ပ္ဍဲကဵုဆေၚ်ကၠေၚ်စက် တွဵုရးဍုၚ်မန် ဗွဲမဂၠိုၚ်ဂှ် ကၠေၚ်ပိုတ်ဒၟံၚ်

မတ်မလီု၊ နဝ်ဝေမ်ဗာ ၇

ပ္ဍဲကဵုဆေၚ်သွံကၠေၚ်စက် မၞုံအပ္ဍဲတွဵုရးဍုၚ်မန်ဗွဲမဂၠိုၚ်ဂှ် အပ္ဍဲအကြာတ္ၚဲတံဏံ ဟိုတ်နူတရဴဂၠံၚ်လအ်လတုဲ ဒးဂဗဒၟံၚ်ကဵု ကၠေၚ်စက်ပိုတ်အိုတ်တံရောၚ်ဂှ် တၠကမၠောန်သွံရာန်ကၠေၚ်စက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ယာန်ပရေၚ်ပလံၚ်ဗစိုပ် ကၠေၚ်စက်တံဝွံ ပ္ဍဲကဵုသၞေဟ်ကၚ်စၟဳတ် X-Ray မၞုံဗ္ဒါဲကွာန်ညံၚ်ခါယှေ ဂၠံၚ်ကာဇၞော် လ္ဂုၚ်−မတ်မလီုဂှ် ကံၚ်ဇြဳပၞာန် ဟိုတ်နူကၠောန်သ္ပစၟဳတ်ဒၟံၚ် အခိၚ်ဗွဲမလအ်လ နကဵုတၚ်ထ္ၜးဟိုတ်ပရေၚ်ဂီုကၠီုဂှ်တုဲ တရဴဂၠံၚ်လအ်လတံ က္တဵုဒှ်ဒၟံၚ်ရ။

ယာန်ပရေၚ်ပလံၚ်ဗစိုပ် ကၠေၚ်စက်တံဝွံ ကၠာတေံ ပ္ဍဲကဵုသၞေဟ်ကၚ်စၟဳတ် X-Ray ဂှ် မွဲတ္ၚဲမ္ဂး ၜိုတ်ပွဳပွူ ၄ နာဍဳဟေၚ် ဒးမၚ်ဒၟံၚ်ကီုလေဝ် အပ္ဍဲတ္ၚဲအကြာတံဏံ အောန်အိုတ် နူကဵု ၉ နာဍဳဂှ် ဟွံဒးကဵုအခိုက်မ္ဂး ဒးမၚ်ဒၟံၚ် အတိုၚ်မွဲတ္ၚဲရ။

တၠကမၠောန်သွံရာန်ကၠေၚ်စက်မွဲတၠဂှ် ကံၚ်ဇြဳပၞာန် ၜိုန်ရသွံတြးကဵုဒၟံၚ် ကၠေၚ်စက်တံ နကဵုသၞောတ်ပါ်ကဵုအရၚ် အတိုၚ်လၟေၚ်ၚ်ကီုလေဝ် ဟိုတ်နူတရဴဂၠံၚ်လအ်လတံတုဲ ကၠေၚ်စက်တံ ဟွံစိုပ်ဗွဲမဂတာပ်အခိၚ်ဂှ်ရ ကၠေၚ်စက်ပိုတ်အိုတ်တံ က္တဵုဒှ်ဒၟံၚ်ရောၚ် ဟီုရ။

