုၚ်ကွာန်ဒေသတံဂှ် ပရေၚ်ဒှ်ဓဝိၚ်ဂွိၚ်ဂွါဲတံ သၠုၚ်တိုန်ဒၟံၚ်ရ။

ကွာန်ကေန်မန်ချုၚ် မာၚ်တိုပ်တိဗ္တိုဟ်ထ္ကးအာဂှ်ဝွံ ဗော်သွးကောန်ဂကူကရေၚ် KNU ၊ ဂကောံဒပ်စဵုဒၞါညးဍုၚ်ကွာန် PDF ကေုာံ ဒပ်ကံၚ်ဇြဳပၞာန်တံလေဝ် ကေၚ်လုပ်စိုပ်ချဳဒရာၚ်ဒၟံၚ်ပရေၚ်ပၞာန်ရ။

အတိုၚ်တၚ်နၚ် နူကဵုသြၚ်လောန်တိုၚ်(မ်) မပကောံပကေဝ်လဝ်ဂှ်မ္ဂး ပ္ဍဲတွဵုရးဍုၚ်မန်ဂှ် အပ္ဍဲကာလဒပ်ပၞာန်သီအဝဵုဂှ် ဟိုတ်နူမာၚ်တိုပ်တိဗ္တိုဟ်ထ္ကး ကလေၚ်မွဲဝါပၠန်တံတုဲ ကောန်အရာပ် ဟွံအောန်နူကဵု ၁၀ တၠ ချိုတ်လဝ်တုဲ မၞိဟ်ကလိဂွံဝပ် ဗ္ဒါဲ ၃၀ နွံယျဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−CJ