သဝ် – နဝ်ဝေမ်ဗာ (၈)
ရးဒေသမဂွေ၊ ခရိုၚ်ဂဂဝ် ပ္ဍဲပွိုၚ်ဍုၚ်သဝ်ဂှ် ကံၚ်ဇြဳပၞာန် ပန်ဂစိုတ်လဝ်အ္စာဓမ္မနအခိၚ်ခရေတ်ယာန် ဥူမာန်ကွဳရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပရေၚ်ဒဒှ်ဂှ် တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၇) ပ္ဍဲအခိၚ်နူဂယး နူဍုၚ်ကာန်ပါတ်လေတ် ဃောတတ်ကၠောံအာ ပွိုၚ်ဍုၚ်သဝ်ဂှ် ဒပ်ကံၚ်ဇြဳပၞာန် ပန်ဂစိုတ်လဝ်ရ။
ဟိုတ်နူကံၚ်ဇြဳပၞာန် ပန်ပှော်လဝ်တုဲ ဒးလဝ်လွဟ်မကမ် မၞိဟ်ၜါတၠ ဒးဒုၚ်ရပ်လဝ် မၞိဟ်ပန်တၠတုဲ ညးဒးလဝ်လွဟ်မကမ်တအ်ဂှ် ဒှ်ကောန်ကဵုအပါရဂှ် ညးဒေသတအ် ဟီုလဴလဝ်ရ။
“ဃောတတ်အာဂှ် စခတအ် ဗိုၚ်ပန်လဝ်။ အပါဂှ် ဒးအာကၠာရ။ အခိၚ်ကောန် အာကပှ်ကေတ်အပါဂှ် ဒးထပ်ဒုၚ်ပန်လဝ် ဂွံတီရ။ သှ်ေမၞိဟ်ၜါတၠဂှ်တှ်ေ ဒးဒုၚ်ရပ်လဝ်ရ”ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အခိၚ်လၟုဟ်ဏံ ပ္ဍဲကဵုဍုၚ်သဝ်ဂှ် ဟိုတ်နူအကာဲအရာပၞာန် ကြံၚ်မ္ၚိုဟ်ဒၟံၚ်ဂှ်ရ ညးဒေသတအ် စ္ဍးတိတ်ဒၟံၚ်နူဍုၚ်တုဲ ဒပ်ကံၚ်ဇြဳပၞာန်လေဝ် သွက်သ္ၚိဒၟံၚ် မၞိဟ်ကြပ်ညောန်ကဵုဍေံတအ် ဂွံပါဲဓလေတ်ကဵုညးသ္ကအ် ကဵုလဝ်သမ္တီရဂှ် ညးဒေသတအ် ဟီုလဝ်ရ။
ယျဝ်အလေန်တာန် ဓမံက်ထ္ၜးဒၟံၚ်ပရိုၚ် ပ္ဍဲကဵုဒေသဂှ်မ္ဂး ဟိုတ်နူလွဟ်ဇၞော်ကောန်ဒပ်ကံၚ်ဇြဳပၞာန်တအ် ပန်ဖျေံလဝ်တုဲ အ္စာဓမ္မနအခိၚ် အ္စာမာန်ကွဳ နူလ္ပာ်ဇြေဝ်မာၚ်ကုမ်ဂှ် ဒးချိုတ်လဝ်တုဲ ညးဒှ်ကောန်ညးဂှ်လေဝ် ဟိုတ်နူဒးလဝ်လွဟ်မကမ် ပ္ဍဲကအ်ဂှ်ရ ဂွံလွဳလွတ် ဟွံလောဲရဂှ် ဓမံက်ထ္ၜးလဝ်ရ။
ကြဴဴနူဒပ်ပၞာန်သီကေတ်အဝဵုကၟိန်ဍုၚ်ဗၟာတုဲဂှ် ဒးဒုၚ်ပ္ကီုပရာပ်တုဲ ညးဒးပြဟ်လလုဲလဝ် စဵုကဵုဗ္ဒာဲ ၄၂၀၀ နွံကၠုၚ်ရဂှ် ဓမံက်ထ္ၜးလဝ်ပ္ဍဲ AAPP ဂကောံရီုဗၚ်မၚ်မွဲကောန်ထံၚ်ပရေၚ်ဍုၚ်ကွာန်ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai