ဇြဳလာန်သကဳ ဘိက်ပၟိၚ် သမ္မတအမေရိကာန်တြေံ ထြာပ် သွက်ဂွံကၠုၚ်ယူကရုၚ်

ဝါယှေန်တာန်၊ နဝ်ဝေမ်ဗာ (၆)

သမ္မတယူကရုၚ် ဇြဳလာန်သကဳ အာတ်မိက်လဝ် အမေရိကာန် သွက်ဂွံကဵုအရီုဗၚ်ထံက်ပၚ် သြန်ဗွဝ်တံဂှ်တုဲ သီုကဵုကော်ဘိက်လဝ် သမ္မတတြေံ ဒဝ်နေဝ်ထြာပ် တၞဟ်နသ္ဂောံတီကေတ် ဗၞတ်ဗ္ၜတ်ပေါဲပၞာန်မာန် သ္ဂောံကၠုၚ်စိုပ်ကျောဝ်ဗဵုအလဵုညးရ။

ယဝ်ရအမေရိကာန် ဟွံထံက်ဂလာန် ကုပေါဲပၞာန်ယူကရုၚ်မ္ဂး နကဵုရုယှာ ပ္ဍဲကဵုပဋိပက္ခ ဥရဝ်ပဇၞော်ဂှ် တံၚ်ဂြဲကော်ဏာ သီုကဵုကောန်ပၞာန်အမေရိကာန်တံဏောၚ်ဂှ် ဇြဳလာန်သကဳ ဟီုဂးလဝ်ရ။

“ရုယှာ ယဝ်ရဂစိုတ်ထောံ ပိုယ်တံသီုဖအိုတ်မာန်မ္ဂး ဍေံတံ ဗ္တိုက်ကၠုၚ် ကၟိန်ဍုၚ်နေတိုဝ်တံဏောၚ်၊ စိုပ်အခါဂှ်တှ်ေ ဒးဗလးဒၟံၚ် ကောန်ဇာတ်မၞးတံ သွက်ဂွံဗ္တိုက်ပၞာန်ဏောၚ်” သာ်ဝွံ ပ္ဍဲဂိတုနဝ်ဝေမ်ဗာ ၅ တေံ ပ္ဍဲကဵုအေန်တာဗျူ မကၠောန်သ္ပလဝ်ကဵု NBC ဂှ် ဇြဳလာန်သကဳ ဟီုဂးလဝ်ရ။

သမ္မတ ဂျဵုဗိုၚ်ဒေန်ဂှ် သွက်ဂွံသ္ပဒတန် သၞောဝ်ဥပဒေအပြောံခရိတ်အရပ်စပ်အပဵု မၞုံ ၁၀၆ ဘဳလျာန်အမေရိကာန်ဒဝ်ဠာဂှ် ကဵုလဝ်ဇြဟတ်ဂရိုဟ်တုဲ ပ္ဍဲကဵုသြန်တံဏံဗွဲမဂၠိုၚ်ဂှ် ညံၚ်ပရေၚ်စဵုဒၞါ ယူကရုၚ် ဇြဟတ်ဂွံခိုဟ်ကၠုၚ်ဂှ်သၟးဟွံက သြန်သှ်ေတံဂှ် ပါ်ပရအ်ကဵုအာ သွက်ပရေၚ်ဂီုကၠီုပယျဵု ကေုာံ ဒေသအေန်ဒိုဝ်−ပသိဖေတ်ခ်၊ အေဿရေတံဏောၚ်ဂှ် ဂွံတီကေတ်ရ။

