လွဟ်လက်နက်ပန်က္ၜၚ်ကျာ သီဂွံလဝ်တံဂှ် သုၚ်စောဲအာ သွက်ဂွံစဵုဒၞါ သၞတရဴကျာတံဏောၚ်ဂှ် MNDAA ဟီု

နံၚ်ချဵု၊ နဝ်ဝေမ်ဗာ ၇

အပ္ဍဲပေါဲဗ္တိုက်ရးသေံသၟဝ်ကျာ နူကဵုမဟာမိတ်ကောဒေံ ၃ ဂကောံတံ မသီဂွံလဝ် လွဟ်လက်နက်ပန်ပှော်က္ၜၚ်ကျာတံဂှ် သုၚ်စောဲအာ သွက်ဂွံစဵုဒၞါသၞတရဴကျာတံဏောၚ်ဂှ် ညးမၞုံအခေါၚ်ဟီုဂး ဂကောံကဝ်က MNDAA မပါလုပ်ဒၟံၚ် ပ္ဍဲချဳဒရာၚ်ပၞာန် ၁၀၂၇ လဳကျာဝေန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အပ္ဍဲချဳဒရာၚ်ပၞာန် ၁၀၂၇ နူကဵုဒေသရးသေံသၟဝ်ကျာဂှ် သီဂွံလဝ် လွဟ်လက်နက်ပန်ပှော်က္ၜၚ်ကျာ နူကဵုဗ္ဒိုပ်ဒပ်ကံၚ်ဇြဳပၞာန်တံဂှ် ပ္ဍဲဂိတုနဝ်ဝေမ်ဗာ ၅ တေံ ဂကောံမဟာမိတ်ကောဒေံပိဂကောံတံ လလောၚ်ပ္တိတ်လဝ်ရ။

အပ္ဍဲချဳဒရာၚ်ပၞာန် ဂွံ ၁၀ တ္ၚဲဂှ် သီဂွံလဝ် ဗ္ဒိုပ်ဒပ် ၁၂၀ ပြၚ် ပါလုပ်သီုကဵု ဗ္ဒိုပ်ပျဳတုသေတ်ညးတံ ကေုာံ ဗ္ဒိုပ်စပ်ကဵုပရေၚ်အုပ်ဓုပ်လ္ပာ်ဗၠာဲသၟိၚ်၊ ဗ္ဒိုပ်ဒပ်ဍောတ်တ်ဇၞော်​​​ဇၞော် ပၟိက်ဇၞော် လ္ဂောံကဵုပရေၚ်ပၞာန်တံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် သီဂွံလဝ် ကွဳစၚ်ခြပ်ပသဲ မသုၚ်စောဲဒၟံၚ် ပ္ဍဲပြုပြေၚ်ပၞာန်ဗလးတိဂမၠိုၚ်၊ လွဟ်ဇၞော်ဟံၚ်ဝေသ်ဇာဂမၠိုၚ်၊ လွဟ်ဇၞော်ပန်က္ၜၚ်ကျာ ကေုာံ လွဟ်လက်နက်မကမ်ပၞာန်ဗွဲမဂၠိုၚ်ဂၠေၚ်ရောၚ်ဂှ် သ္ဂးရ။

လၟိဟ်ဂၞန် ကေုာံ ဂကူအဇာ လွဟ်လက်နက်ပန်က္ၜၚ်ကျာ နူကဵုဗ္ဒိုပ်ဒပ်ကံၚ်ဇြဳပၞာန် ဂကောံမဟာမိတ်ကောဒေံ ၃ ဂကောံတံ မသီဂွံလဝ်တံဂှ် ထ္မံက်ထ္ၜးလဝ် ဗွဲလစှ်ဂှ်ေ ဟွံမွဲရ။

လဳကျာဝေန် ညးမၞုံအခေါၚ်ဟီုဂး MNDAA ဂှ် လွဟ်လက်နက်ပန်က္ၜၚ်ကျာဂှ်ဝွံ ဒှ်ဂကူ ၁၄ ဒဿမ ၅ ဂှ် ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။

