ညးပါဲဘဲပၞာန်ယာဒိုဝ်တအ် သွက်ဂွံစသုၚ်မွဲမွဲဗဂါပ် ဒှ်ကၠုၚ်အခက်ခုဲ

သာန်တောၚ်ဂျဳ၊ နဝ်ဝေမ်ဗာ (၈)

ဟိုတ်နူပေါဲဗတိုက် ပ္ဍဲတိဍာ်ဗော်သွးကောန်ဂကူကရေၚ် KNU ဒပ်မဟာ ၂ တုဲ ကောန်ဒေသညးဍုၚ်ကွာန် ဒးဂြိပ်ဒဴပါဲဓလေတ်ဒၟံၚ် ဗ္ဒာဲ (၄) ဂိတုတအ်ဂှ် အခိၚ်ကာလပါဲဘဲပၞာန် လအ်တိုန်ကၠုၚ်ဗက် သွက်ဂွံစသုၚ်မွဲမွဲဗဂါပ်လေဝ် ဒှ်ကၠုၚ်အခက်ခုဲရဂှ် ဂွံတီကေတ် နူဂကောံပရေၚ်မၞိဟ် ဒေသတအ်ရ။

ပ္ဍဲဂိတုဂျူလာၚ် တုဲကၠုၚ်ဏံ ပ္ဍဲကဵုလ္ပာ်ဂကောံကွာန်ယာဒိုဝ် မၞုံပွိုၚ်ဍုၚ်သာန်တောၚ်ဂျဳ တိဍာ်ဒပ်မဟာ ၂ ခရိုၚ်တံၚ်ဥူ KNU တအ်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်သ္ကာတ်မြဟ် ဒှ်လဝ် လအ်ဂၠိုၚ်ကဵုတ္ၚဲတုဲ နူလ္ပာ်ကံၚ်ဇြဳပၞာန် ဂြာတ်ထောံဖျေံလဝ်ဗုမ် ကဵုက္ၜၚ်ကျာဗတိုက်လဝ်ရ။

ဟိုတ်နူဒပ်ကံၚ်ဇြဳပၞာန် ဂြာတ်ထောံဖျေံလဝ်ဗုမ်တုဲ ပါလုပ်သီုစမြိုၚ်ပရေၚ်ဘာသာခရေတ်ယာန် သ္ၚိဒၟံၚ်ဗွဲမဂၠိုၚ် ဇီုကပိုက် ဒးလီုလာ်လဝ်တုဲ ညးဍုၚ်ကွာန် ကောန်ဒေသယာဒိုဝ် ၂၀၀၀ ပြၚ် ဒးပါဲဓလေတ်ဒၟံၚ် ဘဲပၞာန်ရဂှ် ဒပ်မဟာ (၂) KNU ခရိုၚ်တံၚ်ဥူ လလောၚ်တြးပ္တိလဝ်ပရိုၚ် နူအခိၚ်ပြဟ်ဟ်တေံရ။

လၟုဟ်ဏံ ပ္ဍဲဒေသယာဒိုဝ်ဂှ် ပေါဲဗတိုက်ဟၟဲ ဟိုတ်နူအကာဲအရာ က္လေၚ်ညိၚ်ဝတ်တိုန်ကၠုၚ်တုဲ ညးဍုၚ်ကွာန်ပါဲဘဲပၞာန်လ္ၚဵုဂှ် ၜိုန်ရက္လေၚ်စဴဴမံၚ်ဒၟံၚ် ပ္ဍဲကွာန်ယာဒိုဝ်ကီုလေဝ် ညးဍုၚ်ကွာန်လ္ၚဵုတအ်ဂှ် ဗ္ဒဗ္ဒာဲဒၟံၚ် ပ္ဍဲကဵုဂြိုပ်ဒဵုဖိုဟ်ဏီတုဲ ဒးအာကၠုၚ်မံၚ်စံၚ်ဒၟံၚ် သီုအခက်ခုဲရဂှ် သၟတ်တၟိကောန်ဂကူကရေၚ်ဍာဲ KNGY လလောၚ်တြးလဝ်ရ။

ညးဍုၚ်ကွာန်ပါဲဘဲပၞာန်ယာဒိုဝ်မွဲတၠဂှ်မ္ဂး သွက်ပရေၚ်စသုၚ်မံၚ်စံၚ်ဂှ် ၜိုန်ရဒးဒတူလာၚ်ဒၟံၚ် နကဵုပရေၚ်အထံက်အပၚ် ဂကောံပရေၚ်မၞိဟ်တအ်ကီုလေဝ် သ္ကုတ်လကြဴဏံ သွက်ဂွံစသုၚ်မွဲမွဲဗဂါပ် ဒှ်ကၠုၚ်အခက်ခုဲရဂှ် ဟီုလဝ်ရ။

သ္အာၚ်နူဂှ်ပၠန် ညးဍုၚ်ကွာန်ပါဲဘဲပၞာန် ဗ္ဒဗ္ဒာဲဒၟံၚ် ပ္ဍဲကဵုဂြိုပ်ဒဵုတအ်ဂှ် အခိၚ်ဂိယဲမံၚ်စံၚ်ဟွံဒးရးမ္ဂး ဟိုတ်နူသ္ၚောဲခြာဒၟံၚ်ကဵုရုၚ်ဂဥုဲ ဗ္ဒမ်ဂဥုဲတအ်တုဲ ပရေၚ်ဂဥုဲဇဗ ဟွံရုမ်ဂပ် နွံဒၟံၚ်ရဂှ် KNGY လလောၚ်တြးလဝ် ပရိုၚ်ရ။

အတိုၚ်တၚ်လလောၚ်တြး ဗော်သွးကောန်ဂကူကရေၚ် KNU လလောၚ်တြးပ္တိတ်လဝ်မ္ဂး လၟိဟ်ညးပါဲဘဲပၞာန် ဒးဂြိပ်ဒဴဴပါဲဓလေတ်ဒၟံၚ် မၞုံပ္ဍဲဒေသတိဍာ် ဒပ်မဟာ ၂ ခရိုၚ်တံၚ်ဥူ ၂၀၀၀၀ ပြၚ်နွံဒၟံၚ်တုဲ နွံဒၟံၚ်ပၟိက် အရီုဗၚ်ဗ္စာရဏာပရေၚ်မၞိဟ်ဖိုဟ်ဏီရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီု – Social Media