ကၠတ်ထဝ်သၟဝ်အမေရိကာန် သၟဝ်သ္ကိုပ်သ္ကရဳပါပလေတ်ကာန်ဂှ် ထ္မံက်ဒၟံၚ်ရုပ်ရဴ အစဳဇန်သြန်ဗွဝ်ဇကုအပိုၚ်တံဂှ်တုဲ ပ္ဍဲကဵုသတ္တာဟတုဲကၠုၚ်တေံလေဝ် သ္ပဒတန်လဝ် သၞောဝ်ဥပဒေအပြောံ သွက်ဂွံထံက်ပၚ် အေဿရေ ၁၄ ဒဿမ ၃ ဗဳလျာန်ဒဝ်ဠာဂှ်ကီုလေဝ် သွက်ဂွံကဵုအရီုဗၚ် ဂလိုၚ်ပ္တိုန် သွက်ယူကရုၚ်ဂှ် ဟွံပါလုပ်လဝ်ရ။

အမာတ်ကၠတ်ထဝ်လ္တူ ချံက်ယှူမာ သၟဝ်သ္ကိုပ်သ္က ဒဳမဝ်ကရေတ်တေတ်ဂှ် သၞောဝ်အပြောံ ကၠတ်ထဝ်သၟဝ်ဂှ် ပါ်မာဲသ္ဂုတ်သွာတ်အာဟွံသေၚ်ပုဟ်ဂှ် ဟီုဂးလဝ်တုဲ ဗိုၚ်ဒေန်ဂှ်တှ်ေ သွက်ဂွံကၠောန်သ္ပသာ်ဏံဂှ် ကဵုလဝ်ကတိ သွက်ဂွံသုၚ်စောဲအဝဵုဝဳတဝ်ရ။

ပ္ဍဲကဵုအေန်တာဗျူ မဗလးပ္တိတ်လဝ် ပ္ဍဲဂိတုနဝ်ဝေမ်ဗာ ၆ ဂှ် ဇြဳလာန်သကဳဂှ် ကော်ဘိက်လဝ် သမ္မတတြေံ ရဳပါပလေတ်ကာန် ဒဝ်နေဝ်ထြာပ် သွက်ဂွံကၠုၚ်စိုပ်ဂေတ်ဝေၚ်ရ။ ကော်ဘိက်လဝ် သွက်ဂွံကၠုၚ်စိုပ်ဗဵုကျောဝ်အလဵုညး ဖဵုအဆက်လက္ကရဴ ပဋိပက္ခရုယှာ မစလဝ် ပ္ဍဲသၞာံ ၂၀၂၂ ဂိတုဖေဖဝ်ဝါရဳဂှ်ရ။

ထြာပ် မပ္တိတ်ဒၟံၚ်ဇြဟတ် သွက်ဂွံကလေၚ်ရုဲစှ် ပ္ဍဲသၞာံ ၂၀၂၄ ကၠုၚ်စိုပ်ဏံဂှ်ဝွံ ပါ်ပါဲလဝ် ပရေၚ်ထံက်ဂလာန်အမေရိကာန် ကုကိဗ် သ္ကာတ်တ်မြဟ်ဟ်တုဲ ယဝ်ရညးဟေၚ် ဂွံကလေၚ်ဒုၚ်ရုဲစှ်မ္ဂး ဖအိုတ်ကၠေံပေါဲပၞာန်ဂှ် အပ္ဍဲပွိုၚ် ၂၄ နာဍဳမာန်ရောၚ် ဟီုဂးလဝ်ရ။

“ယဝ်ရ ညးကၠုၚ်အဏံမာန်မ္ဂး ပေါဲပၞာန်ဏံ ညးရပ်စပ်သောၚ်ကလးဟွံမာန်ပုဟ်ဟီုဂှ် သွက်ဂွံသောၚ်ထ္ၜး ကုသမ္မတထြာပ်ဂှ် နကဵုအဲ ဒးကေတ်ၜိုတ် ၂၄ မိနေတ်ဏောၚ်” သာ်ဝွံ ဇြဳလာန်သကဳ သ္ဂးလဝ်ရ။ ဒၟါနူပူတေန်တုဲ ကလိဂွံပရေၚ်ၜိုဟ်လလမ်မာန်ဟွံသေၚ်ပုဟ်ဂှ်လေဝ် ညးဟီုဂးလဝ်ရ။

Ref: The Sydney Morning Herald

Source: Reuters