“ဍာ်ဒ္ကေဝ်ကဵု မဝ်ဒေဝ်ဍေံဂှ် ပိုယ်လေဝ် သ္ပဒတန်ကဵုဟွံမာန်ပုဟ်။ ဆ္ဂး အဲခယျဂှ်တှ်ေ ၜိုတ် ၁၄ ဒဿမ ၅ (သေနာတ်စက်ပန်က္ၜၚ်ကျာ) ဂှ် ဒှ်ဏောၚ်။ ဂွံလဝ် (လွဟ်ပန်က္ၜၚ်ကျာ) တှ်ေ သုၚ်စောဲတွဵုဏောၚ်“ သာ်ဝွံ ညးသ္ဂးရ။

ပပ္တံနူတ္ၚဲ စလဝ် ချဳဒရာၚ်ပၞာန် ၁၀၂၇ ဂှ်တုဲ ဒဵုကဵုတ္ၚဲဏံ ကံၚ်ဇြဳပၞာန် မဒးဒုၚ်သီဒၟံၚ် ဗ္ဒိုပ်ဒပ်ဂမၠိုၚ် မွဲတုဲမွဲ အဆက်က်ဂှ်ဝွံ ပ္ဍဲကဵုပေါဲဗ္တိုက်ဗလးတိဂှ် ဟိုတ်နူကျကၠုၚ်ပရေၚ်ဂှ်ရ သာတုဲဒးသုၚ်စောဲဒၟံၚ် လွဟ်ဇၞော်တံကဵု အရီုဗၚ်ပန်တရဴကျာတံရ။

ရးသေံသၟဝ်ကျာ ပ္ဍဲကဵုဒေသ ပရေၚ်ပၞာန်သ္ကာတ်မြဟ်ဒၟံၚ်သၟးဟွံက ပ္ဍဲကဵုကွာန်ရး ပေါဲဗ္တိုက်ဟွံက္တဵုဒှ်တံဂှ်လေဝ် ကံၚ်ဇြဳပၞာန် သုၚ်စောဲလွဟ်ဇၞော် ကေုာံ အရီုဗၚ်ပန်တရဴကျာတံဂှ်တုဲ ဗ္တိုက်ဒၟံၚ်ဂှ်ရ သ္ၚိဒၟံၚ်မၞိဟ်တံကဵု ကောန်ၚာ်သၟတ်တံပါလုပ်ဂှ် ကောန်အရာပ်ဇီုကပိုက်ချိုတ်တံလေဝ် နွံဒၟံၚ်ရ။

အပ္ဍဲချဳဒရာၚ်ပၞာန် ၁၀၂၇ ဂှ် နူကဵုကံၚ်ဇြဳပၞာန် ဟိုတ်နူဗ္တိုက်လဝ်တရဴကျာ ကေုာံ လွဟ်ဇၞော်တံဂှ်တုဲ ညးဗြဴ ကေုာံ ကောန်ၚာ်သၟတ်တံပါလုပ်ဂှ် ညးမ္ဒးချိုတ်အာ ၁၈ တၠ နွံတုဲ ၄၄ တၠ ဇီုကပိုက်ကလိဂွံလဝ်ဝပ်ရောၚ် နူကဵုအလဵုအသဳညဳသၟဟ်ဂကူ NUG လလောၚ်ပ္တိတ်လဝ်ရ။

သေနာတ်စက် ၁၄ ဒဿမ ၅ နူကဵုဂကောံကောဒေံပိဂကောံ သီဂွံလဝ်ဂှ်ဝွံ ၜိုန်ရပန်ပှော် က္ၜၚ်ကျာဂျက်ဖိုက်တာတံဟွံမာန်ကီုလေဝ် ယဝ်ရပန်ပှော် က္ၜၚ်ကျာသၞေၚ်ဝဲတံ ချိုတ်တ်ပၠိုတ်တ်မာန်မ္ဂး စိုပ်တရဴမာန်ရောၚ် အကြာပ်ဒပ်ဇၞော် ဒပ်ကျာ CDM ဇြေယျ သ္ၚဳဂၠိပ်လဝ်ရ။