“ပါ်ကဵုအရၚ်ဂှ်တှ်ေ ဖျေံကဵုဒၟံၚ်ဗီုတြေံတေံရ။ ပ္ဍဲကဵုညံၚ်ခါယှေ ဂှ် ကွဳစက်တံဂှ်ကၟာတ်ဒၟံၚ်တုဲ ဟိုတ်နူပရေၚ်ဂီုကၠီုဍေံတံတုဲ ကၟာတ်ဒၟံၚ်မွဲဏှမွဲဏှပၠန်ရ။ အဏံဂှ် ကွဳစက်တံဂှ် ဂၠိုၚ်ကဵုလ္ၚီဖ္ဍိုက် ကၟာတ်လဝ်ဂၠံၚ်တုဲ အစဳဇန်ဇကုကဵုဇကုဂှ် ဟွံစိုပ်ဆေၚ်ဖျာတံပုဟ်။ ကွဳစက်တံဂှ် ကၟာတ်ဒၟံၚ်တုဲ ဟွံစိုပ်ဆေၚ်ကၠေၚ်တံဂှ်ပုဟ်။ စိုပ်မွဲဆေၚ်မ္ဂး မၞိဟ်တံဂှ် ကောံပ္ဍဲမွဲဆေၚ်ဂှ်တုဲ ရာန်အာ၊ ဆေၚ်ဂှ်အိုတ်မ္ဂး ထပ်စိုပ်မွဲဆေၚ်ပၠန်တှ်ေ အာရာန်ပၠန် ဂတးဂတန်ဟွံကၠောံ ဒှ်ဒၟံၚ်ရ။ စိုပ်ညံၚ်ခါယှေမ္ဂး လအ်မံၚ်ၜိုတ်ဒ္စါံနာဍဳ၊ ဒ္စိတ်နာဍဳဏီ၊ လဆောဝ်လဆောဝ် ကွဳစက်ဇၞော်ဇၞော်ဂှ်တှ်ေ အတိုၚ်မွဲတ္ၚဲဂှ် ကၠောံဟွံဂွံပုဟ်“ သာ်ဝွံ သ္ဂးရ။

သ္အာၚ်နူဂှ်ပၠန် အခိၚ်ကာလလၟုဟ်ဝွံ ဟိုတ်နူစိုပ်ဒၟံၚ် ရာသဳဗြဲကျာတၟးဇးယျဂှ်တုဲ မၞိဟ်အာတရဴဂၠိုၚ်ဂှ်ရ ဇြဟတ်ရာန်ကၠေၚ်စက်တံ သၠုၚ်တိုန်ဒၟံၚ်တုဲ နူကဵုကံၚ်ဇြဳပၞာန်ဂှ် ၜိုတ်နွံပၟိက် ရာန်ကေတ်ဟွံဂွံဂှ်ရ ကလိဂွံဒၟံၚ် နကဵုသၞောတ်ပါ်ပရအ်ကဵုအရၚ်တံသၟးဂှ်ရ ဒးဂဗဒၟံၚ်ကဵု ပွပိုတ်အိုတ်တံရောၚ်ဂှ် ညးဆက်ဟီုရ။

လ္တူဍုၚ်မတ်မလီုကီု သီုကဵုဍုၚ်ဍောတ်တ်တံဂှ် ဒးဂဗဒၟံၚ်ကဵု ကၠေၚ်ဓာတ်ဂကူ 92 ကဵု 95 ပိုတ်အိုတ်တံ ဂၠိုၚ်အိုတ်တုဲ ပ္ဍဲကဵုဆေၚ်လ္ၚဵုတံဂှ် စနူကဵုဂကူပရဳမဳယာန် ဒဳဇြေဝ်တံ ပိုတ်အိုတ်ဒၟံၚ်တံ က္တဵုဒှ်ဒၟံၚ်ရောၚ် ဂွံတီကေတ်ရ။

ကရောံကၠေၚ်စက်ပိုတ်အိုတ်ကၠုၚ်တံဂှ် ဟိုတ်နူအခက်အခုဲရာန်ကေတ်ဟွံဂွံတံဂှ်တုဲ စနူကဵုဂွံပလံၚ်ဗစိုပ်မၞိဟ်ယဲတံဂှ် ဒးဂဗဒၟံၚ်အခက်အခုဲရောၚ် ညးတာလျိုၚ် ဂကောံဟံၚ်ပြံၚ်ပရေၚ်မၞိဟ်မွဲတၠ ဟီုရ။

