ရေဝ်၊ နဝ်ဝေမ် (၈)
ပ္ဍဲကွာန် မၞုံဗ္ဒာဲပွဳပွူ တိဍာ်ထိၚ်ဒဝ်ဗော်ဍုၚ်မန်တၟိ မဒှ်ဂကောံရပ်လွဟ်ကောန်ဍုၚ်အရၚ် မန်ဂှ် နူကဵုဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပွိုၚ် (၂)တ္ၚဲ ဆက်ဆက်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၄) တုဲကၠုၚ်တေံဂှ် နူကဵုဒပ်အမၠံက်ကံၚ်ဇြဳပၞာန် စၟတ် (၃၁၇) ဖျေံသ္ဇိုၚ်ပွိုၚ်ဍုၚ်ရေဝ် ပန်ဖျေံလဝ်လွဟ်ဇၞော် ပ္ဍဲပွဳပွူကွာန်ဝါဗိုၚ် ဗော်ဍုၚ်မန်တၟိ ဟွံအောန်နူ ၅ မရ။
မကမ်လွဟ်ဇၞော်ကံၚ်ဇြဳပၞာန် ပန်ဖျေံလဝ်တအ်ဂှ် ဒတုံံစှ်ေပါ်ခတိုဟ်လဝ် ပ္ဍဲဗ္ဒာဲပွဳပွူ ကွာန်ဝါဗိုၚ်၊ ကြုၚ်လံၚ်၊ ကိုၚ်တဝ်၊ ဗဝ်ဒေါ၊ နာတ်တောၚ်ကဵု ပ္ဍဲကၠအ်ခၜိုတ်တအ်ရ။
ဟိုတ်နူလွဟ်ဇၞော် ပြဟ်စှ်ေပါ်ခတိုဟ်လဝ်တုဲ ပရေၚ်မၞိဟ်ဇီုကပိုက် ဒးလဝ်ဘဲဝပ်ကဵု စမြိုၚ်တအ်လီုလာ်အာလဝ် ၜိုန်ဟၟဲကီုလေဝ် ပရေၚ်ဒှ်ဓဝိၚ် အကြာညးဍုၚ်ကွာန်တအ်ဂှ် ဂၠိုၚ်တိုန်ကၠုၚ်ဒၟံၚ်ရ။
ညးဒေသမွဲတၠဂှ်မ္ဂး ရမျာၚ်လွဟ်ဇၞော် ဒပ်ကံၚ်ဇြဳပၞာန် ပန်ဖျေံလဝ်ဂှ် ထတ်သ္ကာတ်ဒၟံၚ်တုဲ အောန်အိုတ် ၁၂၀-မမ ဟွံသေၚ်မ္ဂး ပန်ဖျေံလဝ် ဟောၚ်ဝေန်ဇြာ ဒှ်မာန်ရဂှ် သ္ၚဳဂၠိပ်လဝ်ရ။
ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်တုဲ ညးဒေသတအ် ဟွံဂံၚ်အာကၠုၚ် ပ္ဍဲကၠအ်ဥဒျာန်ကဵု ကၠအ်ခၜိုတ်တအ်တုဲ ပရေၚ်ပန်ပှ်ောၜါဒှ်ကၠုၚ်ဂှ်လေဝ် ဒှ်ဒၟံၚ်ဓဝိၚ်ညးသ္ကအ်အိုတ်ရ။
ပရေၚ်ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲဒေသမန်တအ်ဂှ် စၚ်ခြၚ်တုဲ ထိၚ်ဒက်ကဵုညိဂှ် နူဗော်ဍုၚ်မန်တၟိ ကြဴဴနူအခန်ကၞာ NCA ပေၚ် ၈ သၞာံတုဲ အခိၚ်ဆဵုဂဗကဵု သ္ကိုပ်ပၞာန်ဇၞော်မေန်အံၚ်လှာၚ် ပ္ဍဲဂိတုအံက်တဝ်ဗာ စၟတ်တ္ၚဲ ၁၆ ဂှ် အာတ်မိက်လဝ်ရ။
ပ္ဍဲလ္တူတၚ်အာတ်မိက် ဗော်ဍုၚ်မန်တၟိဂှ် သွက်ဂွံစၟဳစၟတ်ကဵု ဗွဲမပြဟ် က္ဍိုပ်သ္ကိုပ်ပၞာန် စၞောန်ပ္ညုၚ်လဝ် ကုညးတာလျိုၚ် ဌာန်ဂအုပ်ရးပၞာန် ဒိုဟ်အဂၞဲရဂှ် ညးလုပ်ဂကောံကေၚ်ကာဗဟဵု နာဲဗညာလဴ ဟီုလဝ် ပ္ဍဲလၟေၚ်ပရိုၚ်ဗော်ဍုၚ်မန်တၟိ လလောၚ်ပ္တိတ်လဝ် ပ္ဍဲဂိတုအံက်တဝ်ဗာ စၟတ်တ္ၚဲ (၂၀)တေံရ။
လ္တူဒပ်ကံၚ်ဇြဳပၞာန် ထပ်ပန်ဖျေံကၠုၚ်လွဟ်ဇၞော် ပ္ဍဲဒေသမန်ဏံ ၜိုန်ရသြၚ်လောန်တိုၚ်မ် ဆက်စၠောံသၟာန်လဝ် ညးတာလျိုၚ်ကေၚ်ကာဗဟဵု ဗော်ဍုၚ်မန်တၟိ (၃) တၠ ပါလုပ်သီုနာဲဗညာလဴဴကီုလေဝ် ဒုၚ်တဲဟီုသှ်ကဵုလဝ် ဟၟဲရ။
ပ္ဍဲကဵုပွိုၚ်ဍုၚ်ရေဝ် တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ်မ္ဂး ပ္ဍဲဂိတုအံက်တဝ်ဗာ စၟတ်တ္ၚဲ (၂၀) တုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ဒှ်လဝ်ပေါဲဗတိုက်တုဲ ဒပ်ကံၚ်ဇြဳပၞာန် ဒးဂိလဝ်ဂှ် ဒပ်ကံၚ်ဇြဳပၞာန်ပါ်လဝ် ၃ ကရောၚ်ပၞာန်တုဲ ဟိုတ်နူလုပ်စိုပ်ချဳဒရာၚ်ဒၟံၚ်ပရေၚ်ပၞာန်ဂှ်ရ ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရ။
ပရိုၚ် – သြၚ်လောန်တိုၚ်မ်
ဗီု – NMSP
sanlontai