“သေနာတ်စက် ၁၄ ဒဿမ ၅ နူကဵုဂကောံကောဒေံပိဂကောံတံ ဂွံလဝ်ဂှ် ဍာံဍာံတေံ ရံၚ်ကဵုခေတ် ရံၚ်ကဵုသၞောတ်မ္ဂး စဵုဒၞါပေၚ်ၚ်ဟွံမာန်ပုဟ်။ မုပရောဟီုမ္ဂး က္ၜၚ်ကျာဖိုက်တာ သုၚ်စောဲဒၟံၚ်လၟုဟ်တံဂှ် ဂွံဗက်ပန်ကဵု မတံဏံဂှ် ခက်ခုဲဒၟံၚ်ဏောၚ်။ မွဲဇကိုအ်ဓဝ်တှ်ေ ကျာတ်ညိဏောၚ်။ အခိၚ်ဂြာတ်လဝ်မခတိုဟ်ဂှ် တဲဍိုန် ပန်ဗျာံလဝ်ကဵု ၃/၄ ဇကိုအ်တုဲ ပန်မ္ဂး စိုပ်တရဴညိဏောၚ်။ ဂွံဘပဠ ဖိုက်တာတံဏံ ၜိုတ်ကဆံၚ်ဏံဂှ် ဟွံလောဲပုဟ်။ ဆ္ဂး လၟုဟ် ဗီုကဵု Mi 17 ဍေံတံသုၚ်စောဲဒၟံၚ် သွက်ဂွံထံက်ပၚ်ပလံၚ်ဗစိုပ်အဓိကဂှ်တှ်ေ ပန်ဂွံဏောၚ်။ တုဲပၠန် Mi 35 ယာန်သၞေၚ်ဝဲတံဂှ်ဟီုမ္ဂး ယဝ်ရချိၚ်ပန်ကဵု မဏံ ချိုတ်တ်ပၠန်န်မာန်တှ်ေ စိုပ်တရဴဏောၚ်“ သာ်ဝွံ ညးသ္ဂးရ။

အခိၚ်လၟုဟ်ဂှ် အကြာဒပ်ကံၚ်ဇြဳပၞာန်ကဵု ဂကောံပံၚ်ကောံ PDF ပါလုပ်သီုကဵု မဟာမိတ်ကောဒေံ ပိဂကောံတံဂှ် ပ္ဍဲကဵုရးသေံသၟဝ်ကျာသၟးဟွံက ပ္ဍဲကဵုရးသက်ကိုၚ်တံလေဝ် ပေါဲဗ္တိုက်ဆေၚ်မုက်ဗလးတိတံ သ္ကာတ်မြဟ်ဒၟံၚ်တုဲ လ္ပာ်ကံၚ်ဇြဳပၞာန် ဒးဆောံလေၚ်ကၠုၚ် ရုၚ်ဆေၚ်စပ်ကဵုပရေၚ်အုပ်ဓုပ်တံကဵု ဗ္ဒိုပ်ဆေၚ်စပ်ကဵုလ္ပာ်ပၞာန်တံဂှ် ဂၠိုၚ်တိုန်ကၠုၚ်ဒၟံၚ်ရ။

ပ္ဍဲဂိတုနဝ်ဝေမ်ဗာ ၆ တေံဂှ်လေဝ် ပ္ဍဲလ္ပာ် (ကွမ်းလုံ) မၞုံရးသေံသၟဝ်ကျာဂှ် ပေါဲဗ္တိုက်သ္ကာတ်မြဟ်ဒၟံၚ်တုဲ ထပ်သီဂွံလဝ် ဗ္ဒိုပ်ဒပ်ကံၚ်ဇြဳပၞာန် ၃ ဗ္ဒိုပ် မၞုံဒေသယှေန်ဝါန် ကဵု တုၚ်ယှာန် နူကဵုခရိုၚ်ကဝ်ကတံဂှ်ရောၚ်ဂှ် ဂွံတီကေတ် နူကဵု MNDAA ရ။

လအာတုပ်သာ်ဂှ်ကီု ပ္ဍဲဂိတုနဝ်ဝေမ်ဗာ ၆ အခိၚ်နူဂယးဂှ် ဒပ်ပၞာန်တအာၚ် TNLA ၊ ဂကောံဒပ်ပံၚ်ကောံ PDF မာန္တလေဝ်တံ အာစိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် ဗ္ဒါဲကွာန်ယှိုဲညံၚ်ပေန် ကဵု မွဲဒမြိပ်ဒဒန် ( ဂုတ်ထိပ်) ပွိုၚ်ဍုၚ်နံၚ်ချဵုဂှ် TNLA လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−The Kokang/TNLA