“အကာဲအရာလၟုဟ်ဂှ်တှ်ေ ပ္ဍဲကဵု DENKO ပိုယ်တံစုတ်ဒၟံၚ် ပ္ဍဲမုတ္တမဂှ်လေဝ် ကၠေၚ်ဟွံမွဲဒၟံၚ်ပုဟ်၊ ၉၂ တံ၊ ၉၅ တံ၊ ပရဳမဳယာန်ဒဳဇြေဝ်တံ ဟွံမွဲဒၟံၚ်ပုဟ်။ ကၠေၚ်ဂှ် ၜိုတ်နွံပၟိက် ဟွံဂွံပုဟ်ဟီုမ္ဂး ဂွံအာဂွံကၠုၚ်ဂှ် ကျာတ်အာရ။ နူဏေံတေံ သီု ၉၂၊ သီု ၉၅ ပိုတ်ဒၟံၚ်ဟီုတှ်ေ ဒးရပ်သုၚ်စောဲဒၟံၚ် ကွဳစက်ဒဳဇြေဝ်ရ။ က္တဵုဒှ်အခက်အခုဲအိုတ်ရ။ အာကဵု ကွဳစက်ကၠေၚ်ဓာတ်မ္ဂး ရာန်ကၠေၚ် ပ္ဍဲဂၠံၚ် ဂွံဟာ၊ ဟွံဂွံဟာဂှ် ဂွိၚ်ဖေက်ဒှ်ဒၟံၚ်ပြသၞာအဏံဂှ်တုဲ ကွဳစက်ကၠေၚ်ဓာတ်တံဂှ် သုၚ်စောဲဟွံဂွံမွဲသာ် ဒှ်ဒၟံၚ်ဍာ် ဒးကလေၚ်သုၚ်စောဲဒၟံၚ် ကွဳစက်ဒဳဇြေဝ်တံရ။ လ္တူဍုၚ်ဂှ်လေဝ် ပ္ဍဲကဵုဆေၚ်ဗွဲမဂၠိုၚ် စုတ်ဟွံဂွံပုဟ်ဂှ် ဂွံတီကေတ်ရ“ သာ်ဝွံ သ္ဂးရ။

ကံၚ်ဇြဳပၞာန်ဂှ် ပ္ဍဲကဵုဆေၚ်ကၠေၚ်စက်တံဂှ် ကၠေၚ်ပိုတ်အိုတ်တံ က္တဵုဒှ်မ္ဂး သွက်ဂွံပ္တိုန်ထ္ၜး မွဲဒမြိပ်အခိၚ်ဂှ်ကဵု ညံၚ်ကၠေၚ်ပိုတ်အိုတ် ဂွိုအ်က္တဵုဒှ် ဆေၚ်ကၠေၚ်ရေၚ်တၠုၚ်ဟွံမာန်တံဂှ် ကေတ်အာအရေဝ်ဏောၚ်ဂှ် လလောၚ်ပ္တိတ်လဝ် အပ္ဍဲဂိတုဂျောန်သၞာံတုဲကၠုၚ်တေံရ။

ဒဒှ်ရကၠေၚ်စက်ပိုတ်အိုတ်ဂှ် ပ္တိုန်ထ္ၜးလဝ် ဇရေၚ်ဌာနက္ဍိုက်ပ် ပရေၚ်စၟဳတ်ကောပ်ကာဲ ကပေါတ်တိတ်နူကၠေၚ်ဍေန် ကံၚ်ဇြဳပၞာန်တံဂှ်ကီုလေဝ် သောၚ်ကလးရေၚ်တၠုၚ်ကဵု ဟွံမွဲပုဟ်ဂှ် တၠကမၠောန်ပရေၚ်သွံရာန်ကၠေၚ်စက်တံ သ္ဂးလဝ်အိုတ်ရ။

တွဵုရးဍုၚ်မန်ဝွံ အပ္ဍဲကာလသီအဝဵုဏံ ညံၚ်ရဴတွဵုရး ကေုာံ ရးဒေသလ္ၚဵုတံကီု ဒးဆေၚ်ဒၟံၚ်မုက် ကုကၠေၚ်စက်ပိုတ်အိုတ်တံကဵု ကၠေၚ်စက်ၚုဟ်က္ဍၚ်တံ မွဲဏှမွဲဏှရ။

ပရိုၚ်−သြၚ်လောန်တိုၚ်(မ်)

ဗီု−TLT